សកម្មភាពរបស់សហព័ន្ធខ្មែរក្រោមធ្វើបាតុកម្មនៅសហរដ្ឋអាមេរិក។ រូបភាព៖ @Voice of Khmer Krom
ភ្នំពេញ៖ សហព័ន្ធខ្មែរក្រោមនឹងធ្វើបាតុកម្មជុំវិញពិភពលោកលើកទី២ ក្នុងគោលបំណងទាមទារឲ្យរដ្ឋាភិបាល វៀតណាម ដោះលែងសកម្មជនសិទ្ធិមនុស្សខ្មែរក្រោមចំនួន ៤នាក់ ដែលកំពុងជាប់ពន្ធនាគារ។ សកម្មជនខ្មែរក្រោមទាំង៤រូបដែលសហព័ន្ធខ្មែរក្រោមទទូចឱ្យមានការដោះលែងនោះរួមមាន លោក យ័ញ មិញក្វាង លោកស្រី ឌិញ ធី វិន លោក ថាច់ កឿង និងលោក តោ ហ្វាង ថឿង។
ដើមហេតុដែលបង្កឱ្យកើតមានមហាបាតុកម្មលើកទី២ ក្រោយតុលាការប្រទេសវៀតណាមកាត់ទោសឱ្យសកម្មជនដែលតែងតែសម្តែងសកម្មភាពពាក់ព័ន្ធនឹងតស៊ូទាមទារ លទ្ធិប្រជាធិបតេយ្យ និងសិទ្ធិសេរីភាពរបស់ពលរដ្ឋ ចំនួន៤រូបនេះ ឱ្យជាប់ពន្ធធនាគារ។
លើសពីនេះ ព្រះអង្គ វេន រតនា យឿង សមាជិកសហព័ន្ធខ្មែរក្រោមនៅសហរដ្ឋអាមេរិក ឱ្យដឹងបន្ថែមគោលបំណងចម្បងមួយទៀតនោះគឺ ដើម្បីជំរុញលើកទឹកចិត្តដល់ពលរដ្ឋខ្មែរក្រោម ក្នុងការទាមទារសិទ្ធិសេរីភាព និងសិទ្ធិសម្រេចវាសនាខ្លួនដោយខ្លួនឯង ក្នុងនាមខ្មែរក្រោមជាម្ចាស់ស្រុកជនជាតិដើម ។
បាតុកម្មនេះសហព័ន្ធខ្មែរក្រោមនឹងបង្កើតឡើងជាបន្តបន្ទាប់តាមបណ្តាប្រទេសសេរីដែលប្រកាន់យកលទ្ធិប្រជាធិបតេយ្យ។ ក្នុងនោះសហព័ន្ធខ្មែរកម្ពុជាក្រោមចេញសេចក្តីប្រកាសដោយភ្ជាប់ជាមួយលិខិតអញ្ជើញឱ្យចូលរួមព្រឹត្តិការណ៍នេះផងដែរនៅថ្ងៃទី១៨ ខែមីនា ឆ្នាំ២០២៤ខាងមុខ ដែលនឹងប្រព្រឹត្តិទៅនៅមុខស្ថានអគ្គកុងស៊ុលវៀតណាមប្រចាំទីក្រុង San Francisco សហរដ្ឋអាមេរិក។
ពាក់ព័ន្ធករណីនេះ លោក ស៊ឺន ជុំជួន អគ្គលេខាធិការ សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ ឱ្យដឹងថាថ្មីៗនេះមានពលរដ្ឋខ្មែរក្រោមដែលរស់នៅក្រៅប្រទេសបានសម្រេចធ្វើបាតុកម្មពិភពលោកលើកទី២នេះនៅមុខបណ្តាស្ថានទូត ឬកុងស៊ុលនៅប្រទេសមួយចំនួនរួចខ្លះៗហើយដែរ។ ដោយឡែកលោកថា ចំពោះប្រទេសកម្ពុជាពលរដ្ឋខ្មែរក្រោមមិនទាន់មានផែនការក្នុងការបង្កើតឱ្យមានព្រឹត្តិការណ៍នេះឡើយ។
«សម្រាប់នៅកម្ពុជាយើងអត់មានផែនការនៅឡើយទេទាក់ទងទៅនឹងការធ្វើបាតុកម្ម យើងគ្រាន់តែធ្វើការអន្តរាគមន៍ទៅតាមបណ្តាញទូតនានាដែលពាក់ព័ន្ធទៅនឹងវៀតណាមហា៎ណាស់ ហ្នឹងហើយអ៊ីចឹងផែនការនៃការធ្វើបាតុកម្មគឺយើងនៅមិនទាន់កំណត់ច្បាស់លាស់នៅឡើយទេ។»
យ៉ាងមិញជុំវិញបាតុកម្មពិភពលោកនេះ នៅកំឡុងឆ្នាំ២០២៣ សហព័ន្ធខ្មែរក្រោមបានបង្កើតឡើងរួចម្តងដែរ។ ករណីជំរុញឱ្យពលរដ្ឋខែ្មរក្រោមបង្កើតបាតុកម្មពិភពលោកលើកទី១នៅឆ្នាំ២០២៣នោះ ក្រោមហេតុផលស្រដៀងគ្នាដូចទៅនឹងបាតុកម្មពិភពលោកលើកទី២នេះដែរ ដោយកាលពីថ្ងៃទី៣១ កក្កដា ឆ្នាំ២០២៣ សកម្មជនខ្មែរក្រោម៩នាក់ត្រូវបានអាជ្ញាធរវៀតណាមគំរាមកំហែង និងឃាត់ខ្លួន ក្រោមបទចោទ «កេងចំណេញលើសិទ្ធិសេរីភាព និងលទ្ធិប្រជាធិបតេយ្យ បំពានលើផលប្រយោជន៍របស់រដ្ឋ និងសិទ្ធិសេរីភាពស្របច្បាប់ នៃអង្គការចាត់តាំង និងបុគ្គលរបស់ប្រទេសវៀតណាម»៕
