ខណៈដែលក្រសួងវប្បធម៌បានកំពុងស្រាវជ្រាវឯកសារអំពីអាពាហ៍ពិពាហ៍ខ្មែរ សម្រាប់ចុះបញ្ជីបេតិកភណ្ឌវប្បធម៌អរូបីនៃមនុស្សជាតិ មន្ដ្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិតសភាកម្ពុជាយល់ថា កម្ពុជាអាចនាំវប្បធម៌អរូបីនេះចូលយូណេស្កូបាន ឱ្យតែគោរពតាមបែបបទនីតិវិធី។
លោក ឡាក់ ច័ន្ទតារា ជូននូវសេចក្ដីរាយការណ៍៖
ក្រសួងវប្បធម៌ និងវិចិត្រសិល្បៈ ថាកំពុងប្រមូលធាតុចូលដើម្បីជាប្រយោជន៍ក្នុងការរៀបចំឯកសារអំពីអាពាហ៍ពិពាហ៍ខ្មែរ ស្នើសុំចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ។ ការប្រមូលធាតុចូលនេះ ធ្វើឡើងអំឡុងពេលជួបជុំពីសំណាក់អ្នកស្រាវជ្រាវ អ្នកភ្លេងការ អ្នកផ្នួង និងលោកតាអាចារ្យកាលពីថ្ងៃទី១១ ខែមីនា ឆ្នាំ២០២៤កន្លងទៅ។
លោកបណ្ឌិត ឈត ប៊ុនថង មន្ដ្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិតសភាកម្ពុជាបង្ហាញក្ដីរីករាយដែលក្រសួងវប្បធម៌មានគំនិតផ្ដួចផ្ដើមស្នើ អាពាហ៍ពិពាហ៍ក្នុងសង្គមខ្មែរ ចូលក្នុងបញ្ជីបេតិកភណ្ឌពិភពលោកបែបនេះ។ លោកបណ្ឌិតរំពឹងថា កម្ពុជាអាចនាំវប្បធម៌អរូបីនេះ ចុះបញ្ជីបេតិកភណ្ឌបាន ឱ្យតែគោរពតាមបែបបទ នីតិវិធីរបស់អង្គការយូណេស្កូ។
ទោះបីមានភាពស្រដៀងគ្នា ឬមានឈ្មោះដូចគ្នានិងប្រទេសជិតខាងក៏ដោយលើផ្នែកវប្បធម៌អរូបីមួយចំនួន តែលោកបណ្ឌិត ឈត ប៊ុនថង បញ្ជាក់ថាគេអាចដាក់សម្បត្តិទាំងនោះក្នុងបញ្ជីវប្បធម៌បេតិកភណ្ឌបាន ព្រោះសម្បត្តិបែបអរូបីអាចដាក់លើសពីមួយប្រទេស លើកលែងតែសម្បត្តិបែបរូបី ទើបជាកម្មសិទ្ធិរបស់ប្រទេសមួយៗ។
យ៉ាងណា ប្រទេសថៃ ដែលមានវប្បធម៌ស្រដៀងកម្ពុជាទើបបានដាក់កម្មវិធីសង្ក្រាន្ដចូលជាសម្បត្តិវប្បធម៌អរូបីនៃមនុស្សជាតិអង្គការយូណេស្កូ ហើយក្នុងឆ្នាំ២០២៤នេះ ថៃប្រកាសរៀបចំសង្ក្រាន្ដរយៈពេល២១ ថ្ងៃ ពោលចាប់ពីថ្ងៃទី១ ដល់ថ្ងៃទី២១ ខែមេសា ដើម្បីអបអរការចុះបញ្ជីនេះ។
មន្ដ្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិតសភាកម្ពុជា លោក ឈត ប៊ុនថង បានអះអាងថា កម្ពុជាក៏អាចដាក់សង្ក្រាន្ដខ្មែរចូលជាសម្បត្តិវប្បធម៌អរូបីដែរ ដោយផ្អែកលើតឹងតាងប្រវត្តិសាស្ដ្រដែលយើងបានចងក្រង។
សូមជម្រាបថា ក្នុងការផ្សព្វផ្សាយទូទៅអំពីមរតកវប្បធម៌អរូបី និងអំពីអនុសញ្ញា២០០៣នៃអង្គការយូណេស្កូ ស្តីអំពី “កិច្ចការពារបេតិកភណ្ឌវប្បធម៌អរូបី”កម្ពុជាបានចូលរដ្ឋភាគីតាំងពីឆ្នាំ២០០៦ មកម្លេះ៕
