បន្ទាប់ពីទទួលបានការតែងតាំងជាឯកអគ្គរដ្ឋទូតថ្មី ប្រចាំប្រទេសកម្ពុជា លោក Nominee Robert Forden សន្យាថានឹងជំរុញការគោរពសិទ្ធិមនុស្ស និងស្ដារលទ្ធិប្រជាធិបតេយ្យនៅកម្ពុជាឡើងវិញ ក្រោយសម្លឹងឃើញថាកម្ពុជាបានដើរថយក្រោយនូវគោលការណ៍ទាំងនេះ។ នេះបើយោងតាមលិខិតរបស់លោក ពេលប្រាប់ទៅគណៈកម្មាធិការទំនាក់ទំនងកិច្ចការបរទេសព្រឹទ្ធសភាអាមេរិក ដែលចេញផ្សាយលើហ្វេសប៊ុកស្ថានទូតអាមេរិកប្រចាំកម្ពុជា។
លោក ឡាក់ ច័ន្ទតារា ជូននូវសេចក្ដីរាយការណ៍៖
លោក Nominee Robert Forden ត្រូវបានតែតាំងជាឯកអគ្គរដ្ឋទូតអាមេរិកប្រចាំប្រទេសកម្ពុជា បន្ទាប់ពីលោកប្រធានាធិបតិតេយ្យ Jo Biden និងរដ្ឋមន្ដ្រីការបរទេសអាមេរិក លោក Antoni Blinken បានផ្ដល់ទំនុកចិត្តដល់លោក។
ក្នុងលិខិតដែលស្ថានទូតអាមេរិកចេញផ្សាយកាលពីសប្ដាហ៍មុនបញ្ជាក់ថា លោក Robert Forden បានសន្យានឹងជំរុញការគោរពសិទ្ធិមនុស្ស និងស្ដារលទ្ធិប្រជាធិតេយ្យនៅកម្ពុជា។ ឯកអគ្គរដ្ឋទូតថ្មីរូបនេះ សម្លឹងមើលឃើញថា ប្រទេសកម្ពុជាបានដើរថយក្រោយពីលទ្ធិប្រជាធិបតេយ្យ និងមានការធ្លាក់ចុះនូវការគោរពសិទ្ធិមនុស្ស។
លោកបានលើកឡើងក្នុងលិខិតដដែលថា អាមេរិក និងកម្ពុជា មានកិច្ចជាច្រើនទៀតដែលត្រូវធ្វើរួមគ្នាក្នុងការអនុវត្តលទ្ធិប្រជាធិបតេយ្យ រួមមានការកាត់ទោសពីបទ «ក្បត់ជាតិ» របស់ប្រធានអតីតគណបក្សសង្គ្រោះ លោក កឹម សុខា និងការចាប់ឃុំខ្លួនកញ្ញា សេង ធារី ពលរដ្ឋខ្មែរអាមេរិកាំង និងកញ្ញា ឈឹម ស៊ីថរ ប្រធានសហជីពជាដើម។
ផ្អែកតាមលិខិតដដែល លោក Robert Forden រំពឹងថាមេដឹកនាំថ្មីរបស់កម្ពុជានឹងផ្តល់ឱកាស ដើម្បីពង្រឹងកេរ្ដិ៍ឈ្មោះកម្ពុជាលើឆាកអន្តរជាតិ ដោយចូលរួមកែលម្អគោលជំហរ និងស្តារលទ្ធិប្រជាធិបតេយ្យ សេរីពហុបក្ស ពិតប្រាកដ ព្រមទាំងបញ្ចប់ការកាត់ទោសក្រោមហេតុផលនយោបាយ និងអនុញ្ញាតឱ្យប្រព័ន្ធផ្សព្វផ្សាយឯករាជ្យបើកដំណើរការឡើងវិញដោយគ្មានការជ្រៀតជ្រែក។ លោកអះអាងថា បើសិនទទួលបានការតែងតាំងជាផ្លូវការ លោកនឹងជំរុញការគោរពសិទ្ធិមនុស្ស លទ្ធិប្រជាធិបតេយ្យ សេរីពហុបក្ស ព្រោះនោះចំណុចស្នូលនៃការងាររបស់លោក។
វិទ្យុស្ដ្រីមិនទាន់ទទួលបានការឆ្លើយតបពីលោក ជុំ សុន្ទរី អ្នកនាំពាក្យក្រសួងការបរទេស និងកិច្ចសហប្រតិបត្តិការអន្ដរជាតិកម្ពុជា តាមប្រព័ន្ធតេឡេក្រាមនៅឡើយទេ គិតត្រឹមរសៀលថ្ងៃទី១៣ ខែមីនា ឆ្នាំ២០២៤នេះ។
យ៉ាងណា លោកឯកអគ្គរដ្ឋទូតអាមេរិកថ្មី ក៏រម្លឹកឡើងដែរ ពីក្ដីបារម្ភរបស់សហរដ្ឋអាមេរិកចំពោះ មូលដ្ឋានទ័ពជើងទឹករាម ដោយសហរដ្ឋអាមេរិកថានឹងបន្តគាំទ្រកិច្ចខិតខំប្រឹងប្រែង ដើម្បីរក្សា និងអភិរក្ស អធិបតេយ្យភាពរបស់កម្ពុជា។ នេះបើយោងតាមលិខិតរបស់លោក Robert Forden ដដែល។
សូមជម្រាបថា បច្ចុប្បន្ន លោក Nominee Robert Forden ជាសមាជិកនៃផ្នែកកិច្ចការបរទេសជាន់ខ្ពស់មានឋានៈជាទីប្រឹក្សាយោបល់ របស់រដ្ឋមន្ដ្រី។ លោកកំពុងបំពេញតួនាទីនៅការិយាល័យកិច្ចការអាស៊ីខាងកើត និងប៉ាស៊ីហ្វិកនៃក្រសួងការបរទេសអាមេរិក។ លោកធ្លាប់បានមកបំពេញកិច្ចការនៅកន្លែងចម្រុះដូចជាប្រទេសចិន តៃវ៉ាន់ វៀតណាម និងអ៊ីស្រាអែលផងដែរ៕
