ក្នុងការតវ៉ារារាំង សកម្មភាពជីកប្រឡាយ លើផ្ទៃដីដែលប្រជាសហគមន៍អះអាងថា លោកអភិបាលខណ្ឌព្រែកព្នៅសន្យាទុកចរចាដោះស្រាយជាមួយពួកគេ បានបណ្ដាលឱ្យស្ត្រី២នាក់សន្លប់ និងក្មេងស្រីម្នាក់រលាកភ្លើង ក្នុងការប៉ះទង្គិចជាមួយអាជ្ញាធរខណ្ឌព្រែកព្នៅ នៅសំរោងត្បូង។ លោក គីម ចាន់ចាវ រាយការណ៍
ស្ត្រី២នាក់សន្លប់ និងក្មេងស្រីម្នាក់រលាកភ្លើង ក្នុងការប៉ះទង្គិចជាមួយអាជ្ញាធរខណ្ឌព្រែកព្នៅ។ ក្រុមស្ត្រីដែលរងការប៉ះទង្គិចទាំងនោះ គឺជាប្រជាពលរដ្ឋរស់នៅសហគមន៍សំរោងត្បូងជាប់ផ្ទៃបឹងតាមោក ក្នុងខណ្ឌព្រែកព្នៅ ដែលបានស្នើសុំឱ្យអាជ្ញាធរពាក់ព័ន្ធផ្តល់ដំណោះស្រាយដីធ្លីសមស្របដល់ពួកគេ ខណៈរដ្ឋបាលខណ្ឌប្រកាសឱ្យបញ្ឈប់ការចិញ្ចឹមត្រី និងត្រូវរុះរើសំណង់គ្រប់ប្រភេទឱ្យបានឆាប់បំផុតចេញពីដីរបស់រដ្ឋ ដើម្បីអនុវត្តគម្រោងអភិវឌ្ឍន៍ប្រឡាយមេរំដោះទឹក ដែលអាចកាត់បន្ថយការជន់លិចផ្នែកខ្លះនៃទីក្រុងភ្នំពេញ។
ជាក់ស្ដែង នៅពេលគ្រឿងចក្រ ខណ្ឌព្រែកព្នៅ កំពុងធ្វើការជីកប្រឡាយ ក្រុមប្រជាសហគមន៍សំរោងត្បូង ដែលសុទ្ធសឹងជាស្ត្រីបានលើកគ្នាតវ៉ាចាប់តាំងពីថ្ងៃទី២៦ ខែកុម្ភៈ។ រហូតដល់ព្រឹកថ្ងៃទី២៧ ខែកុម្ភៈ ឆ្នាំ២០២៤ ពួកគេបានបន្តការតវ៉ា និងរារាំងមិនឱ្យគ្រឿងចក្រ ជីកកាយធ្វើប្រឡាយបង្ហូរទឹក ចំទីតាំងដែលពួកគេអះអាងថាជាដីរបស់ខ្លួននោះឡើយ។
អ្នកស្រី សឿន ស្រីសុទ្ធ តំណាងសហគមន៍សំរោងត្បូងបឹងតាមោគ ដែលបានចូលរួមការតវ៉ានេះ បានប្រាប់វិទ្យុស្ត្រី នៅថ្ងៃទី២៧ កុម្ភៈនេះថា អាជ្ញាធរខណ្ឌព្រែកព្នៅ ជីកប្រឡាយ រំលោភលើដីផ្ទះប្រជាជន នៅពេលប្រជាពលរដ្ឋតវ៉ា មានកម្លាំងអាជ្ញាធរខណ្ឌប្រមាណ២០០នាក់មកអន្តរាគមន៍ ហើយក៏ប៉ះទង្គិចជាមួយពលរដ្ឋ បណ្ដាលឱ្យអ្នកខ្លះក៏រងរបួស ខ្លះសន្លប់។
«មកបំពានប្រជាពលរដ្ឋ ចឹងប្រជាពលរដ្ឋទៅទប់ស្កាត់មិនឱ្យគាត់កាយដីក្នុងផ្ទះប្រជាសហគមន៍ តែគាត់បែរជាប្រើអំពើហិង្សាមកលើប្រជាពលរដ្ឋ បានវ៉ៃលើស្ត្រីនិងកុមារ។ ឥលូវមានស្ត្រីម្នាក់ អ៎២នាក់ កុមារម្នាក់ និងស្ត្រីម្នាក់រងរបួស មួយឆេះភ្លើង ១ទៀតសន្លប់ គាត់យកកែងទៅអុកនឹងចុងដង្ហើមគាត់។ ឥលូវគាត់កំពុងសន្លប់ គាត់កំពុងតែសង្គ្រោះបន្ទាន់នៅមន្ទីរពេទ្យ មណ្ឌលសុខភាពព្រែកព្នៅ។ គាត់បានបិទផ្លូវមិនឱ្យចូលយកឡានពេទ្យចូលយកពលរដ្ឋមកសង្គ្រោះទេ ខាងអាជ្ញាធរខណ្ឌព្រែកព្នៅ។»
កាលពីថ្ងៃទី ១៩ ខែកុម្ភៈ ឆ្នាំ ២០២៤ រដ្ឋបាលខណ្ឌព្រែកព្នៅបានចេញសេចក្តីជូនដំណឹង ស្តីពីការអភិវឌ្ឍប្រឡាយមេរំដោះទឹកក្នុងបឹងតាមោក ដោយឱ្យប្រជាពលរដ្ឋ ដែលកំពុងអាស្រ័យផលនៅក្នុងផ្ទៃបឹងតាមោកត្រូវបញ្ឈប់រាល់សកម្មភាព ដូចជាការចិញ្ចឹមត្រី ការសង់រោងតូបយាមចាំដី ឃ្លាំង ដាក់សម្ភារៈផ្សេងៗ និងសំណង់មិនរៀបរយនានា ហើយត្រូវតែរុះរើសំណង់គ្រប់ប្រភេទឱ្យបានឆាប់បំផុតចេញពីដីរបស់រដ្ឋ។
រដ្ឋបាលខណ្ឌព្រែកព្នៅអះអាងថា ការរុះរើនេះដើម្បីអនុវត្តគម្រោងអភិវឌ្ឍន៍ប្រឡាយ មេរំដោះទឹក សម្រាប់ជាប្រយោជន៍សាធារណៈ ជាពិសេសការបញ្ចៀសទឹកជំនន់នៅតំបន់ភាគខាងលិច ស្របតាមផ្លូវ ១៥១ រហូតដល់ប្រឡាយព្រែកព្នៅ នៃផែន ការរបស់រដ្ឋបាលរាជធានីភ្នំពេញ។
ទោះយ៉ាងណា អ្នកស្រី សឿន ស្រីសុទ្ធ អះអាងថា ជុំវិញការជីកប្រឡាយទឹកនេះ កន្លងមក លោក ធឹម សំអាន អភិបាលខណ្ឌព្រែកព្នៅ បានសន្យាថានឹងទុកផ្ទៃដៃ១០០ម៉ែត្រ ដើម្បីចរចាដោះស្រាយជាមួយប្រជាពលរដ្ឋនៅសហគមន៍នេះ ប៉ុន្តែរហូតដល់ពេលនេះមិនទាន់ការចរចាត្រូវគ្នានៅឡើយ។
«ពួកគាត់មកកាយដីក្នុងដីសហគមន៍ពួកខ្ញុំ ដែលលោកអភិបាលខណ្ឌថា ទុក១០០ម៉ែត្រ ដើម្បីដោះស្រាយជាមួយប្រជាពលរដ្ឋ តែដំណោះស្រាយមិនទាន់ដោះស្រាយផង បែរជាគាត់រំលោភបំពានក្នុងដី សហគមន៍ប្រជាពលរដ្ឋវិញ។»
វិទ្យុស្ត្រីបានព្យាយាមទាក់ទងលោកអភិបាលខណ្ឌ ធឹម សំអាន ដើម្បីសុំការអត្ថាធិប្បាយពន្យល់លើករណីវិវាទនេះ ប៉ុន្តែទូរសព្ទក៏បានដាច់ទៅវិញ នៅពេលអ្នកសារព័ត៌មានវិទ្យុស្ត្រីបានណែនាំខ្លួនតាមទូរសព្ទ។
យ៉ាងណាសេចក្តីជូនដំណឹងរបស់រដ្ឋបាលខណ្ឌព្រែកព្នៅខាងលើបានបញ្ជាក់ថា កន្លងមករដ្ឋបាលខណ្ឌ សង្កាត់ធ្លាប់បានជូនដំណឹងជាបន្តបន្ទាប់ដែរ តែប្រជាពលរដ្ឋមួយចំនួនតូចមិនទាន់បានអនុវត្តតាមខ្លឹមសារ នៃសេចក្តីជូនដំណឹងរបស់រដ្ឋបាលខណ្ឌ សង្កាត់ឡើយ ដែលជាហេតុនាំឱ្យយឺតយ៉ាវប៉ះពាល់ដល់ផែនការអភិវឌ្ឍ។ ដូច្នេះ រដ្ឋបាលខណ្ឌនឹងដំណើរការជីកកាយប្រឡាយបន្ត ហើយមិនទទួលខុសត្រូវលើការខូចខាត បាត់បង់ទ្រព្យសម្បត្តិ ឬសម្ភារៈរបស់បងប្អូននោះឡើយ៕
