ភ្នំពេញ៖ នៅថ្ងៃទី១៩ ខែកុម្ភៈនេះ នាយករដ្ឋមន្រ្តីកម្ពុជា បានបង្ហាញសារព្រមានផ្លូវច្បាប់ដោយគ្មានការលើកលែងឡើយ លើជនណាដែលបំភ្លៃការពិតពីប្រទេសកម្ពុជាដែលថាកម្ពុជាជាទីតាំងមានបញ្ហាចាប់ជំរិត ធ្វើទារុណកម្មជាដើម។ ការព្រមានធ្ងន់ៗពីសំណាក់នាយករដ្ឋមន្រ្តីបែបនេះ ដើម្បីការពារផលប្រយោជន៍មុខមាត់កម្ពុជាលើឆាកអន្តរជាតិ និងដើម្បីរក្សាកំណើនអ្នកទេសចរណ៍ដែលមកលេងប្រទេសកម្ពុជាផងដែរ។
លោក កែវ សុខា ជូនសេចក្តីរាយការណ៍៖
ប្រសាសន៍នាយករដ្ឋមន្រ្តី៖«សូមព្រមានដល់អ្នកផ្សេងទៀតដែលយកប្រទេសកម្ពុជាធ្វើជាកន្លែងអាជីវកម្មយកview បែបនេះ គឺអនុវត្តច្បាប់ឱ្យម៉ឹងម៉ត់ អនុវត្តឱ្យជាប់គុកពីរឆ្នាំហើយចេញទៅបណ្តេញចេញពីកម្ពុជាហើយមិនឱ្យចូលមកកម្ពុជាអស់មួយជីវិត»។
នេះជាសាររបស់សម្តេចនាយករដ្ឋមន្រ្តី ហ៊ុន ម៉ាណែត ថ្លែងក្នុងឱកាសបើកការដ្ឋានសាងសង់ស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) នៅព្រឹកថ្ងៃទី១៩ ខែកុម្ភៈ ឆ្នាំ២០២៤នេះ។ សារព្រមានធ្ងន់ៗក្រើនរំលឹកជាថ្មីនេះ កើតឡើងបន្ទាប់ពីតុលាការខេត្តព្រះសីហនុទើបបានកាត់ទោសសម្រេចជនជាតិតៃវ៉ាន់ចំនួនពីរនាក់ឱ្យជាប់ពន្ធនាគាររយៈពេល ២ ឆ្នាំនិងពិន័យជាប្រាក់ក្នុងម្នាក់ៗ ៤ លានរៀល ចំពោះការផលិតវីដេអូប្រតិដ្ឋសម្តែងថាពួកគេត្រូវរងអំពើទារុណកម្ម កើតឡើងក្នុងក្រុងព្រះសីហនុ។
សម្តេចនាយករដ្ឋមន្រ្តី ហ៊ុន ម៉ាណែត ថ្លែងក្នុងឱកាសបើកការដ្ឋានសាងសង់ស្ពានឆ្លងទន្លេបាសាក់។រូបភាពពីហ្វេសប៊ុកសម្តេច ហ៊ុន សែន។
សម្រាប់នាយករដ្ឋមន្រ្តីកម្ពុជា ព័ត៌មានបំភ្លៃការពិតដោយបង្ខូចកេរ្តិ៍ឈ្មោះកម្ពុជាបែបនេះពុំមែនជាលើកទីមួយនោះទេ ខណៈជនដែលចង់បានផលប្រយោជន៍តាមរយៈការបំផ្លាញមុខមាត់កម្ពុជាបែបនេះ ធ្លាប់ត្រូវបានផ្តន្ទានទោសជាបន្តបន្ទាប់។ សម្តេច ហ៊ុន ម៉ាណែត ថែមទាំងបញ្ជាឱ្យដាក់ទោសធ្ងន់ៗចំពោះបុគ្គលទាំងនោះផងដែរ ដោយសម្រេចមិនអនុញ្ញាតឱ្យចូលប្រទេសកម្ពុជាតែម្តងក្រោយអនុវត្តទោសជាប់ពន្ធនាគាររួចចប់សព្វគ្រប់ហើយនោះ។
សម្តេចនាយករដ្ឋមន្រ្តី ហ៊ុន ម៉ាណែត ៖«ជាមួយអ្នកដែលប្រព្រឹត្តិខុសប៉ះពាល់កិត្តិយសកម្ពុជាយើងមានច្បាប់ធ្វើផល ទី២ព្រមានអ្នកដទៃកុំចេះតែធ្វើ ផលប្រយោជន៍ជាតិត្រូវតែការពារ។ នៅសុខៗពាក់ខោអាវល្អៗទៅជួបគេក្រៅប្រទេសថាមកពីកម្ពុជា គេថាប្រទេសអ្នកឯងសប្បូរចាប់ជំរិតច្រើន។ហើយសួរថាកម្ពុជាយើងវាអាក្រក់ចឹង គឺវាអត់ចឹង ប៉ុន្តែមនុស្សមួយចំនួនដែលមិនទទួលខុសត្រូវ យកព័ត៌មានមិនគ្រប់ជ្រុងជ្រោយទៅបំភ្លៃវាយើងខាត »។
សូមរំលឹកបន្តិចថា ជនជាតិចិនតៃវ៉ាន់ទាំង ២ នាក់ក្នុងនោះមានឈ្មោះ Chen Neng Chuan ភេទប្រុស អាយុ ៣១ ឆ្នាំ និង Lu Tsu Hsien ភេទប្រុសអាយុ ៣៤ ឆ្នាំត្រូវបានសាលាដំបូងខេត្តព្រះសីហនុកាលពីថ្ងៃទី ១៥ ខែកុម្ភៈ ឆ្នាំ ២០២៤ ចោទប្រកាន់ពី «បទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ដែលប្រព្រឹត្តនៅក្នុងភូមិ ៦ សង្កាត់លេខ ៤ ក្រុងព្រះសីហនុ ខេត្តព្រះសីហនុ កាលពីថ្ងៃទី ១៣ ខែកុម្ភៈ ឆ្នាំ ២០២៤ តាមមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ។
ជនជាតិតៃវ៉ាន់ដែលត្រូវបានកាត់ទោស។រូបភាពពីហ្វេសប៊ុក។
ការចោទប្រកាន់នេះ បន្ទាប់ពីបុគ្គលទាំង ២ ខាងលើកាលពីថ្ងៃទី ១២ ខែកុម្ភៈ បានថតសម្តែងផ្សាយផ្ទាល់ចេញពីគណនី Facebook ឈ្មោះ WA AN XIAO JI ដែលមានសកម្មភាពត្រូវបានសន្តិសុខចាប់ខ្លួន និងវាយដំស្ថិតនៅក្នុងអគារមួយ ក្នុងក្រុងព្រះសីហនុ។ បន្ទាប់មកគឺនៅថ្ងៃទី ១៣ ខែកុម្ភៈ បុគ្គលទាំងពីរខាងលើបានថតសម្តែង ផ្សាយផ្ទាល់សាជាថ្មីម្តងទៀត ចេញពីទីតាំងម្តុំឆៃណាថោន ស្ថិតក្នុងក្រុងព្រះសីហនុ ដែលមានសកម្មភាពរត់គេចខ្លួន មានការភ័យខ្លាច និងនិយាយជាភាសាចិនមានអត្ថន័យថា ខ្លួនត្រូវបានគេចាប់វាយធ្វើបាប និងស្រែកឱ្យគេជួយ។
ទាក់ទងរឿងនេះ លោក គួច ចំរើន អភិបាលខេត្តព្រះសីហនុ បានធ្វើសន្និសីទសារព័ត៌មានកាលពីថ្ងៃទី ១៥ ខែកុម្ភៈដោយលើកឡើងថា ស្ថានភាពពិតនៅក្នុងខេត្តព្រះសីហនុមិនដូចការផ្សព្វផ្សាយរបស់បុគ្គលទាំងពីរផ្សាយនោះទេ។ ប្រការនេះ លោកស្នើឱ្យទេសចរទាំងអស់ពិចារណាឱ្យបានច្បាស់លាស់លើដំណឹងជាវីដេអូណា មួយដែលបានផ្សព្វផ្សាយចេញពីខេត្តព្រះសីហនុ ខណៈមានជនមួយចំនួនមានបំណងញុះញង់ បង្កឱ្យមានស្ថានភាពវឹកវរ ធ្ងន់ធ្ងរដល់សន្តិសុខសង្គម។
សូមបញ្ជាក់ថា កាលពីខែមេសា ឆ្នាំ២០២៣ សារព័ត៌មាន BBC ដែលជាស្ថាប័នល្បីឈ្មោះមួយលំដាប់ពិភព លោក បានចុះផ្សាយ អំពីអំពើឆបោកតាមអនឡាញ និងការជួញដូរមនុស្ស ការធ្វើទារុណកម្ម ការចាប់បង្ខាំងដោយបង្ខំ ជាមួយសកម្មភាពឧក្រិដ្ឋនៅទីតាំងមួយក្នុងក្រុងព្រះសីហនុ។ តែគ្រានោះរដ្ឋបាលខេត្តព្រះសីហនុបានច្រានចោល វីដេអូជាឯកសារចេញផ្សាយដោយសារព័ត៌មាន BBCនេះ ថាជាការចោទប្រកាន់«គ្មានមូលដ្ឋាន» ។
យ៉ាងណាមន្រ្តីសង្គមស៊ីវិលនៅតែព្រួយបារម្ភរពីការប្រព្រឹត្តបទល្មើសតាមប្រព័ន្ធអនឡាញ ខណៈសហរដ្ឋអាមេ រិកកាលពីឆ្នាំ២០២២ បានទម្លាក់ចំណាត់ថ្នាក់កម្ពុជាមកកម្រិតលេខ៣ ជាកម្រិតទាបបំផុត ដោយលើកឡើងពីអំពើពុករលួយជាប្រព័ន្ធនិងការគ្មានឆន្ទៈក្នុងការបង្ក្រាបក្រុមជួញដូរមនុស្ស។
ការទម្លាក់ចំណាត់ថ្នាក់កាលណ្ណោះ ធ្វើឡើងស្របពេលនៃការចេញផ្សាយភាពយន្តឯកសារដ៏គួរឲ្យរន្ធត់រយៈពេល៤០នាទី របស់សារព័ត៌មានអាល់ចាហ្ស៊ីរ៉ា (Al Jazeera) ដែលបង្ហាញរូបភាពបុគ្គលិកបរទេសត្រូវបានគេបង្ខាំងផ្ទុយពីឆន្ទៈរបស់ពួកគេនិងរងការវាយដំដោយសារព្យាយាមរត់គេច៕
