ភ្នំពេញ៖ សាលាឧទ្ធរណ៍ត្បូងឃ្មុំ កាលពីថ្ងៃទី១៥ ខែកុម្ភៈ ឆ្នាំ២០២៤ បានតម្កល់សេចក្តីសម្រេចរបស់ខ្លួន ដោយផ្តន្ទាទោសដាក់ពន្ធនាគារចំនួន ២ ឆ្នាំ មកលើសមាជិកសហគមន៍ដីធ្លីស្រែប្រាំង នៅខេត្តត្បូងឃ្មុំចំនួន ៤ នាក់ប៉ុន្តែសម្រេចព្យួរទោសដាក់ពន្ធនាគារ។ នេះបើតាមការចុះផ្សាយដោយអង្គការលីកាដូលើទំព័រហ្វេសប៊ុកនិងគេហទំព័រនៅថ្ងៃទី១៦ ខែកុម្ភៈ ឆ្នាំ២០២៤នេះ។
បើតាម លីកាដូ អ្នកទាំង ៤ ត្រូវបានតុលាការចោទប្រកាន់ពីបទ“ធ្វើឱ្យខូចខាតដោយចេតនាមានស្ថានទម្ងន់ទោស ដោយសារការប្រព្រឹត្តមានបុគ្គលច្រើនរូបធ្វើសកម្មភាពក្នុងឋានៈជាសហចារី”។ សមាជិកសហ គមន៍ទាំង ៤ រូប គឺស្ថិតក្នុងចំណោមជនជាប់ចោទចំនួន ៩ នាក់ ដែលត្រូវបានក្រុមហ៊ុនចិន ហាម៊ូនី វីន អ៊ីនវេសមែន ខូ អិលធីឌី ចោទប្រកាន់ថា បានរារាំងគ្រឿងចក្ររបស់ក្រុមហ៊ុនមិនឱ្យឈូសឆាយដីធ្លីរបស់អ្នកទាំងនោះកាលពីឆ្នាំ ២០១៧ និង ២០២០។
រូបភាពពីហ្វេសប៊ុករបស់អង្គការលីកាដូ។
កាលណ្ណោះអ្នកទាំង៤ ត្រូវបានផ្តន្ទាទោសពីបទធ្វើឱ្យខូចខាតដោយចេតនាដោយមានស្ថានទម្ងន់ទោស និងដាក់ពន្ធនាគារចំនួន ២ ឆ្នាំ នៅពីឆ្នាំ ២០២១ ដោយសាលាដំបូងខេត្តត្បូងឃ្មុំ ។ ក្រោយមក សាលាឧទ្ធរណ៍ត្បូង ឃ្មុំ សម្រេចតម្កល់សាលក្រមសាលាដំបូងកាលពីឆ្នាំ ២០២២ ប៉ុន្តែតុលាការកំពូលកាលពីខែសីហា ឆ្នាំ ២០២៣ បានសម្រេចបញ្ជូនសំណុំរឿងនេះទៅឱ្យសាលាឧទ្ធរណ៍ជំនុំជម្រះសាជាថ្មី។
បន្ទាប់មកសាលាឧទ្ធរណ៍បានបើកសវនាការជំនុំជម្រះជាលើកទីពីរ ដោយសម្រេចតម្កល់ការផ្តន្ទាទោសសមា ជិកសហគមន៍ទាំង ៤ នាក់ និងតម្កល់ការដាក់ពន្ធនាគារចំនួន ២ ឆ្នាំដដែរ ប៉ុន្តែសម្រេចឱ្យព្យួរទោសទាំងនោះ។
សូមបញ្ជាក់ថា សមាជិកសហគមន៍ទាំងនោះរួមមាន លោក ចក់ ជ័យ អ្នកស្រី ឃឹម សុខជាង លោក ពុំ ពេជ្រ និងលោក វឿន វឿ ។ អង្គការ លីកាដូ បញ្ជាក់បន្ថែមថា សហគមន៍ស្រែប្រាំងក្នុងខេត្តត្បូងឃ្មុំ បានធ្វើសកម្មភាពតស៊ូការពារដីធ្លីរបស់ពួកគេអស់រយៈពេលជាច្រើនឆ្នាំ ជាមួយនឹងក្រុមហ៊ុន ហាម៊ូនី វីន អ៊ីនវេសមែន ដែលជាក្រុមហ៊ុនចិនចំការកៅស៊ូ។ ក្រុមហ៊ុននេះ តែងតែរារាំងអ្នកភូមិស្រែប្រាំង ដោយមិនឱ្យចូលទៅក្នុងដីស្រែរបស់អ្នកទាំងនោះ ដែលនេះបណ្តាលឱ្យមានការតវ៉ាជាច្រើនដងពីសមាជិកសហគមន៍៕
