សកម្មជនខ្មែរកម្ពុជាក្រោម លោក យ័ញ មិញក្វាង នៅថ្ងៃប្រកាសសាលក្រម នៅតុលាការវៀតណាម កាលពីថ្ងៃទី៧ កុម្ភៈ ២០២៤
តុលាការវៀតណាមបន្តផ្ដន្ទាទោសសកម្មជនសិទ្ធិមនុស្សខ្មែរកម្ពុជាក្រោមម្នាក់ទៀតដាក់ពន្ធនាគារ ៣ឆ្នាំ ៦ខែ ពាក់ព័ន្ធនឹងសកម្មភាពតស៊ូទាមទារ លទ្ធិប្រជាធិបតេយ្យ និងសិទ្ធិសេរីភាពរបស់រដ្ឋ។ ទោះយ៉ាងណា អគ្គលេខាធិការ សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ លោក សឺន ជុំជួន ចាត់ទុកសាលក្រមតុលាការវៀតណាមថា ជារឿងអយុត្តិធម៌និងជាការធ្វើទុក្ខបុកម្នេញលើជនជាតិដើម។ លោក គីម ចាន់ចាវ រាយការណ៍
តុលាការវៀតណាមបានចោទប្រកាន់សកម្មជនខ្មែរកម្ពុជាក្រោម លោក យ័ញ មិញក្វាង កាលពីថ្ងៃទី៧ កុម្ភៈ ពីបទ «កេងចំណេញលើសិទ្ធិសេរីភាពលទ្ធិប្រជាធិបតេយ្យ និងបំពានលើផលប្រយោជន៍របស់រដ្ឋ និងបទល្មើសផ្សេងទៀត។ លោកយ័ញ មិញក្វាង និងសកម្មជនខ្មែរក្រោម៣នាក់ផ្សេងទៀតត្រូវបានអាជ្ញាធរវៀតណាមចាប់ខ្លួន កាលពីចុងឆ្នាំ២០២៣។ មុនការចាប់ខ្លួន លោក យ័ញ មិញក្វាង បានប្រើប្រាស់បណ្ដាញសង្គម (Facebook) ផ្សព្វផ្សាយព័ត៌មានពីការរំលោភសិទ្ធិមនុស្សជនជាតិដើមខ្មែរក្រោម ពីសំណាក់វៀតណាមនិងផ្សព្វផ្សាយអំពីប្រវត្តិសាស្ត្រខ្មែរ។
សហព័ន្ធខ្មែរកម្ពុជាក្រោម បានបដិសេធការចោទប្រកាន់របស់តុលាការវៀតណាម។ សហព័ន្ធខ្មែរកម្ពុជាក្រោមអះអាងថា ការចាប់ខ្លួនសកម្មជនខ្មែរក្រោមដោយសារតែអាជ្ញាធរវៀតណាមមិនពេញចិត្តនឹងសកម្មភាពផ្សព្វផ្សាយសៀវភៅប្រវត្តិសាស្ត្រខ្មែរក្រោម សៀវភៅស្ដីពីសិទ្ធិជនជាតិដើម និងការបោះពុម្ពអាវយឺតដែលមានរូបទង់ជាតិខ្មែរក្រោមចែកចាយទៅឱ្យពលរដ្ឋខ្មែរក្រោមជាដើម។ បើរាប់ទាំងលោក យ័ញ មិញក្វាង រហូតដល់ពេលនេះសកម្មជនសិទ្ធិមនុស្សខ្មែរក្រោម២នាក់ហើយ ក្នុងចំណោម៤នាក់ ដែលត្រូវបានអាជ្ញាធរវៀតណាមកាត់ទោស ក្រោយការចាប់ខ្លួនកាលពីអំឡុងឆ្នាំ២០២៣។
សកម្មជនខ្មែរកម្ពុជាក្រោម លោក យ័ញ មិញក្វាង នៅថ្ងៃចាប់ខ្លួនកាលពីឆ្នាំ២០២៣
កាលពីសប្ដាហ៍មុនតុលាការវៀតណាមនៅខេត្តឃ្លាំង ក៏បានកាត់ទោស លោកស្រី ឌិញ ធី វិន អាយុ ៤៤ឆ្នាំ រស់នៅស្រុកបាយឆៅ ដាក់ពន្ធនាគារពីរឆ្នាំ ពីបទ ”មិនអនុវត្តសាលក្រម” ករណីអាជ្ញាធរវៀតណាមរឹបអូសយកដីធ្លីរបស់គាត់តាំងពីខែសីហា ឆ្នាំ២០១៦។ លោកស្រីត្រូវអាជ្ញាធរវៀតណាមចាប់យកឃុំឃាំងកាលពីខែសីហា ឆ្នាំ២០២៣ ប៉ុន្តែទើបកាត់ទោស កាលពីថ្ងៃទី២ កុម្ភៈ ឆ្នាំ២០២៤។
លោក សឺន ជុំជួន សឺន ជុំជួន អគ្គលេខាធិការ សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ បានលើកឡើងថាជាគោលការណ៍ការជំនុំជម្រះដោយយុត្តិធម៌ចាំបាច់ត្រូវផ្ដល់មេធាវីការពារក្ដីឱ្យជនជាប់ចោទ ប៉ុន្តែករណីសកម្មជនសិទ្ធិមនុស្សខ្មែរកម្ពុជាក្រោមនេះ មិនត្រូវបានតុលាការវៀតណាមផ្ដល់មេធាវីឡើយ។ លោកអះអាងថា ការចោទប្រកាន់ផ្ដន្ទាទោសលើសម្មជនខ្មែរក្រោមនេះ ជាករណីអយុត្តិធម៌ដែលផ្ទុយពីគោលការណ៍សិទ្ធិមនុស្ស។
«ការចោទប្រកាន់ទាក់ទងទៅនឹងការកេងប្រវញ្ចលទ្ធិប្រជាធិបតេយ្យរបស់រដ្ឋ ការកេងចំណេញទាក់ទងទៅនឹងសិទ្ធិសេរីភាពអីជាដើមហ្នឹង វាមានចិរកលក្ខណៈមួយដែលវាមិនអាចឆ្លើយតបទៅនឹងគោលការណ៍សិទ្ធិមនុស្ស។ ពីព្រោះថា គោលការណ៍សិទ្ធិមនុស្សយើងមិនត្រូវបានអនុញ្ញាតឱ្យមាន ច្បាប់ណាមួយដែលចែងឡើងដោយផ្ដោតការរឹតបន្តឹងសិទ្ធិសេរីភាពរបស់ប្រជាពលរដ្ឋទេ។»
សហព័ន្ធខ្មែរកម្ពុជាក្រោមអះអាងថា ពួកគេគ្រោងនឹងធ្វើរបាយការណ៍អំពីករណីនេះ ទៅកាន់អង្គការសហប្រជាជាតិដោយផ្ទាល់នៅសប្តាហ៍ក្រោយដោយរួមបញ្ចូលទាំងបញ្ហានានា ដែលក្រុមពលរដ្ឋខ្មែរកម្ពុជាក្រោមប្រឈមជាមួយអាជ្ញាធរវៀតណាម។ បន្ថែមពីនេះពួកគេកំពុងពិចារណាក្នុងការដឹកនាំបាតុកម្មអហិង្សានៅទូទាំងពិភពលោកនៅមុខស្ថានទូតវៀតណាម ដើម្បីទាមទារឲ្យរដ្ឋាភិបាលកុម្មុយនិស្តវៀតណាមដោះលែងសកម្មជនខ្មែរក្រោម សរុបបួននាក់ ដែលកំពុងជាប់ឃុំដោយសារតែការទាមទារសិទ្ធិជនជាតិដើម៕
