មនុស្សយ៉ាងហោចណាស់ ២៨ នាក់បានស្លាប់ និងមួយចំនួនបានរងរបួស ដោយសារការបំផ្ទុះគ្រាប់បែកពីរករណីផ្សេងគ្នា នៅខាងក្រៅការិយាល័យរបស់បេក្ខជនបោះឆ្នោត នៅភាគនិរតីប្រទេសប៉ាគីស្ថាន នៅថ្ងៃពុធ ទី០៧ កុម្ភៈ ឆ្នាំ២០២៤។
ការបំផ្ទុះគ្រាប់បែកពីរគ្រាប់នេះ កើតឡើងមួយថ្ងៃមុនការបោះឆ្នោតថ្នាក់ជាតិ ដែលចាប់ផ្តើមនៅព្រឹកថ្ងៃទី០៨ ខែកុម្ភៈ ឆ្នាំ២០២៤ ដែលបង្កឡើងដោយអំពើហិង្សា និងការចោទប្រកាន់ពីការក្លែងបន្លំសន្លឹកឆ្នោត ដ្បិតការវាយប្រហារនេះបានកំណត់គោលដៅការិយាល័យបោះឆ្នោតរបស់គណបក្សនយោបាយនៅក្នុងតំបន់ដែលមិនទាន់បានរៀបចំសម្រាប់ការបោះឆ្នោតនៅឡើយ។
បើតាមការចុះផ្សាយរបស់សារព័ត៌មាន ALJASEERA បានដកស្រង់ការបំភ្លឺរបស់លោក Jan Achakzai រដ្ឋមន្ត្រីក្រសួងព័ត៌មានចាំផ្ទះនៃខេត្ត Balochistan ដែលជាទីតាំងរងការវាយប្រហារ បាននិយាយថា ការបំផ្ទុះលើកដំបូងបានសម្លាប់មនុស្ស ១៦ នាក់ កើតឡើងនៅការិយាល័យរបស់បេក្ខជនបោះឆ្នោតឯករាជ្យ លោក Asfandyar Khan Kakar ក្នុងសង្កាត់ Pishin ជិតព្រំដែនជាមួយប្រទេសអាហ្វហ្គានីស្ថាន។ មនុស្សជាង ២០នាក់ត្រូវបានរាយការណ៍ថាបានរងរបួស។ លោកបានបន្តថា ការបំផ្ទុះនេះគឺជាការកែឆ្នៃគ្រឿងផ្ទុះ ដែលដាក់ជាប់នឹងម៉ូតូ។
ការផ្ទុះលើកទីពីរនៅតំបន់ Qilla Saifullah បានបំផ្ទុះនៅជិតការិយាល័យរបស់គណបក្ស Jamiat Ulema Islam (JUI) ដែលជាគណបក្សសាសនាដែលពីមុនជាគោលដៅនៃការវាយប្រហារ។ លោករដ្ឋមន្ត្រី Achakzai បាននិយាយថា យ៉ាងហោចណាស់មនុស្ស ១២នាក់បានស្លាប់នៅក្នុងការវាយប្រហារនេះ និងជាច្រើននាក់ទៀតបានរងរបួស។
សូមជម្រាបថា ឧប្បត្តិហេតុសន្តិសុខជាច្រើនបានកើតឡើង នៅក្នុងដំណើរការរៀបចំការបោះឆ្នោត ហើយយ៉ាងហោចណាស់បេក្ខជនពីរនាក់ ត្រូវបានបាញ់សម្លាប់ និងមួយចំនួនទៀតជាគោលដៅក្នុងការវាយប្រហារនៅទូទាំងប្រទេសប៉ាគីស្ថាន ។ ឆ្លើយតបនឹងស្ថានភាពអសន្តិសុខនេះ មន្ត្រីសន្តិសុខជាងកន្លះលាននាក់ ត្រូវបានដាក់ពង្រាយនៅមុនការបោះឆ្នោតនៅថ្ងៃព្រហស្បតិ៍ ទី០៨ ខែកុម្ភៈនេះ៕
