កូនគំរាមសម្រាលមិនគ្រប់ខែគឺជាការសម្រាលកូនមុនកំណត់ មុន ៣៧ សប្តាហ៍នៃគភ៌។ វាកើតឡើងមានលើស្ត្រីកំពុងពរពោះ ហើយវាអាចបង្កគ្រោះថ្នាក់ទៅដល់សុខភាពរបស់ម្តាយ និងទារក។
កត្តាដែលបណ្តាលឱ្យកូនគំរាមកើតមិនគ្រប់ខែមាន រលាកប្លោកនោម រលាកមាត់ស្បូន ការក្លាយរោគ ការជក់បារី និងពិសារគ្រឿងស្រវឹង ការលើស ឬស្រកទម្ងន់ខ្លាំងក្នុងអំឡុងពេលមានផ្ទៃពោះ ម្តាយមានបញ្ហាសុខភាព មានផ្ទៃពោះកូនភ្លោះឬច្រើន មានទឹកភ្លោះច្រើន មានផ្ទៃពោះញឹកពេក មានប្រវត្តិកើតកូនមិនគ្រប់ខែ ឬគំរាមកើតមុនខែ ពិនិត្យសុខភាពមិនបានទៀតទាត់ ការប្រើប្រាស់ថ្នាំដោយគ្មានវេជ្ជបញ្ជាត្រឹមត្រូវ និងការធ្វើការងារច្រើនហួសកម្លាំង។ នេះដោយយោងតាមការលើកឡើងរបស់ទំព័រហ្វេសប៊ុកមន្ទីរពេទ្យ កាល់ម៉ែត។
ចំពោះរោគសញ្ញានៃជំងឺ ជាទូទៅកូនគំរាមកើតមិនគ្រប់ខែ អាចស្តែងចេញជារោគសញ្ញាដូចជា ស្បូនកន្ត្រាក់ចង្កោងរឹង (ធ្វើឱ្យមានអារម្មណ៍រឹងនៅត្រង់ផ្ទៃពោះ) រោយចង្កេះ និងណែនធ្ងន់លើថ្ងាសក្រោមពោះ លីងចង្កេះ មានទឹករំអិលធ្លាក់មកជួនកាលមានលាយឈាមប្រាលៗខុសពីធម្មតា។
កូនគំរាមសម្រាលមិនគ្រប់ខែមានផលប៉ះពាល់ និងបញ្ហាប្រឈមរួមមាន ទារកអាចស្លាប់ សុខភាពកូនមិនល្អ មានបញ្ហាសម្រាប់ការលូតលាស់របស់ទារក (ប្រព័ន្ធផ្លូវដង្ហើម ប្រព័ន្ធរំលាយអាហារ ការលូតលាស់ខួរក្បាល ) ហើយម្តាយអាចប្រឈមមុខនឹងសម្រាលមិនគ្រប់ខែសម្រាប់គហ៌លើកក្រោយទៀត រួមទាំងបញ្ហាផ្លូវចិត្ត (ក្តីបារម្មណ៍ចំពោះទារក)ជាដើម។
សម្រាប់វិធីការពារវិញ យើងអាចការពារបានដោយ ពិនិត្យ និងតាមដានផ្ទៃពោះឱ្យបានទៀងទាត់ កុំធ្វើការងារធ្ងន់ និងហួសកំលាំង ហាមធ្វើដំណើរផ្លូវឆ្ងាយញឹកញាប់ក្នុងអំឡុងពេលមានផ្ទៃពោះ ពុំគួរមានកូនច្រើនញឹកញាប់ ជៀសវាងការរំលូតកូនដោយគ្មានបច្ចេកទេសត្រឹមត្រូវ។
ប្រភពមន្ទីរពេទ្យកាល់ម៉ែតបានឱ្យដឹងដែរថា ប្រសិនបើស្រ្តីមានអាការៈមិនប្រក្រតីគួរតែឆាប់រួសរាន់មកពិនិត្យផ្ទៃពោះ ដើម្បីស្វែងរកសញ្ញាគ្រោះថ្នាក់ដែលមាន ហើយអាចធ្វើការព្យាបាល ឬអន្តរាគមន៍វេជ្ជសាស្ត្រទាន់ពេលវេលា ប្រកបដោយសុវត្ថិភាពទាំងមាតា និងទារក៕
អត្ថបទ៖ចាន់រ៉ាត់ សៀវមិញ
