សកម្មភាពបោសសម្អាតមីនរបស់ក្រុមការងារអង្គភាពស៊ីម៉ាក់នៅស្រុកវាលវែង ខេត្តពោធិ៍សាត់។ រូបភាព៖ អង្គភាពស៊ីម៉ាក់
ភ្នំពេញ៖ មជ្ឈមណ្ឌលសកម្មភាពកំចាត់មីនកម្ពុជា(CMAC) រកឃើញគ្រាប់មីនមិនទាន់ផ្ទុះចំនួន១០០គ្រាប់ នៅវាលវែង ខេត្តពោធិ៍សាត់ ដែលជាតំបន់ពលរដ្ឋគ្រោងនឹងសង់លំនៅឋាន ហើយបច្ចប្បន្កំពុងបន្តប្រតិបត្តិការរបស់ខ្លួន ដោយបោសសម្អាតគ្រាប់មីនចេញពីដីទាំងនោះ និងបានណែនាំឱ្យពលរដ្ឋផ្អាកដំណើរការសាងសង់ជាបណ្តោះអាសន្ន។ ការរកឃើញនេះកើតឡើងអំឡុងពេលអង្គភាពស៊ីម៉ាក់ ចុះបើកផ្លូវសុវត្ថិភាពនៅតំបន់ទាំងនោះ បន្ទាប់ពីទទួលដំណឹងថាមានប្រជាពលរដ្ឋគ្រោងនឹងសាងសង់លំនៅឋាន។
ករណីនេះ អង្គភាពស៊ីម៉ាក់អាចចាត់ទុកតំបន់នោះថាជា«ចម្ការមីន»។ ជាចម្ការមីនព្រោះថា នៅថ្ងៃទី៣១ ខែមករា ឆ្នាំ២០២៤កន្លងទៅ ជុំវិញតំបន់ដែលពលរដ្ឋគ្រោងនឹងអភិវឌ្ឍសង់លំនៅដ្ឋានមានទីតាំងនៅស្រុកវាលវែង មានករណីកម្មករដាក់ឥដ្ឋចំនួន ៣នាក់បានរងរបួសខណៈពេលពួកគេដាក់ឥដ្ឋចំពីលើគ្រាប់មីនដែលបង្កឱ្យផ្ទុះ។
ជុំវិញបញ្ហា នៅតែបន្តរកឃើញគ្រាប់មីន អង្គភាពស៊ីម៉ាក់បង្ហាញការព្រួយបារម្ភទៅលើសុវត្ថិភាពប្រជាពលរដ្ឋតាមរយៈការភ្ជាប់ខ្លឹមសារការជូនដំណឹងអំពីលទ្ធផលរកឃើញគ្រាប់មីន ស្រុកវាលវែង ខេត្តពោធិ៍សាត់នេះថា«ចុះបើដីអភិវឌ្ឍន៍នោះមានដីរាប់រយហិកតា ស្ថិតនៅចំលើប្លង់ចម្ការមីនតែម្តងបែបនេះ មានន័យថានៅមានគ្រាប់មីនច្រើនណាស់នៅសេសសល់នៅតែអាចបង្កគ្រោះថ្នាក់គ្រប់ពេលវេលាកំលុងពេលកំពុងអភិវឌ្ឍនិងការប្រើប្រាស់ដីតំបន់នោះយូរអង្វែងតទៅប្រសិនជាគ្មានការបោសសម្អាតគ្រាប់មីនចេញទេនោះ។»
នៅអំឡុងឆ្នាំ២០២៣ មានជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមមានចំនួន ៣២នាក់ ក្នុងនោះមានអ្នកស្លាប់ចំនួន ៤នាក់ រងរបួស ១៨នាក់ និងពិការអវយវៈ ១០នាក់ ហើយជនរងគ្រោះភាគច្រើនបានកើតឡើងនៅក្នុងខេត្តបន្ទាយមានជ័យខេត្តឧត្តរមានជ័យ ខេត្តបាត់ដំបង និងខេត្តរតនគិរី។ យ៉ាងណាមិញចំនួននៃជនរងគ្រោះដោយសារមីនឆ្នាំ២០២៣ ថយចុះ ២២ភាគរយ បើប្រៀបធៀបនឹងឆ្នាំ២០២២ ដែលមានជនរងគ្រោះចំនួន ៤១នាក់។ នេះបើផ្អែកតាមរបាយការណ៍របស់អាជ្ញាធរមីន៕
