លោក នី ណាក់ អ្នកជំនាញផ្នែកកសិកម្ម និងជាសកម្មជនសង្គម។រូបភាព៖ បណ្តាញសង្គមហ្វេសប៊ុកឈ្មោះ IMan-KH។
ភ្នំពេញ៖ លោក នី ណាក់ សកម្មជនមួយរូបហ៊ានរិះគន់រឿងរ៉ាវសង្គម ត្រូវបានអគ្គនាយកដ្ឋាពន្ធធនាគារបញ្ចូនខ្លួនពីពន្ធធនាគារព្រៃស រាជធានីភ្នំពេញ ទៅបន្តឃុំឃាំងនៅពន្ធធនាគារត្រពាំងថ្លុង ខេត្តត្បូងឃ្មុំ ដែលមានទីតាំងស្ថិតជាប់ព្រំដែនវៀតណាម។ ភរិយាលោក នី ណាក់ សម្តែងក្តីបារម្ភជុំវិញករណីនេះ ហើយអ្នកស្រីបន្តស្នើសុំឱ្យស្ថាប័នពាក់ព័ន្ធ និងបណ្តាអង្គការសង្គមស៊ីវិលចូលរួមតាមដានសំណុំរឿងស្វាមីរបស់ខ្លួន។
កញ្ញា គុជ ស៊ីកុល រាយការណ៍
តាមរយៈបណ្តាញសង្គមឈ្មោះIman-KH ដែលបច្ចប្បន្នអ្នកស្រី សុខ ស៊ីណេត ភរិយាសកម្មជនសង្គម លោកនី ណាក់ ជាអ្នកប្រើប្រាស់បន្ទាប់ពីលោកត្រូវបានតុលាការសម្រេចឱ្យឃុំខ្លួនបណ្តោះអាសន្ន បង្ហាញថានៅថ្ងៃទី៣០ ខែមករា ឆ្នាំ២០២៤ លោក នី ណាក់ត្រូវបានអគ្គនាយកដ្ឋានពន្ធធនាគារបញ្ជូនខ្លួន ទៅបន្តឃុំឃាំងនៅពន្ធធនាគារត្រពាំងថ្លុង ឬហៅថាមណ្ឌលអប់រំកែប្រែទី៣ មានទីតាំងស្ថិតនៅខេត្តត្បូងឃ្មុំ។
ទាក់ទងករណីបញ្ជូនលោកនី ណាក់ ទៅពន្ធធនាគារត្រពាំងថ្លុងនេះ បណ្តាលឱ្យមានការងឿងឆ្ងល់ និងសាធារណជនមួយចំនួននៅតែទន្ទឹងរង់ចាំលទ្ធផលបន្តនៃសំណុំរឿងសកម្មជនហ៊ានរិះគន់រដ្ឋាភិបាលរូបនេះនៅឡើយ។
ជាការឆ្លើយតបលោក នុត សវនា អ្នកនាំពាក្យអគ្គនាយកដ្ឋានពន្ធធនាគារនៃក្រសួងមហាផ្ទៃ ប្រាប់វិទ្យុស្រ្តីនៅថ្ងៃទី១ ខែកុម្ភៈ ឆ្នាំ២០២៤នេះថា ការបញ្ជូនខ្លួនលោក នី ណាក់ នេះមិនជាករណីថ្មីឡើយ។ លោកបញ្ជាក់ពីមូលហេតុថា ករណីនេះដូចទៅនឹងទណ្ឌិតដទៃទៀតទេ ដោយហេតុថាស្ថានភាពពន្ធធនាគារព្រៃស នៅរាជធានីភ្នំពេញមានសភាពចង្អៀតណែន ដោយហេតុថាមានកំណើនជនជាប់ឃុំ។ ដូចនេះខាងពន្ធធនាគារត្រូវបញ្ជូនអ្នកទោស និងអ្នកជាប់ឃុំឃាំងមួយចំនួនទៀតទៅពន្ធធនាគារផ្សេងៗ ហើយលោកនី ណាក់ ក៏ត្រូវបានបញ្ជូនទៅធនាគារត្រពាំងថ្លុង ខេត្តត្បូងឃ្មុំផងដែរ។
«ពាក់ព័ន្ធនឹងហេតុផលដែលអគ្គនាយកដ្ឋាពន្ធធនាគារបានសម្រេចបញ្ជូនគាត់(លោក នី ណាក់) ទៅពន្ធធនាគារទៅត្រពាំងថ្លុង ឬយើងហៅថាមណ្ឌលអប់រំកែប្រែទី៣នេះ មិនមែនហេតុផលអីប្លែកពីហេតុផលក្រៅពីកត្តាបច្ចេកទេសទេ គឺដោយសារនៅមណ្ឌលអប់រំកែប្រែទី១(ពន្ធធនាគារព្រៃស) បច្ចប្បន្នហ្នឹងចំនួនជនជាប់ឃុំមានកំណើនខ្ពស់ដល់ចឹងប្រសិនបើយើងអត់បញ្ចេញអ្នកផ្សេងដើម្បីសម្រួលអ្នកចូលថ្មីទេអាហ្នឹងបញ្ហាចង្អៀតណែនហ្នឹងវានៅកកកុញហ្នឹងវាប៉ះពាល់សុខភាព ប៉ះពាល់ដល់បញ្ហាសន្តិសុខ សុវត្ថិភាពរបស់ជនជាប់ឃុំក៏ដូចជាមន្រ្តីយើង អ៊ីចឹងយើងត្រូវលៃលកធ្វើមិញផ្ទេរចេញមួយចំនួនទៅជាបន្តបន្ទាប់ទៅណាស់ អ៊ីចឹងហេតុផលអត់មានអីផ្សេងក្រៅពីហ្នឹងទេបាទអរគុណ។»
លោក នុត សវនា អ្នកនាំពាក្យអគ្គនាយកដ្ឋានពន្ធធនាគារនៃក្រសួងមហាផ្ទៃ។ រូបភាព៖ តាមរយៈគេហទំព័រ។
យ៉ាងណាមិញ ភរិយារបស់លោក អ្នកស្រី សុខ ស៊ីណេត សព្វថ្ងៃកំពុងទទួលបន្ទុកចិញ្ចឹមកូន២នាក់ និងរ៉ាប់រងអាជីវកម្មពាក់ព័ន្ធនឹងវិស័យកសិកម្ម បង្ហាញក្តីព្រួយបារម្ភចំពោះសុខភាពស្វាមី ដោយអ្នកស្រីភ្ជាប់សំណេរដើម ជាមួយនឹងខ្លឹមសារជូនដំណឹងពីការបញ្ជូនខ្លួនស្វាមីទៅកាន់ពន្ធធនាគារផ្សេង។
អ្នកស្រីលើកឡើងក្នុងសំណេរដើមថា«សូមជំរាបជូនដំណឹង ដល់សាធារណជនឲ្យបានជ្រាបថា ប្តីនាងខ្ញុំ នី ណាក់ ត្រូវបានបញ្ជូនខ្លួន ចេញ ពីម១ ព្រៃស ទៅ ម៣ ត្រពាំងថ្លុង ហើយកាលពីថ្ងៃសៅរ៍ តាមមន្ត្រីនៅម១ប្រាប់នាងខ្ញុំ កាលពីព្រឹកមិញ ពេលដែលនាងខ្ញុំទៅសួរសុខទុក្ខគាត់។ ពេលនេះមិនទាន់ដឹងថា សុខទុក្ខគាត់យ៉ាងណាឡើយ។ សូមសាធារណជន និង អង្គការសង្គមស៊ីវិលមេត្តាជួយតាមដានរឿងប្តីនាងខ្ញុំផង»។
តាមការឱ្យដឹងពីលោក នុត សវនា ដដែល គូសបញ្ជាក់ថាតាមគោលការណ៍នៃអគ្គនាយកដ្ឋានពន្ធធនាគារ សាច់ញាត្តិ និងភាគីពាក់ព័ន្ធនានា មានសិទ្ធិក្នុងការចូលសួរសុខទុក្ខអ្នកទោសដែលជាប់ឃុំឃាំងនៅពន្ធធនាគារនីមួយៗ។ ក្នុងនោះចំពោះករណីលោក នី ណាក់ កន្លងមកខាងពន្ធធនាគារសង្កេតឃើញថាមានតែភរិយារបស់លោកតែប៉ុណ្ណោះ ទៅជួបសួរនាំសុខទុក្ខលោក ក្រៅពីនេះមិនទាន់ឃើញមានស្ថាប័ន និងអង្គការសង្គមស៊ីវិលណាមួយទៅជួបលោកនោះទេ។
«បាទ!តាមខ្ញុំក្តាបបានមានតែប្រពន្ធគាត់ទេដែលទៅសួរ សុខទុក្ខផ្ទាល់ហើយយើងតែងតែអនុញ្ញាតឱ្យពួកគាត់បានជុំគ្នា ហើយគាត់មានការសន្ទនាគ្នា ហើយផ្ញើរឥវ៉ាន់អីហ្នឹង ថ្ងៃមុននៅមណ្ឌលអប់រំកែប្រែទី៣ហ្នឹងក៏ប្រពន្ធគាត់បានទៅដល់ផ្ទាល់ដែរបាទ ចំពោះអង្គការផ្សេងៗហ្នឹងដូចជាអត់មានអ្នកណាទៅទេបើតាមខ្ញុំដឹងទេណាស់បាទ ទាល់ទេខ្ញុំសួរថែមបើតាមខ្ញុំដឹងដូចជាគ្មានអ្នកណាគេទៅទេបាទ។»
កាលពីកន្លងទៅ អ្នកស្រី សុខ ស៊ីណែត ធ្លាប់រៀបរាប់ថា អ្នកស្រីបានជួបស្វាមីនៅពន្ធនាគារព្រៃស ហើយអ្នកស្រីពាំនាំពាក្យសម្តីដែលស្វាមីបានផ្តាំផ្ញើថា ខ្លួនមានការសោកស្តាយ និងដឹងនូវកំហុស ដែលបានយក ពត៌មានពីសារពត៌មានក្រៅស្រុកយកមកផុសក្នុងបណ្តាញសង្គមហ្វេសប៊ុក ដោយគ្មានមូលដ្ឋានច្បាស់លាស់ និងមិនបានស្រាវជាវជាមុន។ ប៉ុន្តែក្រោយមក អ្នកស្រីអះអាងថា ស្វាមីរបស់អ្នកស្រីបានប្តូរជំហរវិញ ដោយនៅថ្ងៃទី២៣ ខែមករា ឆ្នាំ២០២៤ នៅលើបណ្តាញសង្គមហ្វេសប៊ុកឈ្មោះIman-KH ផ្សព្វផ្សាយព័ត៌មានថា «សូមប្រកាស ខ្ញុំបាទមិនធ្វើការសុំទោស ដើម្បីជាថ្នូរនឹងការមានសេរីភាពឡើយ។ ខ្ញុំបាទនៅតែបន្តធ្វើការតស៊ូមតិ និងសុខចិត្តជាប់ឃុំរហូតដល់រួចទោសជាស្ថាពរ»។សូមបញ្ជាក់ថា ការចេញ វីដេអូរបស់ភរិយាខ្ញុំបាទ មិនបានឆ្លុះបញ្ចាំង ពី ជំហរ របស់ខ្ញុំឡើយ។»
ការចាប់ខ្លួន លោក នី ណាក់ កើតឡើងនៅថ្ងៃទី៦ ខែមករា ឆ្នាំ២០២៤ បន្ទាប់ពីលោកបង្ហាញទស្សនៈជុំវិញព័ត៌មានដែលចេញផ្សាយពីករណីរដ្ឋាភិបាលសម្រេចកាត់ដី ៩១ហិកតារ នៅខេត្តកំពត ឱ្យឈ្មោះ ហេង សួរ ហើយស្ថាប័នសារព័ត៌មានដែលមានមូលដ្ឋាននៅក្រៅស្រុកមួយចំនួនដូចជាខេមបូឌៀ ដេលី (Cambodia Daily) និងអាស៊ីសេរីថាឈ្មោះនេះ ជាលោក ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ។ លោក នី ណាក់ បញ្ចេញមតិក្នុងសំណេរលើហ្វេសប៊ុកឈ្មោះ Iman Kh ដោយលោក សរសេររិះគន់ជុំវិញព័ត៌មាននេះ ហើយលោកមិនបានបញ្ជាក់ថា ជាលោក ហេង សួរ ជារដ្ឋមន្ត្រីក្រសួងការងារទេ ប៉ុន្តែអត្ថបទនេះត្រូវបានរដ្ឋមន្ត្រីក្រសួងការងារចាត់ទុកជាករណីខ្លួន ហើយប្ដឹងលោក នី ណាក់ ទៅតុលាការ៕
