នាវាចាប់មីស៊ីល នៅសមុត្រក្រហមរបស់អាមេរិក។ រូបភាពពី សារព័ត៌មានAFP
យោធាអាមេរិកបានប្រកាសកាលពីថ្ងៃពុធថា កងកម្លាំងរបស់ខ្លួនបានធ្វើការវាយប្រហារលើមីស៊ីល ចំនួន ១៤គ្រាប់របស់ក្រុមHouthi ដែលត្រូវបានផ្ទុកដើម្បីបាញ់ចេញពីប្រទេសយេម៉ែន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៨ ខែមករា ឆ្នាំ២០២៤។
ទីបញ្ជាការកណ្តាលនៃកងទ័ពសហរដ្ឋអាមេរិកបាននិយាយនៅក្នុងសេចក្តីថ្លែងការណ៍មួយដែលបានបង្ហោះនៅលើប្រព័ន្ធផ្សព្វផ្សាយសង្គម X ថា កាំជ្រួច Houthi បានបង្ហាញពីការគំរាមកំហែងដល់កប៉ាល់ពាណិជ្ជករ និងនាវាកងទ័ពជើងទឹកសហរដ្ឋអាមេរិកនៅក្នុងតំបន់។
បញ្ជាការដ្ឋានកណ្តាលកងទ័ពអាមេរិកបន្តថា “មីស៊ីលទាំងនេះនៅលើផ្លូវរថភ្លើង បានបង្ហាញពីការគំរាមកំហែងជិតមកដល់ចំពោះនាវាពាណិជ្ជករ និងនាវាកងទ័ពជើងទឹកសហរដ្ឋអាមេរិកនៅក្នុងតំបន់ ហើយអាចត្រូវបានបាញ់នៅពេលណាក៏បាន ដែលជំរុញឱ្យកងកម្លាំងសហរដ្ឋអាមេរិកអនុវត្តសិទ្ធិ និងកាតព្វកិច្ចរបស់ពួកគេដើម្បីការពារខ្លួន” ។
ចំណែកក្រុម Houthi បានអះអាងថាការវាយប្រហាររបស់ខ្លួន បង្ហាញសាមគ្គីភាពជាមួយ ប្រជាជនប៉ាឡេស្ទីន ក្នុងតំបន់ហ្កាហ្សា ដោយនឹងបន្តការវាយប្រហាររហូតអ៊ីស្ត្រាអែលបញ្ឈប់សង្រ្គាមប្រឆាំងនឹងក្រុមហាម៉ាស ខណៈដែលសហរដ្ឋអាមេរិក បានបង្កើតក្រុមអន្តរជាតិចម្រុះ ដើម្បីការពារសន្តិសុខ និងទប់ស្កាត់ការវាយប្រហាររបស់ក្រុមឧទាមហ៊ូទី នៅសមុទ្រក្រហម។ យ៉ាងណា ក្រុម Houthi បានព្រលយសារថា នឹងពង្រីកការវាយប្រហាររបស់ខ្លួន ហើយក៏នឹងវាយប្រហារតបនឹងវិធានការតាមរយៈនាវាចម្បាំងរបស់អាមេរិក និងសម្ព័ន្ធមិត្តផងដែរ។
ក្រុមយុទ្ធជន និងកុលសម្ព័ន្ធ Houthi ប្រមូលផ្តុំប្រឆាំងអាមេរិក និងចក្រភពអង់គ្លេស វាយប្រហារលើទីតាំងយោធាដែលគ្រប់គ្រងដោយ Houthi ក្បែរក្រុង Sanaa ប្រទេសយេម៉ែន កាលពីថ្ងៃអាទិត្យ ទី១៤ ខែមករា ឆ្នាំ២០២៤។ ប្រភពពីសារព័ត៌មាន AP
កន្លងមក អង្គការសហប្រជាជាតិធ្លាប់បានសម្ដែងក្ដីព្រួយបារម្ភយ៉ាងខ្លាំងចំពោះស្ថានការណ៍នៅក្នុងតំបន់សមុទ្រក្រហម ហើយក្រុមប្រឹក្សាសន្តិសុខសហប្រជាជាតិ ស្នើឱ្យក្រុមហ៊ូទី បញ្ឈប់ការវាយប្រហារនាវាពាណិជ្ជកម្មក្នុងសមុទ្រក្រហមជាបន្ទាន់ ដ្បិតការវាយប្រហារគ្នានេះ មិនត្រឹមតែនៅក្នុងតំបន់ទេ តែជះផលប៉ះពាល់ដល់ ពាណិជ្ជកម្មពិភពលោកតែម្ដង៕
