ការបាញ់សាកល្បងមីស៊ីលកម្រិតមធ្យមថ្មី ដែលល្បឿនលឿនជាងសំឡេង បច្ចេកវិទ្យាឥន្ធនៈរឹង។ ប្រភពរូបភាពទីភ្នាក់ងារសារព័ត៌មានកូរ៉េខាងជើង KCNA

ក្រសួងការបរទេសកូរ៉េខាងត្បូងបានប្រកាសនៅថ្ងៃពុធនេះថា ប្រទេសកូរ៉េខាងត្បូងបានដាក់ទណ្ឌកម្មបុគ្គលពីរនាក់ អង្គភាពចំនួន៣ និងនាវាចំនួន១១គ្រឿង ដែលជាប់ពាក់ព័ន្ធទៅនឹងកម្មវិធីនុយក្លេអ៊ែរ និងមីស៊ីលរបស់កូរ៉េខាងជើង។ គោលដៅដែលបានដាក់ក្នុងបញ្ជីខ្មៅថ្មីនេះ ភាគច្រើនជាប់ពាក់ព័ន្ធនឹងការរត់ពន្ធថាមពលខុសច្បាប់នៅសមុទ្រ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៧ ខែមករា ឆ្នាំ២០២៤។

ការប្រកាសដាក់ទណ្ឌកម្មនេះ ធ្វើឡើងប៉ុន្មានថ្ងៃប៉ុណ្ណោះបន្ទាប់ពី កូរ៉េខាងជើងបានបាញ់មីស៊ីលកម្រិតមធ្យមថ្មីមួយ ដែលជាមីស៊ីលល្បឿនលឿនជាងសំឡេង បច្ចេកវិទ្យាឥន្ធនៈរឹង ដែលកូរ៉េខាងត្បូង និងសហរដ្ឋអាមេរិកបានថ្កោលទោសយ៉ាងខ្លាំងថាជាការរំលោភយ៉ាងធ្ងន់ធ្ងរលើដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ។

ប្រឈមមុខនឹងការជាប់គាំងនៅអង្គការសហប្រជាជាតិ រដ្ឋាភិបាលទីក្រុងសេអ៊ូលបានងាកទៅរកការដាក់ទណ្ឌកម្មលើទីក្រុងព្យុងយ៉ាងដោយឯករាជ្យ ឬរួមគ្នាជាមួយអាមេរិក និងជប៉ុន ដោយស្វែងរកការរួបរួមមូលនិធិរវាងប្រទេសទាំង៣។ បេសកជននុយក្លេអ៊ែររបស់ ជប៉ុន សហរដ្ឋអាមេរិក និងកូរ៉េខាងត្បូង គ្រោងនឹងជួបពិភាក្សាគ្នានៅទីក្រុងសេអ៊ូល នៅថ្ងៃព្រហស្បតិ៍ សប្តាហ៍នេះ៕