មេដឹកនាំមីយ៉ាន់ម៉ា លោក Min Aung Hlaing បានក្លាយជាសហប្រធានក្នុងកិច្ចប្រជុំកំពូលថ្នាក់តំបន់ស្តីពីកិច្ចសហប្រតិបត្តិការមេគង្គ-ឡានឆាងលើកទី៤ ដែលធ្វើឡើងតាមរយៈប្រព័ន្ធវីដេអូអនឡាញ កាលពីថ្ងៃចន្ទ ទី២៥ ខែធ្នូ ឆ្នាំ២០២៣។ នេះបើយោងតាមសារព័ត៌មាន Nikkei Asia ចុះផ្សាយកាលពីថ្ងៃពុធ ទី២៧ ខែធ្នូ ឆ្នាំ២០២៣។
ឆ្លៀតក្នុងឱកាសនៃកិច្ចប្រជុំនេះ មេដឹកនាំយោធាមីយ៉ាន់ម៉ារូបនេះ បានជំរុញឱ្យប្រទេសស្ថិតក្នុងមេគង្គ-ឡានឆាងទាំងអស់ជួយគ្នាទៅវិញទៅមក ក្រោមនីតិវិធីកិច្ចសហប្រតិបត្តិការមេគង្គ-ឡានឆាង ដោយអំពាវនាវឱ្យពន្លឿនការអនុវត្ត និងរៀបចំផែនការធ្វើឱ្យទំនាក់ទំនងកាន់តែស៊ីជម្រៅក្នុងចំណោមប្រទេសជាសមាជិក។
ទោះបីជាលោក Min Aung Hlaing បានធ្វើជាសហម្ចាស់ផ្ទះនៃកិច្ចប្រជុំនេះក៏ដោយ ក៏ទីក្រុងប៉េកាំងបានបដិសេធសំណើរដដែលៗរបស់លោក ក្នុងការធ្វើទស្សនកិច្ចផ្លូវការទៅកាន់ប្រទេសចិនផងដែរ។ លោក Min Aung Hlaing ក៏ត្រូវបានដកចេញពីកិច្ចប្រជុំកំពូលនៃសមាគមសម្រាប់ប្រជាជាតិអាស៊ីអាគ្នេយ៍(អាស៊ាន)ជារឿយៗ បន្ទាប់ពីមីយ៉ាន់ម៉ាមិនមានចំណាត់ការណាមួយជុំវិញបញ្ហាជម្លោះផ្ទៃក្នុងរបស់ខ្លួន។
គួរបញ្ជាក់ថា កិច្ចប្រជុំកំពូលនេះ ធ្វើឡើងដើម្បីសម្រេចអនុម័តសេចក្តីប្រកាសក្រុងណៃពិដោ សម្រាប់សមាជិកទាំងប្រាំមួយ ដើម្បីដោះស្រាយបញ្ហាប្រឈមរួមគ្នា។ ក្នុងនោះ ប្រទេសទាំងប្រាំមួយមានដូចជា ចិន មីយ៉ាន់ម៉ា ថៃ ឡាវ វៀតណាម និងកម្ពុជា បានយល់ព្រមលើកិច្ចសហប្រតិបត្តិការលើវិស័យហេដ្ឋារចនាសម្ព័ន្ធ កសិកម្ម និងខ្សែសង្វាក់ផ្គត់ផ្គង់។
ជាមួយគ្នានេះ កិច្ចប្រជុំស្តីពីកិច្ចសហប្រតិបត្តិការមេគង្គ-ឡានឆាងលើកទី៤ ឆ្នាំ២០២៣នេះ មានទស្សនៈផ្លាស់ប្តូរផ្នត់គំនិតផ្តួចផ្តើមខ្សែក្រវ៉ាត់និងផ្លូវឆ្លងព្រំដែនរបស់ប្រទេសចិន បញ្ហាការប្រែប្រួលអាកាសធាតុ និងការឆ្លើយតបទៅនឹងឧក្រិដ្ឋកម្មតាមប្រព័ន្ធអ៊ីនធឺណិត។ នេះបើយោងតាមសេចក្តីសង្ខេបនៃកិច្ចប្រជុំកាលពីថ្ងៃចន្ទ ទី២៥ ខែធ្នូ ឆ្នាំ២០២៣៕
ប្រភព៖ Nikkei Asia ចុះពុធ ទី២៧ ខែធ្នូ ឆ្នាំ២០២៣
