ក្រោយបើកសវនាការជំនុំជម្រះលើបណ្ដឹងសារទុក្ខស្នើសុំដោះលែងឱ្យមានសេរីភាពក្នុងសំណុំរឿងទី១របស់ លោក ថាច់ សេដ្ឋា អនុប្រធានគណបក្សភ្លើងទៀន ១សប្តាហ៍ តុលាការកំពូលបានប្រកាសសាដីកាបដិសេធនៅព្រឹកថ្ងៃទី២២ ខែធ្នូនេះ។ លោក គីម ចាន់ចាវ រាយការណ៍
លោក ថាច់ សេដ្ឋា អនុប្រធានគណបក្សភ្លើងទៀន ទទួលបានចម្លើយអវិជ្ជមានពីតុលាការកំពូល ដោយតុលាការកំពូល បដិសេធបណ្ដឹងសុំនៅក្រៅឃុំ ទោះលោកលើកហេតុផលថាកំពុងឈឺធ្ងន់ និងត្រូវការព្យាបាលជាចាំបាច់យ៉ាងណាក្ដី ។ ដ្បិតថានៅថ្ងៃទី២២ ខែធ្នូ ឆ្នាំ២០២៣ តុលាការកំពូល ប្រកាសសាលដីកាកំណត់ឲ្យលោកជាប់ឃុំដដែល។
ក្នុងពេលប្រកាសសាដីកាព្រឹកនេះមានការចូលរួមឃ្លាំមើលពីមន្ត្រីឧត្តមស្នងការអង្គការសហប្រជាជាតិប្រចាំនៅកម្ពុជា មន្ត្រីស្ថានទូតសហភាពអឺរ៉ុប និងអង្គការលីកាដូ (Licadho) ។ បន្ថែមពីនេះ ក៏មានការចូលពីសកម្មជនគណបក្សភ្លើងទៀន សហគមន៍ដីធ្លី ភរិយាសាច់ញាតិលោកថាច់ សេដ្ឋា ផងដែរ។
ប្រធានអង្គជំនុំជម្រះនៃតុលាការកំពូលលោក និល ណុន បានសម្រេចតម្កល់សាលដីការបស់សាលាឧទ្ធរណ៍ទុកជាបានការដដែល ដោយអះអាងថា ការសម្រេចរបស់សាលាឧទ្ធរណ៍លើសំណុំរឿងជារឿងត្រឹមត្រូវ។
តុលាការកំពូលបានបើកសវនាការជំនុំជម្រះលើបណ្ដឹងសារទុក្ខស្នើសុំដោះលែងឱ្យមានសេរីភាពក្នុងសំណុំរឿងទី១ លោក ថាច់ សេដ្ឋា អ្នកនយោបាយដែលមានដើមកំណើតពីទឹកដីកម្ពុជាក្រោម នៅថ្ងៃទី១៥ ខែធ្នូ ឆ្នាំ២០២៣ ពីបទមិនបំពេញកាតព្វកិច្ច ចំពោះឧបករណ៍អាចជួញដូរបាន ឬការចេញសែកអត់ប្រាក់។ ក្រុមគ្រួសារ មេធាវី អ្នកការពារសិទ្ធិមនុស្ស រួមទាំងអ្នកគាំទ្រ ទទូចដល់តុលាការកំពូល ដោះលែងលោក ថាច់ សេដ្ឋា ឱ្យមានសេរីភាពវិញ។
មេធាវីការពារក្ដីឱ្យលោក ថាច់ សេដ្ឋា គឺលោក សឺន ជុំជួន អះអាងថាភស្តុតាងដែលតុលាការជាន់ទាបចោទប្រកាន់លើកូនក្តីរបស់លោកក្នុងរឿងចេញសែកស្អុយ ឬអត់ប្រាក់កន្លងទៅគ្មានមូលដ្ឋានត្រឹមត្រូវ និងមិនមែនជាបទល្មើសនោះឡើយ ។ ដូច្នេះ លោកបញ្ជាក់ថាបើផ្អែកតាមអង្គហេតុនិងអង្គច្បាប់ ពិសេសពិនិត្យលើស្ថានភាពសុខភាពរបស់លោក ថាច់ សេដ្ឋា នៅពេលនេះ តុលាការកំពូលគួរតែផ្តល់ភាពស្អាតស្អំដល់កូនក្ដីរបស់លោកឱ្យមានសេរីភាពឡើងវិញ ខណៈ លោក ថាច់ សេដ្ឋា មានវ័យចំណាស់ និងមានជំងឺប្រចាំកាយត្រូវការព្យាបាលជាចាំបាច់៕