ក្រោយពេលអាមេរិកបានធ្វើទំនាក់ទំនងកាទូតជាមួយទីក្រុងហាណូយកាលពីខែកញ្ញា ឆ្នាំ២០២៣ ឥឡូវនេះ មេដឹកនាំកម្មុយនីស្ដចិននឹងជួបថ្នាក់ដឹកនាំប្រទេសវៀតណាមដែរ ដើម្បីទប់ស្កាត់ឥទ្ធិពលអាមេរិកនៅតំបន់សមុទ្រចិនខាងត្បូង។ លោក ឡាក់ ច័ន្ទតារា ជូននូវសេចក្ដីប្រែសម្រួល៖
ទីក្រុងហាណូយ៖ ប្រធានាធិបតីចិន លោក ស៊ី ជីនពីង នៅថ្ងៃទី១២ ខែធ្នូ ឆ្នាំ២០២៣នេះ នឹងទៅបំពេញទស្សនកិច្ចនៅប្រទេសវៀតណាមជាលើកដំបូងរយៈពេល២ថ្ងៃ ដើម្បីប្រឆាំងនឹងឥទ្ធិពលរបស់សហរដ្ឋអាមេរិកជាមួយប្រទេសកុម្មុយនិស្ត ដែលកំពុងកើនឡើង ។ ៦ឆ្នាំហើយ ដែលប្រធានាធិបតីប្រទេសកុម្មុយនិស្តមួយនេះ មិនបានទៅជាន់ទឹកដីប្រទេសវៀតណាម។ នេះបើយោងតាមការចុះផ្សាយពីសារព៏ត៌មាន Channel news Asia។
លោក Xi នឹងជួបជាមួយថ្នាក់ដឹកនាំបក្សកុម្មុយនិស្ត ដែលកំពុងកាន់អំណាចរបស់វៀតណាមគឺ លោក Nguyen Phu Trong។ ការជួបនេះធ្វើឡើងក្រោយពេល លោក Nguyen Phu Trong បានធ្វើទំនាក់ទំនងការទូតល្អប្រសើរជាមួយទីក្រុងវ៉ាស៊ីនតោន នៅពេលដែលប្រធានាធិបតីសហរដ្ឋអាមេរិកលោក Joe Biden បានធ្វើទស្សនកិច្ចកាលពីខែកញ្ញា។
ដំណើរទស្សនកិច្ចរបស់លោក Biden គឺជាផ្នែកមួយនៃកិច្ចខិតខំប្រឹងប្រែងរបស់សហរដ្ឋអាមេរិកជុំវិញពិភពលោក ដើម្បីទប់ស្កាត់អំណាចសេដ្ឋកិច្ចរបស់ប្រទេសចិនដែលកំពុងកើនឡើង និងដើម្បីធានាការផ្គត់ផ្គង់សម្ភារៈសំខាន់ៗដែលត្រូវការសម្រាប់ការផលិតបច្ចេកវិទ្យាខ្ពស់។វៀតណាម គឺជាប្រទេសមួយដែលបានអនុវត្តជាយូរមកហើយនូវវិធីសាស្ត្រ “ការទូតឫស្សី” ដោយព្យាយាមរក្សានូវលក្ខខណ្ឌល្អជាមួយមហាអំណាចទាំងពីរ។ យ៉ាងណាដំណើរទស្សនកិច្ចរបស់លោក Biden គឺជាការព្រួយបារម្ភុមួយ របស់សហរដ្ឋអាមេរិក អំពីការកើនឡើងនៃការអះអាងរបស់ទីក្រុងប៉េកាំង នៅក្នុងសមុទ្រចិនខាងត្បូង ដែលមានការប្រកួតប្រជែង។ ប៉ុន្តែវាក៏មានទំនាក់ទំនងសេដ្ឋកិច្ចជិតស្និទ្ធជាមួយប្រទេសចិនផងដែរ ខណៈដែលប្រទេសទាំងពីរមានបក្សកុម្មុយនិស្តកំពុងកាន់អំណាចដូចគ្នា។
វៀតណាម និងចិនបានចែករំលែក “ភាពជាដៃគូយុទ្ធសាស្ត្រគ្រប់ជ្រុងជ្រោយ” រួចហើយកាលពីខែកញ្ញា។ ទីក្រុងហាណូយ និងទីក្រុងវ៉ាស៊ីនតោន បានធ្វើឱ្យប្រសើរឡើងនូវទំនាក់ទំនងរបស់ពួកគេដល់កម្រិតដូចគ្នា ។អ្នកនាំពាក្យក្រសួងការបរទេសចិន លោក Wang Wenbin បាននិយាយថា ដំណើរទស្សនកិច្ច របស់លោក Xi ពាក់ព័ន្ធនឹងការពិភាក្សាស្តីពី “ការនាំយកទំនាក់ទំនងចិន-វៀតណាម ឱ្យកាន់តែខ្ពស់”។ លោក Xi នឹងជំរុញឱ្យវៀតណាមចូលរួមជាមួយ “សហគមន៍នៃជោគវាសនារួម” របស់ខ្លួន ដែលកំណត់ច្បាស់លាស់ លើ ចក្ខុវិស័យនៃកិច្ចសហប្រតិបត្តិការនាពេលអនាគតលើបញ្ហាសេដ្ឋកិច្ច សន្តិសុខ និងនយោបាយ។ អ្នកនាំពាក្យក្រសួងការបរទេសចិនបន្ដថា របៀបវារៈសម្រាប់ដំណើររបស់លោក Xi រួមមាន “នយោបាយ សន្តិសុខ កិច្ចសហប្រតិបត្តិការជាក់ស្តែង ការបង្កើតមតិសាធារណៈ បញ្ហាពហុភាគី និងបញ្ហាដែនសមុទ្រ”។ លោក Xi នឹងជួបពិភាក្សាជាមួយនាយករដ្ឋមន្ត្រីវៀតណាម Pham Minh Chinh និងប្រធានាធិបតី Vo Van Thuong នៅថ្ងៃស្អែក។
គួរជម្រាបថា ដំណើរទស្សនកិច្ចរយៈពេលពីរថ្ងៃរបស់មេដឹកនាំចិន កើតឡើងជាមួយនឹងភាពតានតឹងដែលកំពុងកើនឡើងខ្ពស់រវាងចិន និងហ្វីលីពីន នៅសមុទ្រចិនខាងត្បូងផងដែរ បន្ទាប់ពីមានការប្រឈមមុខដាក់គ្នា នៅតំបន់ថ្មប៉ប្រះទឹក។ ក្នុងរយៈពេលមួយទសវត្សរ៍កន្លងមកនេះ ប្រទេសចិនបានពង្រីកការកាន់កាប់ដីនៅសមុទ្រចិនខាងត្បូង ដោយបង្កើតកោះយោធា ដែលមានផ្លូវរត់ កំពង់ផែ និងប្រព័ន្ធរ៉ាដា។ក្នុងដំណើរទស្សនកិច្ចរបស់លោក Biden វៀតណាម និងអាមេរិកបានព្រមានរួមគ្នាប្រឆាំងនឹង «ការគំរាមកំហែង ឬការប្រើកម្លាំង» នៅសមុទ្រចិនខាងត្បូង។ បើតាមCNA វៀតណាមគឺជាសមាជិកអាស៊ានមួយ ក្នុងចំណោមសមាជិកអាស៊ានមួយចំនួន ដែលតូចចិត្តចំពោះផែនទីផ្លូវការថ្មីរបស់ចិន ដែលបានបោះពុម្ពកាលពីខែកញ្ញា និងបង្ហាញពីអធិបតេយ្យភាពលើផ្លូវទឹកដែលសម្បូរដោយធនធានស្ទើរតែទាំងស្រុង។ តែសហរដ្ឋអាមេរិក និងវៀតណាមកាលពីខែកញ្ញាបានព្រមព្រៀងសហការគ្នាដើម្បីជួយទីក្រុងហាណូយក្នុងការអភិវឌ្ឍធនធានរ៉ែកម្ររបស់ខ្លួន៕