ក្រុមគ្រួសារលោក កង សារ៉ន បានបញ្ជាក់ថា មនុស្សទាំង៤នាក់ដែលត្រូវបានមន្ត្រីនគរបាលចាប់ខ្លួនបរិវេណការិយាល័យ បានត្រឡប់ទៅផ្ទះរបស់ពួកគេវិញហើយ នៅល្ងាច ថ្ងៃទី០៦ ខែធ្នូ ឆ្នាំ២០២៣។ លោក គីម ចាន់ចាវ រាយការណ៍
អ្នកទាំងបួន ដែលត្រូវមន្ត្រីនគរបាលចាប់ខ្លួននោះ រួមមានអ្នកស្រី ហង្ស ត្រឹប ជាភរិយាលោក សារ៉ន កញ្ញា សេង ចន្ថា ជាកូនស្រីរបស់លោក សារ៉ន និងអ្នកជិតខាងពីរនាក់ផ្សេងទៀត ដែលជូនអ្នកទាំងពីរមកការិយាល័យ លីកាដូ ខេត្តបន្ទាយមានជ័យ។ នារសៀលថ្ងៃទី០៦ ខែធ្នូ ឆ្នាំ២០២៣ មន្ត្រីនគរបាលចំនួន ៦នាក់ បានចូលក្នុងបរិវេណការិយាល័យ លីកាដូ ខេត្តបន្ទាយមានជ័យ ហើយបានចាប់ខ្លួនអ្នកទាំង៤ នាក់ ដែលកំពុងទទួលការប្រឹក្សាយោបល់ផ្នែកច្បាប់ ទាក់ទងនឹងករណីសកម្មជនបញ្ចេញមតិក្នុងបណ្តាញសង្គម ដែលកំពុងជាប់ក្នុងពន្ធនាគារ លោក កង សារ៉ន ។ លោក កង សារ៉ន ទទួលបានការការពារក្តីតាមផ្លូវច្បាប់ពីក្រុមមេធាវីរបស់អង្គការ លីកាដូ ។ នេះបើតាមការបញ្ជាក់ពីអង្គការលីកាដូ។
អ្នកទាំងបួន ត្រូវបានចាប់ខ្លួន ១០ នាទី ក្រោយពេលចូលមកដល់ការិយាល័យរបស់អង្គការ លីកាដូ បន្ទាប់ពីអ្នកទាំងនោះ បានទៅសួរសុខទុក្ខលោក សារ៉ន នៅក្នុងពន្ធនាគារកាលពីពេលព្រឹក ។
អង្គកាលីកាដូបញ្ជាក់ថា បុគ្គលិកអង្គការ លីកាដូ បានស្នើសុំការបង្ហាញឯកសារពាក់ព័ន្ធ ប៉ុន្តែមន្ត្រីនគរបាលទាំងនោះមិនបានបង្ហាញនោះទេ ហើយបែរជានិយាយថា ពួកគេ “ធ្វើតាមបទបញ្ជា” ទៅវិញ ។ មន្ត្រីនគរបាលទាំងនោះ ក៏បានបញ្ជាឱ្យបុគ្គលិក លីកាដូ លុបចោលរូបភាព ដែលបុគ្គលិកថតបាន អំពីវត្តមានរបស់មន្ត្រីនគរបាលទាំងនោះចូលក្នុងបរិវេណការិយាល័យ ដោយមិនមានបង្ហាញដីកា ។
ទោះយ៉ាងណានៅព្រឹកថ្ងៃទី០៧ ខែធ្នូ ឆ្នាំ២០២៣នេះ ក្រុមគ្រួសារលោក កង សារ៉ន បានបញ្ជាក់មកអង្គការលីកាដូថា មនុស្សទាំង៤នាក់ដែលត្រូវបានចាប់ខ្លួននោះ បានត្រឡប់ទៅផ្ទះរបស់ពួកគេវិញហើយ នៅប្រហែលម៉ោង ៦ និង៣០នាទីល្ងាច ថ្ងៃទី០៦ ខែធ្នូ ឆ្នាំ២០២៣។
លោក សារ៉ន ត្រូវបាន ឃុំខ្លួនក្នុងពន្ធនាគារចាប់តាំងពីថ្ងៃទី២៥ ខែវិច្ឆិកា ឆ្នាំ២០២៣ ហើយត្រូវបានតុលាការផ្តន្ទាទោសដាក់ពន្ធនាគារចំនួន ៣ ឆ្នាំ ទាក់ទងនឹងទស្សនៈនយោបាយរបស់លោក ដែលលោកបានបង្ហោះក្នុងគណនីហ្វេសប៊ុករបស់លោកអំឡុងពេលយុទ្ធនាការបោះឆ្នោត ខែកក្កដា ឆ្នាំ២០២៣៕
