នៅថ្ងៃទី២៥ ខែវិច្ឆិកា ឆ្នាំ២០២៣ខាងមុខ ជាយុទ្ធនាការ១៦ថ្ងៃ ដើម្បីបញ្ឈប់អំពើហិង្សាទាក់ទងនឹងយែនឌ័រ។ មជ្ឈមណ្ឌលសិទ្ធិមនុស្សកម្ពុជា នឹងរៀបចំយុទ្ធនាការនេះ ដើម្បីស្នើរាជរដ្ឋាភិបាលចាត់វិធានការជាក់លាក់ និងជាបន្ទាន់ ដើម្បីបញ្ឈប់អំពើហិង្សាទាក់ទងនឹងយែនឌ័រ ព្រមទាំងលើកម្ពស់សមភាពយែនឌ័រនៅក្នុងកម្ពុជា។ តែរាជរដ្ឋាភិបាលថា ខ្លួនបានលើកកម្ពស់សិទ្ធិស្ដ្រី និងលើកម្ពស់សមភាពយែនឌ័រតាំងពីអាពត្តិមុន នឹងបន្ដនៅក្នុងអាណត្តិនេះទៀត។
លោក ឡាក់ ច័ន្ទតារា ជូននូវសេចក្ដីរាយការណ៍៖
នៅថ្ងៃទី២៣ ខែវិច្ឆិកា ឆ្នាំ២០២៣នេះ មជ្ឈមណ្ឌលសិទ្ធិមនុស្សកម្ពុជា CCHR បានប្រកាសថា ក្នុងឱកាសយុទ្ធនាការ១៦ថ្ងៃ ឆ្នាំ២០២៣នេះ មជ្ឈមណ្ឌលសិទ្ធិមនុស្សនឹងលើកកម្ពស់ការយល់ដឹងអំពីសិទ្ធិស្ដ្រី និងផលប៉ះពាល់ដែលបង្កឡើងពីអំពើហិង្សាទាក់ទងនឹងយែនឌ័រនៅក្នុងសហគមន៍។ ក្រៅពីនេះស្ថាប័នធ្វើការរឿងសិទ្ធិមនុស្ស CCHR នឹងអំពាវនាវឱ្យរាជរដ្ឋាភិបាលកម្ពុជាចាត់វិធានការជាក់លាក់ និងជាបន្ទាន់ ដើម្បីបញ្ឈប់អំពើហិង្សាទាក់ទងនឹងយែនឌ័រ ព្រមទាំងលើកម្ពស់សមភាពយែនឌ័រនៅក្នុងប្រទេសកម្ពុជា។
ការប្រកាសរបស់ CCHR ធ្វើឡើង ខណៈដែលនៅថ្ងៃទី២៥ ខែវិច្ឆិកា ឆ្នាំ២០២៣ខាងមុខ ជាថ្ងៃចាប់ផ្ដើមយុទ្ធនាការ១៦ថ្ងៃប្រចាំឆ្នាំ ដើម្បីបញ្ឈប់អំពើហិង្សាទាក់ទងនឹងយែនឌ័រ។ CCHR បញ្ជាក់ថា អំពើហិង្សាលើស្ដ្រី នៅតែជាការរំលោភបំពានសិទ្ធិមនុស្សដែលកើតមានឡើង និងបង្កផលប៉ះពាល់ធ្ងន់ធ្ងរក្នុងចំណោមការរំលោភបំពានសិទ្ធិមនុស្សនានាលើពិភពលោក។
ផ្អែកតាមការប៉ាណប្រមាណពី CCHR ដដែល ស្ដ្រីកម្ពុជាច្រើនជាងម្នាក់ក្នុងចំណោម៥នាក់ ធ្លាប់បានរងគ្រោះពីសំណាក់ដៃគូរបស់ខ្លួន និងជឿថាតួលេខនេះបានកើនឡើងក្នុងអំឡុងពេលនៃការរាតត្បាតជំងឺកូវីដ១៩។
លោក ប៉ែន បូណា មន្ដ្រីនាំពាក្យរាជរដ្ឋាភិបាលបានលើកឡើងថា រាជរដ្ឋាភិបាលបានលើកកម្ពស់សិទ្ធិស្ដ្រី និងលើកម្ពស់សមភាពយែនឌ័រ តាមរយៈការពង្រឹងតួនាទីរបស់ស្ដ្រីក្នុងជួររដ្ឋាភិបាល នយោបាយ សេដ្ឋកិច្ច និងក្នុងសង្គមជាដើម។ លោកបញ្ជាក់ថា ការលើកកម្ពស់យែនឌ័រនេះ ធ្វើឡើងតាំងពីរាជរដ្ឋាភិបាលអាណត្តិមុន និងបន្ដធ្វើនៅក្នុងអាណត្តិនេះផងដែរ។
យ៉ាងណាកន្លងមក គេសង្កេតឃើញថា អំពើហិង្សានៅតែកើតមាននៅក្នុងសង្គម ជាពិសេសលើកូដករជាស្ដ្រី ដែលតវ៉ារកយុត្តិធម៌សម្រាប់ខ្លួនឯង។ តែលោក ប៉ែន បូណា ថា កូដកម្ម មិនមែនជារឿងយែនឌ័រនោះទេ បើការតវ៉ារបស់កូដករបង្កឱ្យខូចសណ្ដាប់ធ្នាប់សារធារណៈ នោះនឹងអនុវត្តវិធានការតាមផ្លូវច្បាប់ដើម្បីរក្សាសណ្ដាប់ធ្នាប់។
គួរជម្រាបថា យុទ្ធនាការ១៦ថ្ងៃ ដើម្បីបញ្ឈប់អំពើហិង្សាទាក់ទងនឹងយែនឌ័រ នឹងប្រព្រឹត្តទៅចាប់ពីថ្ងៃទី២៥ ខែវិច្ឆិកា ដល់ទិវាសិទ្ធិមនុស្សអន្ដរជាតិ ថ្ងៃទី១០ ខែធ្នូ ឆ្នាំ ២០២៣ ដែលជាទិវាសំខាន់ក្នុងការប្រារព្ធខួបនៃសេចក្ដីប្រកាសជាសាកលស្ដីពីសិទ្ធិមនុស្ស ជាឯកសារគាំទ្រក្របខណ្ឌសិទ្ធិមនុស្សអន្ដរជាតិ និងមានបញ្ចូលជាលើកដំបូងនូវសិទ្ធិមនុស្សជាមូលដ្ឋានសម្រាប់មនុស្សគ្រប់រូប៕
