អង្គការសហប្រជាជាតិ(UN) បានឱ្យដឹងថា មនុស្សសរុបកើនដល់ជាង២៨៦,០០០នាក់ហើយ នៅក្នុងប្រទេសមីយ៉ាន់ម៉ា ត្រូវបានបង្ខំឱ្យរត់ភៀសខ្លួនចេញពីផ្ទះសម្បែងរបស់ពួកគេ ដោយសារតែការប្រយុទ្ធគ្នាប៉ុន្មានសប្តាហ៍មកនេះ រវាងក្រុមចលនាប្រដាប់អាវុធជនជាតិភាគតិច ជាមួយកងកម្លាំងរដ្ឋាភិបាលយោធា។ នេះបើតាមទីភ្នាក់ងារព័ត៌មានAFP នៅថ្ងៃទី២៣ ខែវិច្ឆិកា ឆ្នាំ២០២៣។
លោក Farhan Haq អ្នកនាំពាក្យរងតំណាងឱ្យអគ្គលេខាធិការ UN លោក Antonio Guterres មានប្រសាសន៍ថា ក្រុមភ្នាក់ងារកិច្ចការមនុស្សធម៌របស់អង្គការសហប្រជាជាតិ បានបញ្ជាក់ថាការប្រយុទ្ធគ្នាដ៏ក្តៅគគុករវាងក្រុមចលនាប្រដាប់អាវុធជនជាតិភាគតិច និងកងកម្លាំងយោធាមីយ៉ាន់ម៉ា កំពុងតែបន្ត ដែលបានរាលដាលទៅកន្លែងជាច្រើនទៀត រួមមានទាំងតំបន់ទីប្រជុំជនផងដែរ។
អ្នកនាំពាក្យរូបនេះឱ្យដឹងទៀតថា កន្លែងដែលមានការប្រយុទ្ធគ្នាខ្លាំងធ្ងន់ធ្ងរជាងគេ គឺស្ថិតនៅរដ្ឋ Shan, Sagaing, Kayah, Rakhine និង Chin ដែលត្រឹមថ្ងៃទី២២ វិច្ឆិកា មនុស្សកើនដល់ជាង ២៨៦,០០០នាក់ ត្រូវបានបង្ខំរត់ភៀសខ្លួនពីផ្ទះសម្បែង គិតចាប់តាំងពីការកើនឡើងនៃការប្រយុទ្ធគ្នា កាលចុងខែតុលា ហើយតួលេខនេះ ត្រូវបានរំពឹងថា នឹងបន្តកើនឡើងថែមទៀត។ ទន្ទឹមនឹងអ្នកជម្លៀសខ្លួនពីផ្ទះសម្បែងកាន់តែកើនឡើង លោក Haq អំពាវនាវឱ្យមានការជួយផ្តល់មូលនិធិជាបន្ទាន់ សម្រាប់ជំនួយមនុស្សធម៌ ដល់ពួកគេ។
ការប្រយុទ្ធគ្នាខ្លាំងបានផ្ទុះឡើងកាលពីថ្ងៃទី២៦ ខែតុលា នៅរដ្ឋ Shan ភាគខាងជើង កៀកព្រំប្រទល់ប្រទេសចិន នៅពេលចលនាប្រដាប់អាវុធជនជាតិភាគតិច ចំនួន៣ក្រុម បានសហការគ្នាបើកការវាយប្រហារប្រឆាំងកងកម្លាំងរបស់របបយោធា។ ក្រោយមក ចលនា Arakan Army (AA) ដែលស្ថិតក្នុងសម្ព័ន្ធភាពខាងលើ ក៏បានបើកការវាយប្រហារកាលពីដើមសប្តាហ៍មុន នៅរដ្ឋ Rakhine ភាគខាងលិច ហើយការប្រយុទ្ធគ្នាកើតមានឡើង នៅរដ្ឋ Kayah ភាគខាងកើត មានទីតាំងមិនឆ្ងាយប៉ុន្មានពីព្រំប្រទល់ថៃ៕
