សត្វផ្សោតជាសត្វមួយប្រភេទដែកជិតផុតពូជទៅហើយ តែយ៉ាងណាមិញនៅតែមានករណីស្លាប់ជាបន្តបន្ទាប់ដោយករណីផ្សេងៗគ្នា។ តួយ៉ាង នាថ្ងៃទី១៥ ខែវិច្ឆិកា ឆ្នាំ២០២៣ មានករណីសត្វផ្សោត០១ក្បាល ដែលមានវ័យជំទង់ ភេទឈ្មោល អាយុ៧ឆ្នាំ មានទម្ងន់៦៥គីឡូ ប្រវែង១.៩៥ម៉ែត្រ បានស្លាប់ដោយសារឧបករណ៌ឆក់។ តាមរយះការសង្កេតឃើញមានស្នាមជាំដំៗ នៅលើក្បាល និងដងខ្លួន ដែលស្ថិតនៅភូមិកោះជ្រឹម ឃុំអូរម្រះ ស្រុកសៀមបូក ខេត្តស្ទឹងត្រែង។ នេះបើយោងតាម ការធ្វើសេចក្ដីប្រកាសព័ត៌មានរបស់ ក្រសួងកសិកម្ម រុក្ខាប្រមាញ់ និងនេសាទរដ្ឋបាលជលផល។
តាមការប្រកាសនេះ ក្រសួងក៏បានអោយដឹងទៀតថា ក្នុងឆ្នាំ២០២៣នេះ ផ្សោតកើតបាន៨ក្បាល និងស្លាប់៥ក្បាលក្នុងនោះកូនផ្សោតស្លាប់២ក្បាល ជំទង់២ក្បាល និងស្លាប់ដោយចាស់ជរា១ក្បាល។
ក្រោយប្រកាសអំពីការស្លាប់របស់ផ្សោតនេះ រដ្ឋបាលជលផល ប្ដេជ្ញាថានឹងសហការជាមួយសមត្ថកិច្ចពាក់ព័ន្ធ ធ្វើប្រតិបិត្តការទៅលើការបង្រ្កាបបទល្មើសទាក់ទងទៅនឹងករណីឆក់នេះនិងដាក់ទោសទណ្ឌធ្ងន់ធ្ងរដល់អ្នកប្រព្រឹត្តល្មើស តាមច្បាប់ស្ដីពីជលផល។
ដើម្បីធ្វើលើការងារនេះរដ្ឋបាលជលផលក៏បានអំពាវនាវដល់ប្រជានេសាទ និងប្រជាពលរដ្ឋនៅមូលដ្ឋាន សហការក្នុងការផ្ដល់ព័ត៌មានដល់សមត្ថកិច្ចនៅពេលដែលបានឃើញមានអ្នកប្រើប្រាស់ឧបករណ៍ឆក់ត្រីដែលជាផ្នែកមួយធ្វើអោយប៉ះពាល់ដល់ការបាត់បង់ផ្សេងៗ ដោយរដ្ឋបាលជលផលក៏ ផ្ដល់ជារង្វាន់លើកទឹកចិត្តផងដែរ។ រដ្ឋបាលជលផលបានផ្ដល់លេខទំនាក់ទំនង៤ខ្សែ ដែលរួមមាន០៩៧ ៦៦៦ ៤៩៩៩ /០១១ ៣៥៥ ៨៨៣/ ០៨៨ ៨៣៥៥ ៨៨៣ /០១២ ៨៩៧ ៩៤៣ ប្រជានេសាទនិងប្រជាពលរដ្ឋនៅមូលដ្ឋាន ដើម្បីរាយការណ៍ពីករណីល្មើសខាងលើ៕