លោក រ៉ុង ឈុន ដែលបានប្រកាសលាលែងតំណែងពីអនុប្រធានគណបក្សភ្លើងទៀននៅថ្ងៃទី៩ វិច្ឆិកា បានអំពាវនាវទៅកាន់មន្ត្រីនិងសកម្មជនគណបក្សភ្លើងទៀន ឱ្យចូលរួមសកម្មភាពនយោបាយជាមួយគណបក្សកម្លាំងជាតិ។ គណបក្សកម្លាំងជាតិ ដែលលោករ៉ុង ឈុន ទើបនឹងប្រកាសចូលរួមជីវភាពនយោបាយជាមួយ ដែលទើបត្រូវបានបង្កើតឡើងដោយអតីតមន្ត្រីជាន់ខ្ពស់គណបក្សភ្លើងទៀន លោក ស៊ុន ចន្ធី។
លោក រ៉ុង ឈុន អះអាងតាមរយៈសេចក្ដីប្រកាសព័ត៌មាន របស់ខ្លួនថា មូលហេតុដែលលោកចាកចេញពីគណបក្សភ្លើងទៀន ដោយសារតែគណបក្សនេះពុំត្រូវបានអនុញ្ញាតឱ្យចូលរួមបោះឆ្នោតនានា បើទោះជាគេដឹងថា គណបក្សប្រឆាំងធំជាងគេនៅកម្ពុជាមួយនេះកំពុងចងសម្ព័ន្ធភាពជាមួយគ្នាគណបក្សនយោបាយចំនួនបីផ្សេងទៀត និងកំពុងចាប់យកគណបក្សឆន្ទៈខ្មែរធ្វើជាបក្សសម្ព័ន្ធដើម្បីចូលរួមក្នុងការបោះឆ្នោតអសកលនៅក្នុងឆ្នាំ២០២៤ខាងមុខនេះក្តី។
បើតាម លោក រ៉ុង ឈុន ដដែល សម្មភាពរបស់លោកជាមួយគណបក្សបង្កើតថ្មីនេះ គឺដើម្បីបន្តចរន្តនយោបាយ ដែលជាមូលដ្ឋានអ្នកប្រជាធិបតេយ្យ ឱ្យកាន់តែរីកធំធាត់ទៅមុខ ឈានទៅដឹកនាំប្រទេស ខណៈដែលគណបក្សភ្លើងទៀនដែលជាទ្រនំចាស់របស់លោក ត្រូវបានគណៈកម្មាធិការជាតិរៀបចំការបោះឆ្នោត (គ.ជ.ប) មិនអនុញ្ញាតឱ្យចូលរួមបោះឆ្នោតជាតិ កាលពីឆ្នាំ២០២៣ និងបោះឆ្នោតអសកលឆ្នាំ២០២៤ ខាងមុខ ក្រោមហេតុផលខ្វះឯកសារចុះបញ្ជីគណបក្សនយោបាយច្បាប់ដើមគណបក្ស។
សូមជម្រាបថា បើទោះបីជាមន្ត្រីរបស់ខ្លួនមួយចំនួនកំពុងចុះចូលជាមួយគណបក្សកម្លាំងជាតិ ប៉ុន្តែគណបក្សភ្លើងទៀន ដែលមិនត្រូវបានអនុញ្ញាឱ្យចូលរួមបោះឆ្នោតអសកលនៅឆ្នាំនេះ នៅតែបន្តរៀបចំបញ្ជីឈ្មោះបេក្ខជន ដើម្បីផ្ដល់ទៅឱ្យគណបក្សឆន្ទៈខ្មែរ ដែលជាគណបក្សសម្ព័ន្ធមិត្តរបស់ខ្លួនសម្រាប់ចូលរួមបោះឆ្នោតអសកលឆ្នាំ២០២៤ខាងមុខ៕
