រដ្ឋាភិបាលនឹងបង្កើតយន្តការថ្មីមួយក្នុងការដោះស្រាយវិវាទក្រៅប្រព័ន្ធតុលាការ ដោយសំដៅដល់ការពង្រឹង និងលើកកម្ពស់ប្រសិទ្ធភាពនៃការសម្របសម្រួល ដោះស្រាយបញ្ចប់វិវាទរបស់ប្រជាពលរដ្ឋតាមមូលដ្ឋាន។ នៅក្នុងកិច្ចប្រជុំដែលធ្វើឡើងនៅវិមានសន្តិភាព ក្រោមវត្តមាន សម្តេចនាយករដ្ឋមន្ត្រី ហ៊ុន ម៉ាណែត កាលពីថ្ងៃទី២៧ ខែតុលា លោក កើត រិទ្ធិ រដ្ឋមន្ត្រីក្រសួងយុត្តិធម៌ បានថ្លែងថា យន្តការនៃការដោះស្រាយវិវាទក្រៅប្រព័ន្ធតុលាការ គឺជា«ឧបករណ៍គតិយុត្តិមួយដ៏សំខាន់សម្រាប់ពង្រឹង និងលើកកម្ពស់ប្រសិទ្ធភាពនៃការសម្របសម្រួលដោះស្រាយបញ្ចប់វិវាទរបស់ប្រជាពលរដ្ឋ»។
លោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ ដែលបានសាទរនឹងយន្តការថ្មីនេះ មើលឃើញចំណុចសំខាន់ពីរដែលជំរុញឱ្យមានយន្តការដោះស្រាយវិវាទក្រៅប្រព័ន្ធតុលាការនេះ គឺអាចសម្របសម្រួលឱ្យស្ថានភាពជម្លោះរវាងគូភាគីមានភាពល្អប្រសើរជាជាងការប្ដឹងផ្ដល់ទៅតុលាការ និងចំណុចមួយទៀត គឺការជាការឆ្លើយតបនឹងបញ្ហាកកស្ទះសំណុំរឿងក្នុងប្រព័ន្ធតុលាការ ដែលភាគីជម្លោះបានប្ដឹង ប៉ុន្តែមិនទាន់ត្រូវបានដោះស្រាយ ដែលធ្វើឱ្យបាត់បង់ជំនឿលើប្រព័ន្ធយុត្តិធម៌កន្លងមក។
