ខេត្តពោធិ៍សាត់៖ គ្រូបង្រៀនម្នាក់នៅអនុវិទ្យាល័យមួយក្នុងស្រុកក្រគរ ខេត្តពោធិ៍សាត់ ត្រូវបានមន្ទីរអប់រំខេត្តនេះបង្កកប្រាក់បៀវត្ស ដោយសារលោកបានចេញតវ៉ារឿងជម្លោះដីធ្លី។ ករណីនេះ សមាគមគ្រូបង្រៀនកម្ពុជាឯករាជ្យ បានដាក់ញត្តិទៅក្រសួងអប់រំយុវជន និងកីឡា ឱ្យជួយអន្តរាគមន៍។
សមាគមគ្រូបង្រៀនកម្ពុជាឯករាជ្យបានដាក់ញត្តិទៅក្រសួងអប់រំយុវជន និងកីឡា ស្នើសុំឱ្យក្រសួងជួយអន្តរាគមន៍បើកប្រាក់បៀវត្សជូនលោកគ្រូមួយរូបនៅខេត្តពោធិ៍សាត់ ដោយសារមន្ទីរអប់រំ ខេត្តនេះ បានបង្កកប្រាក់បៀវត្សរបស់គាត់។
ការដាក់ញត្តិរបស់សមាគមគ្រូបង្រៀនកម្ពុជាឯករាជ្យ ទៅក្រសួងអប់រំយុវជន និងកីឡានេះធ្វើឡើងក្រោយពីមន្ទីរអប់រំខេត្តពោធិ៍សាត់មិនបានបើកប្រាក់បៀវត្ស ជូនលោក សោម សារាវុត ទាំងដែលលោកនៅបង្រៀននៅឡើយ។ ញត្តិនោះត្រូវបានដាក់ទៅក្រសួងអប់រំយុវជន និងកីឡា កាលពីថ្ងៃទី១៣ ខែមករា ឆ្នាំ២០១៦ ម្សិលមិញនេះ។
ប្រធានស្ដីទីសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយយ៉ាវី បានប្រាប់ឱ្យវិទ្យុស្ត្រី FM 102 នៃ WMC នៅព្រឹកថ្ងៃទី១៤ ខែមករានេះថា គោលបំណងដែលសមាគមគ្រូបង្រៀនឯករាជ្យ បានដាក់ញត្តិជូនទៅក្រសួងអប់រំយុវជន និងកីឡា កាលពីម្សិលមិញ គឺស្នើសុំឱ្យក្រសួង ជួយអន្តរាគមន៍រឿងបើកប្រាក់ខែជូនលោកគ្រូ សោម សារាវុត ដោយសារតែមន្ទីរអប់រំនៅខេត្តពោធិ៍សាត់ មិនបានបើកប្រាក់ខែជូនលោក។
អ្នកស្រីបានបន្តថា មន្ទីរអប់រំ មិនគួរបង្កកប្រាក់បៀវត្សគ្រូបង្រៀនរូបនេះឡើយ ដោយសារតែ លោក សារាវុត នៅតែបន្តបង្រៀនសិស្សរាល់ថ្ងៃ ហើយលោកមិនបានជាប់ពន្ធធនាគារឡើយ។
អ្នកស្រីបានសុំណូមពរដល់ ក្រសួងអប់រំ ឱ្យជួយមើលមន្ត្រីនៅក្រោមបង្គាប់ ជាពិសេសមន្ត្រីនៅមន្ទីរអប់រំខេត្តពោធិ៍សាត់ ឱ្យធ្វើការតាមតួនាទី និងបើកប្រាក់ខែជូនលោក សោម សារាវុត ផង។
វិទ្យុស្ត្រី មិនអាចសុំការបំភ្លឺពីលោក រស់ សាលីន អ្នកនាំពាក្យក្រសួងអប់រំ យុវជន និងកីឡា បានទេ នៅថ្ងៃនេះ ដោយទូរសព្ទចូលជាច្រើនដងតែគ្មានអ្នកទទួល។
សូមជម្រាបថា លោក សោម សារាវុត ជាគ្រូបង្រៀននៅអនុវិទ្យាល័យមួយក្នុងស្រុកក្រគរ។ លោកជាសកម្មជនគណបក្សសង្គ្រោះជាតិ និងជាសមាជិកសមាគមគ្រូបង្រៀនកម្ពុជាឯករាជ្យផងដែរ។ លោក ជាគ្រូបង្រៀនដែលចេញមុខតវ៉ារឿងដីធ្លីដ៏សកម្មម្នាក់នៅក្នុងស្រុកក្រគរ។ សកម្មភាពលោកបានធ្វើឱ្យអាជ្ញាធរ និងអ្នកមានលុយខ្លះមិនពេញចិត្ត និងរករឿងចោទប្រកាន់ជាបន្តបន្ទាប់។ លោកក៏ធ្លាប់ជាប់គុករយៈពេល ១ខែ ១៨ថ្ងៃ ក្រោមបទចោទឆបោក ទាក់ទងរឿងម្ដាយលោកលក់ដីមួយកន្លែងកាលពីពេលកន្លងទៅ៕
