ដើម្បីឱ្យការរៀបចំពីធីបុណ្យកឋិនទានដំណើរការ ស្របតាមប្រពៃណី ទំនៀមទំលាប់ និងប្រពៃណីព្រះពុទ្ធសាសនា ក្រសួងធម្មការបានចេញការណែនាំមួយចំនួន ក្នុងនោះបានហាមមិនឱ្យមានការរៃអង្គាសនៅតាមទីសាធារណៈ និងទីប្រជុំជនឡើយ ដើម្បីរក្សាសណ្ដាប់ធ្នាប់ និងកិត្តិយសព្រះពុទ្ធសាសនា។ លោក ឡាក់ ច័ន្ទតារា ជូននូវសេចក្ដីរាយការណ៍៖
បុណ្យកឋិនទាន គឺជាពិធីបុណ្យព្រះពុទ្ធសាសនាដែលមានរយៈពេលវែងជាងគេ ដល់ទៅ ២៩ថ្ងៃ ។ នៅឆ្នាំនេះ កឋិនកាលត្រូវបានកំណត់ចាប់ពីថ្ងៃទី៣០ ខែតុលា ឆ្នាំ២០២៣ រហូតដល់ថ្ងៃទី២៧ ខែវិច្ឆិកា ឆ្នាំ២០២៣។
មុនពិធីបុណ្យនេះមកដល់ ក្រសួងធម្មការ និងសាសនា នៅថ្ងៃទី១៨ ខែតុលា ឆ្នាំ២០២៣នេះ បានចេញការណែនាំមួយចំនួន ក្នុងការរៀបចំពិធីសាសនា នាឆ្នាំនេះ ក្នុងនោះក្រសួងបានហាមប្រាមមិនឱ្យដើររៃអង្គាសនៅតាមផ្លូវទីសាធារណៈ និងទីប្រជុំជននោះទេ ដែលទង្វើបែបនេះក្រសួងចាត់ទុកថា ធ្វើឱ្យបាត់បង់សណ្ដាប់ធ្នាប់របៀបរៀបរយសង្គម និងកិត្តិយសព្រះពុទ្ធសាសនា។
បុណ្យកឋិនទាន ជាកាលទានដ៏ថ្លែថ្លា និងមានលក្ខណៈពិសេសនៅក្នុងព្រះពុទ្ធសាសនា ដោយក្នុងមួយឆ្នាំមានតែម្ដង ហើយវត្តអារាមមួយ គឺអាចទទួលអង្គកឋិនបានតែមួយគត់ក្នុង មួយឆ្នាំ។ តាមរយៈកឋិនទាន វត្តអារាមនីមួយៗអាចមានលទ្ធភាពទទួលបាននូវសម្ភារៈ បច្ច័យ សម្រាប់ប្រើប្រាស់ក្នុងសេនាសនៈនៅក្នុងវត្ត ព្រះវិហារ កុដិ សាលា និងជួយឧបត្ថម្ភកសាងសមិទ្ធផល និងវិស័យសង្គមកិច្ចបានទៀតផង។
សូមជម្រាបដែរថា នៅក្នុងគម្ពីរព្រះពុទ្ធសាសនា ការធ្វើកឋិនទាននឹងនាំមកនូវ ផល៥ប្រការ របស់អ្នកម្ចាស់ទាន ទោះជាគ្រហស្ថក្តី បព្វជិតក្តី គឺរមែងមានរូបឆោមលោមពណ៌ល្អស្អាត គួរជាទីពិតពិលរមិលមើល និងជាទីចាប់ចិត្តមេត្រីនៃជនផងទាំងឡាយ ហើយរមែងមានទ្រង់ទ្រាយកាយសម្បទាសមសួនតាមកាលសម័យនៃអាយុកប្បនិមួយៗ។
ផលដែលជាសម្បត្តិលោកីយ៍មួយទៀត គឺនឹងបានជាស្ដេចចក្រព័ត្រ មានរិទ្ធិអំណាចប្រកបដោយទសពិធរាជធម៌។ បើជាបុរស នឹងបានជួបព្រះសម្មាសម្ពុទ្ធអង្គណាមួយ បានបួសជាឯហិភិក្ខុមានត្រៃចីវរ និងគ្រឿងបរិក្ខារកើតឡើងដោយឯកឯង និងបានសម្រេចមគ្គផលព្រះនិព្វាន។ បើជាស្ត្រីវិញ ក៏នឹងបានប្រតិបត្តិលោកុត្តរធម៌ ដែលធម៌ដ៏ប្រសើរឧត្តម បានរួចផុតចាកសេចក្តីទុក្ខនៃជាតិ ជរា ព្យាធិ និងមរណៈ ដែលជាផលខ្ពស់បំផុតក្នុងពាក្យប្រៀនប្រដៅរបស់ព្រះសម្មាសម្ពុទ្ធគ្រប់ព្រះអង្គ។ នេះបើយោងតាមគម្ពីរសាសនាដដែល៕