បន្ទាប់ពីជោគជ័យលើវិស័យកីឡាស្នូកឃ័រប៊ីយ៉ែការ៉ុមលើទឹកដីកូរ៉េខាងត្បូង កីឡាការិនីស្រួង ភាវី នៅពេលថ្មីៗនេះ បានក្លាយជាទូតសុច្ឆន្ទៈរបស់អង្គការពិភពលោកដ៏ធំមួយប្រចាំប្រទេសកូរ៉េ គឺអង្គការ “ទាហ៊ានសម្រាប់ជួយសង្គ្រោះ”។
អង្គការដ៏ធំលំដាប់ពិភពលោកមួយនេះ មានទីស្នាក់ការដល់ទៅ១៣៤ប្រទេសក្នុងពិភពលោក។ អ្នកនាងស្រួង ភាវី បញ្ជាក់ថា នេះជាមោទនភាពសម្រាប់ប្រជាជនខ្មែរ ដែលមានជនជាតិខ្មែរម្នាក់ មានឱកាសធ្វើជាទូតសុច្ឆន្ទៈរបស់អង្គការដ៏ធំមួយនេះ។
អ្នកនាងបង្ហើបថា នេះជាកិត្តិយសសម្រាប់រូបអ្នកនាងផ្ទាល់ ក៏ដូចជាកូនខ្មែរទាំងអស់ ដែលខ្លួនជាជនបរទេសសោះ ហើយរស់នៅក្នុងទឹកដីប្រទេសកូរ៉េ តែត្រូវបានអង្គការពិភពលោកដ៏ធំ និងមានស្នាក់ការនៅប្រទេសកូរ៉េ ជ្រើសរើសឱ្យធ្វើជាទូតសុច្ឆន្ទៈ។ នេះបើតាមការលើកឡើងរបស់អ្នកនាងក្នុងហ្វេសប៊ុក នាថ្ងៃទី១៧ ខែតុលា។
អ្នកនាង ស្រួង ភាវី បានអះអាងថា រាល់ថវិកាទាំងអស់ដែលទទួលបានពីកម្មវិធីនានា អ្នកនាងនឹងទុក ដើម្បីជួយដល់ប្រជាជនកម្ពុជា ជាពិសេសកុមារដែលមានជំងឺបេះដូងចំហ យកមកព្យាបាលនៅប្រទេសកូរ៉េ។ កាលពីពេលកន្លងទៅ កីឡាការិនី ស្រួង ភាវី បានប្រកាសស្វែងរកកុមារដែលមានជំងឺបេះដូងប្រហោងយកទៅព្យាបាលដល់ប្រទេសកូរ៉េផ្ទាល់ផងដែរ។ ក្រៅពីនេះ អ្នកនាងក៏ធ្លាប់បាននាំគ្រូពេទ្យពីប្រទេសកូរ៉េ មកព្យាបាលជំងឺដល់កុមារកម្ពុជាដែរ។
យ៉ាងណា នៅពេលថ្មីៗនេះទៀតសោត កីឡាការិនីពូកែថ្វីដៃស្នូកឃ័រ ស្រួង ភាវី ក៏ទើបបានទទួលនូវគ្រឿងឥស្សរិយយសសម្ដេចព្រះមហាក្សត្រីយានី ព្រះស៊ីសុវត្ថិមុនីវង្ស កុសុមៈនារីរ័ត្ន ថ្នាក់មហាសេរីវឌ្ឍន៍ ពីព្រះមហាក្សត្រនៃព្រះរាជាណាចក្រកម្ពុជាផងដែរ។
