លោក ជីម គង់ហ៊ុយ ដែលជាអ្នករត់ប្រណំាងជនជាតិខ្មែរមួយរូប ទើបតែបញ្ចប់ការរត់ប្រណាំង Chicago Marathon (The 2023 Bank of America Chicago Marathon) នៅសហរដ្ឋអាមេរិកក្នុងរយៈចម្ងាយ ៤២.១៩៥ គីឡូម៉ែត្រ កាលពីថ្ងៃអាទិត្យ ទី ៨ ខែតុលា ឆ្នាំ ២០២៣ នេះ។ ព្រឹត្តិការណ៍នេះទទួលបានការចូលរួមពីអ្នករត់ប្រណាំងច្រើនជាង ៤៨,០០០ នាក់មកពីបណ្ដាប្រទេសនានាជុំវិញពិភពលោក។
លោកគឺជាអ្នករត់ជនជាតិខ្មែរតែម្នាក់គត់ដែលទទួលបានការអញ្ជើញដើម្បីចូលរួមក្នុងព្រឹត្តិការណ៍រត់ប្រណាំងលំដាប់ពិភពលោកនេះ ក្រោយពេលលោករត់បានក្នុងរយៈពេលល្អ (3 ម៉ោង ៣០ នាទី ៧ វិនាទី) នៅក្នុងក្រុមអ្នករត់ដែលមានវ័យពី ៤៥ ដល់ ៤៩ ឆ្នាំ នៃព្រឹត្តិការណ៍រត់ប្រណាំង Global Marathon 2022 ដែលរៀបចំឡើងដោយ Abbott World Marathon Majors។ សម្រាប់ការរត់នៅ Chicago Marathon លោក គង់ហ៊ុយ បានបញ្ចប់ការរត់ចម្ងាយ ៤២.១៩៥ គីឡូម៉ែត្រដោយប្រើពេល ៣ ម៉ោង ២៨ នាទី ៤៥ វិនាទី។
លោក ជីម គង់ហ៊ុយ មានប្រសាសន៍ពីបទពិសោធក្នុងការរត់ប្រណាំង Chicago Marathon ថា៖ «ការចូលរួមក្នុងការរត់ប្រណាំងលំដាប់អន្តរជាតិនេះ ជាក្ដីស្រមៃដ៏ធំមួយរបស់ខ្ញុំ ហើយខ្ញុំពិតជាសប្បាយរីករាយ និងមានមោទនភាពក្នុងនាមជាប្រជាជនខ្មែរដែលមានឱកាសចូលរួមក្នុងព្រឹត្តិការណ៍ប្រវត្តិសាស្ត្រសម្រាប់អ្នករត់ប្រណាំងនេះ។» លោកមានប្រសាសន៍បន្តថា៖ «ខ្ញុំសូមលើកទឹកចិត្តឱ្យបងប្អូនទាំងអស់គ្នាផ្តោតការយកចិត្តទុកដាក់ចំពោះសុខភាព ហើយការរត់អាចជាចំណែកមួយដែរដែលបងប្អូនអាចសាកល្បងបាន។ សុខភាពល្អនឹងនាំមកនូវភាពជោគជ័យលើកិច្ចការងារជាច្រើន ជាពិសេសនាំមកនូវការរស់នៅប្រកបដោយភាពរីករាយ។ បទពិសោធដ៏អស្ចារ្យដែលខ្ញុំទទួលបាននេះ នឹងអនុញ្ញាតឱ្យខ្ញុំអាចជំរុញបន្ថែមឱ្យមានការចូលរួមកាន់តែសកម្មឡើងក្នុងកីឡារត់ប្រណាំងនៅក្នុងសហគមន៍កម្ពុជា។»
លោក ជីម គង់ហ៊ុយ គឺជាអ្នកដែលស្រឡាញ់ការរត់ប្រណាំង ហើយលោកតែងតែចូលរួមព្រឹត្តិការណ៍រត់ប្រណាំងនានាជាច្រើននៅក្នុងប្រទេស និងក្រៅប្រទេសផងដែរ។ លោកបានចូលរួមបង្កើតក្រុមរត់ប្រណាំង KK Running Club កាលពីឆ្នាំ ២០១៧ ដែលបច្ចុប្បន្នមានសមាជិកច្រើនជាង ១,០០០ នាក់ និងក្លាយជាក្លឹបរត់ប្រណាំងដ៏ធំមួយផងដែរ។ បច្ចុប្បន្នលោក គង់ហ៊ុយ គឺជាអគ្គនាយករបស់ក្រុមហ៊ុនធានារ៉ាប់រងអាយុជីវិតលំដាប់អន្តរជាតិ FWD Cambodia ដែលក្រុមហ៊ុននេះមានទស្សនវិស័យផ្ដល់បទពិសោធថ្មីលើសេវាធានារ៉ាប់រងនៅកម្ពុជា។ កន្លងមក លោក និងក្រុមការងារបានរៀបចំ និងគាំទ្រព្រឹត្តិការណ៍រត់ប្រណាំងជាច្រើនដើម្បីលើកកម្ពស់ការរស់នៅប្រកបដោយភាពរីករាយ និងពោរពេញដោយសុខភាពល្អបរិបូរណ៍។ កម្មវិធីទាំងនោះរួមមាន ព្រឹត្តិការណ៍រត់ប្រណាំង Cambodia Elephant Trail ការរត់ Fun Run ជាមួយដៃគូអាជីវកម្មជាដើម។