ភ្នំពេញ៖ បណ្ណាល័យ ជាកន្លែងផ្ទុកនូវចំណេះដឹងជាច្រើនសម្រាប់អ្នកសិក្សាស្រាវជ្រាវ។ បើសិស្សានុសិស្សផ្សារភ្ជាប់ខ្លួនឯងជាមួយនឹងបណ្ណាល័យ នឹងធ្វើឱ្យសិស្សរៀនកាន់តែពូកែ។ ជាទូទៅ សៀវភៅមួយក្បាលៗបានបង្កប់នូវគំនិតល្អៗជាច្រើន ដែលធ្វើឱ្យអ្នកអានកាន់តែមានគំនិតចាស់ទុំនិងជួយបង្កើនទម្លាប់ក្នុងការអានសៀវភៅ។ ជុំវិញអត្ថប្រយោជន៍នៃការអានសៀវភៅនេះដែរ សិក្ខាកាមនៃអង្គការមណ្ឌលព័ត៌មានស្ត្រីកម្ពុជា(WMC)បានសម្ភាសន៍អ្នកពាក់ព័ន្ធមួយចំនួន ដើម្បីចង់ដឹងពីសន្ទុះនៃការអានសៀវភៅនៅតាមបណ្ណល័យរបស់សិស្សានុសិស្សថ្នាក់វិទ្យាល័យ។ ខាងក្រោមនេះគឺជាលើកឡើងរបស់អ្នកពាក់ព័ន្ធ។
សកម្មភាពសិស្សៗចូលអានសៀវភៅនៅវិទ្យាល័យ ប៊ុន រ៉ានី ហ៊ុន សែន ចរិយាវង្ស។រូបភាពពីសាត ឌិច។
ទាក់ទិននឹងការអានសៀវភៅនេះ លោក ហ៊ុន ឡាវ ជាអនុប្រធានបណ្ណាល័យសម្តេចអគ្គមហាសេនាបតីតេជោ ហ៊ុន សែន នៃក្រសួងអប់រំ យុវជន និងកីឡា លើកឡើងថា បណ្ណាល័យ ជាផ្នែកមួយនៃការជួយជំរុញការអានដល់សិស្សានុសិស្ស បណ្តុះទម្លាប់អាន និងលើកកម្ពស់វប្បធម៌អាន តាមរយៈការផ្តល់នូវធនធានឯកសារសម្បូរបែបនិងផ្សារភ្ជាប់ការសិក្សាពេញមួយជីវិត។ លោកសង្កត់ធ្ងន់ថា បណ្ណាល័យនៅតាមសាលារៀន បានជួយកាត់បន្ថយអត្រាសិស្សត្រួតថ្នាក់និងសិស្សឈប់រៀន។
លោក ហ៊ុន ឡាវ អនុប្រធានបណ្ណាល័យសម្តេចអគ្គមហាសេនាបតីតេជោ ហ៊ុន សែន នៃក្រសួងអប់រំ យុវជន និងកីឡា។រូបភាពពី សាត ឌិច។
ដោយឡែកជាការកត់សម្គាល់របស់លោក ហ៊ុន ឡាវ សិស្សដែលចូលបណ្ណាល័យញឹកញាប់ គឺតែងតែមានភាពម្ចាស់ការនិងក្លាហានជាងសិស្សដែលមិនចូលបណ្ណាល័យ។ បើតាមការសង្កេតរបស់លោកកន្លងមក លោកថាសៀវភៅដែលសិស្សចូលចិត្តអានជាងគេ គឺសៀវភៅរឿងនិទានខ្លីៗ សៀវភៅអក្សរសិល្ប៍ទាក់ទងនឹងកម្មវិធីសិក្សា និងសៀវភៅទាក់ទងនឹងចំណេះដឹងផ្សេងៗ។ ស្របគ្នានោះដែរ លោកក៏បានបង្ហាញការព្រួយបារម្ភដែរថា សិស្សមួយចំនួនចូលចិត្តអានសៀវភៅប្រលោមលោកស្នេហានិងរឿងបកប្រែពីគេដែលជាបញ្ហាប្រឈមទៅវិញ។
សកម្មភាពសិស្សៗចូលអានសៀវភៅនៅវិទ្យាល័យ ប៊ុន រ៉ានី ហ៊ុន សែន ចរិយាវង្ស។រូបភាពពីសាត ឌិច។
ចំណែកអ្នកគ្រូ ឡឹក ហន ដែលជាបណ្ណារក្សនៅវិទ្យាល័យ ប៊ុន រ៉ានី ហ៊ុន សែន ចរិយាវង្ស បានលើកឡើងថា សព្វថ្ងៃនេះ សិស្សមកអានសៀវភៅនៅក្នុងបណ្ណាល័យកាន់តែច្រើនឡើងៗ ពិសេសនៅម៉ោងសម្រាក ពេលកៀកប្រឡង និងពេលដែលលោកគ្រូ អ្នកគ្រូដាក់កិច្ចការឱ្យសិស្សស្រាវជ្រាវ។ ចំពោះសៀវភៅនៅបណ្ណាល័យវិញ អ្នកគ្រូមានប្រសាសន៍ថា សៀវភៅគឺមានចម្រុះគ្រប់មុខ ទាំងភាសាខ្មែរ និងបរទេស ហើយសិស្សអាចខ្ចីយកទៅអាននិងអាននៅបណ្ណាល័យបានរៀងរាល់ម៉ោងធ្វើការ។ ចំណែកសៀវភៅដែលសិស្សចូលចិត្តអានជាងគេ ភាគច្រើនអានទាក់ទងនឹងអក្សរសាស្ត្រ ប្រលោមលោក និងគណិតវិទ្យាជាដើម។ អ្នកគ្រូក៏បានផ្តាំផ្ញើដល់សិស្សានុសិស្សថា ការអានសៀវភៅ នឹងធ្វើឱ្យសិស្សអភិវឌ្ឍន៍ការសិក្សា ចេះស្វ័យសិក្សាដោយខ្លួនឯង ចេះអានអក្សរ និងសរសេរអក្សរបានល្អ។
អ្នកគ្រូ ឡឹក ហន បញ្ជាក់ផងដែរថា សព្វថ្ងៃនេះ បណ្ណាល័យសាលាកំពុងទទួលគម្រោងកែលម្អគុណភាពអប់រំ នឹងជួសជុលបន្ទប់បណ្ណាល័យឱ្យកាន់តែមានសោភ័ណភាព ដោយបំពាក់សម្ភារៈទំនើបនិងដាក់ម៉ាស៊ីនត្រជាក់ជាដើម។ ជាមួយគ្នានេះដែរ សាលាក៏កំពុងប្រើប្រាស់លុយគម្រោងរបស់ក្រសួងអប់រំនិងដៃគូអភិវឌ្ឍន៍ ដើម្បីជួយទិញសៀវភៅល្អៗមកបន្ថែមទៀត។
អ្នកគ្រូ ឡឹក ហន(រូបខាងឆ្វេង)កំពុងពន្យល់ពីរបៀបរៀបចំនិងគ្រប់គ្រងក្នុងបណ្ណាល័យ។រូបភាពពី សាត ឌិច។
ជុំវិញការអានសៀវភៅនៅបណ្ណាល័យនេះដែរយុវសិស្ស ណន ធារី ដែលជាសិស្សថ្នាក់ទី១០ នៃវិទ្យាល័យ ប៊ុន រ៉ានី ហ៊ុន សែន ចរិយាវង្ស ប្រាប់ថា កញ្ញាបានចំណាយពេលអានសៀវភៅក្នុងបណ្ណាល័យពី៣០នាទីទៅ១ម៉ោងនៅពេលទំនេរ។ កញ្ញាថា បរិយាកាសក្នុងបណ្ណាល័យស្ងប់ស្ងាត់ល្អ គ្មានសំឡេងរំខាន ហើយសៀវភៅក៏មានច្រើនដែលអាចជួយផ្តល់ចំណេះដឹងផ្សេងៗ។ យុវតីរូបនេះយល់ថា ការអានសៀវភៅធ្វើឱ្យកញ្ញាយល់ដឹងច្រើន កើននូវចំណេះដឹង និងមានគំនិតទូលំទូលាយ។ ចំពោះបណ្ណាល័យក្នុងវិទ្យាល័យ ប៊ុន រ៉ានី ហ៊ុន សែន ចរិយាវង្ស សព្វថ្ងៃ កញ្ញាយល់ថា មានសៀវភៅល្មមគ្រប់គ្រាន់ហើយ ប៉ុន្តែបើសាលាអាចនាំយកសៀវភៅថ្មីៗ សៀវភៅល្អៗបន្ថែមទៀតនោះគឺកាន់តែល្អ។ ជាចុងក្រោយ កញ្ញាសំណូមពរដល់សិស្សានុសិស្សទាំងអស់ ឱ្យឧស្សាហ៍ចូលអានសៀវភៅនៅបណ្ណាល័យឱ្យបានច្រើន ដើម្បីទទួលបានចំណេះដឹងទូលំទូលាយ។
ណន ធារី តែងចូលអានសៀវភៅពេលទំនេរ។រូបភាពពី សាត ឌិច។
ចំណែកយុវតី ស៊ុន សូហ្វី ដែលរៀននៅវិទ្យាល័យខាងលើបង្ហាញចំណាប់អារម្មណ៍ស្រដៀងគ្នាថា កញ្ញាបានចំណាយពេលអានសៀវភៅក្នុងបណ្ណាល័យពី៣០ទៅ៤០នាទី។ កញ្ញាថា នៅក្នុងបណ្ណាល័យត្រជាក់និងស្ងប់ស្ងាត់ល្អ ហើយមានសៀវភៅច្រើនសម្បូរបែបសម្រាប់អានកម្សាន្តនិងស្រាវជ្រាវ។ ការអានសៀវភៅក្នុងបណ្ណាល័យ ជួយឱ្យកញ្ញាយល់ដឹងនូវអ្វីថ្មីៗនិងទទួលបានគំនិតល្អៗ។ ជាមួយគ្នានេះដែរ កញ្ញាចង់ឱ្យសាលារៀបចំបណ្ណាល័យឱ្យកាន់តែមានភាពទាក់ទាញជាងនេះទៀតនិងយកសៀវភៅល្អៗដែលជាស្នាដៃនិពន្ធថ្មី ដើម្បីជំរុញសិស្សឱ្យចូលអានសៀវភៅ។ ចុងក្រោយ កញ្ញាថាដើម្បីឱ្យសិស្សអានសៀវភៅទាល់តែមានការណែនាំនិងជំរុញពីគ្រូផងដែរ ទើបសិស្សមានអារម្មណ៍ក្នុងការអាន។
យុវតី ស៊ុន សូហ្វី។រូបភាពពី សាត ឌិច។
រីឯយុវសិស្ស ធូ ស្រីនិច ក៏បានរៀបរាប់ថា កញ្ញាតែងតែចំណាយពេលអានសៀវភៅក្នុងបណ្ណាល័យពី២០ទៅ៣០នាទីនៅពេលទំនេរ។ បរិយាកាសក្នុងបណ្ណាល័យស្ងប់ស្ងាត់ល្អ ហើយសៀវភៅក៏មានច្រើនថែមទៀត ដែលជាជំនួយសម្រាប់សិស្សក្នុងការស្រាវជ្រាវមេរៀន។ កញ្ញាក៏បានលើកមូលហេតុថា កត្តាដែលនាំឱ្យកញ្ញាចូលអានសៀវភៅក្នុងបណ្ណាល័យ ព្រោះបណ្ណាល័យសម្បូរទៅដោយសៀវភៅល្អៗនិងជាកន្លែងស្ងប់ស្ងាត់ស្រួលអាននិងស្រាវជ្រាវ។ ជាចុងក្រោយ កញ្ញាចង់ឱ្យសាលារៀនយកសៀវភៅល្អៗចូលមកឱ្យច្រើន ដើម្បីទាក់ទាញសិស្សមកអានបន្ថែមទៀត៕
យុវសិស្ស ធូ ស្រីនិច។រូបភាពពី សាត ឌិច។
អត្ថបទខ្លីសរសេរដោយ សាត ឌិច សិក្ខាកាមគម្រោងអក្ខរកម្មប្រព័ន្ធផ្សព្វផ្សាយ(MIL)រៀបចំដោយWMC៕
