ប៉ុន្មានឆ្នាំមកនេះ ការបោះពុម្ពសៀវភៅកុមារចាប់ផ្តើមកើនឡើងគួរឱ្យកត់សម្គាល់ ហើយបច្ចុប្បន្ន សៀវភៅកុមារមានការចាប់អារម្មណ៍ខ្លាំងពីសំណាក់មាតាបិតាផងដែរ។ អ្នករកស៊ីផ្នែកបោះពុម្ភសៀវភៅកុមារយល់ថា ឪពុកម្តាយមួយចំនួនមិនត្រឹមតែ​បញ្ជូនកូនទៅសាលាតែ​ម្យ៉ាងនោះទេ តែពួកគេតែងតែអប់រំកូននៅផ្ទះបន្ថែមតាមរយៈការចំណាយពេលវេលាអាន​សៀវភៅឱ្យកូនស្តាប់និងស្តាប់កូនអានជាដើម។

បើតាមប្រសាសន៍អ្នកស្រី កែម លីហៀង ដែលជាម្ចាស់គ្រឹះស្ថានក្រោមដំបូលតែមួយបានលើកឡើង​ថា សន្ទុះនៃបោះពុម្ពសៀវភៅកុមារមានការកើនឡើងច្រើន ហើយក៏សម្បូរបែបស្របតាមកម្រិតអាយុ​របស់ក្មេងផងដែរ ពិសេស​ស្នាដៃនិពន្ធថ្មីៗ​​។ សៀវភៅដែលលក់ដាច់ជាងគេ ជាសៀវភៅដែលមានសាច់រឿងខ្លីៗ មានរូបភាពស្អាត​ៗ(តួអង្គសត្វ) ហើយពាក់ព័ន្ធនឹងការរស់នៅរបស់កុមារផ្ទាល់។ ក្នុងនោះមានដូចជារឿង កូនខ្លាឃ្មុំពាក់វែនតា ដែលលក់ដាច់ជាងគេនៅគ្រឹះស្ថានរបស់អ្នកស្រី។ ចំពោះតម្លៃវិញ អ្នកស្រីថា មិនអាចលក់ក្រោម៥,០០០រៀលបានទេ ប៉ុន្តែក៏មិនអាចលក់ដល់៦,០០០រៀលដែរ។ ដូច្នេះ តម្លៃ៥,០០០រៀល គឺសមរម្យហើយសម្រាប់ប្រជាជន។

អ្នកស្រី កែម លីហៀង ម្ចាស់គ្រឹះស្ថានក្រោមដំបូលតែមួយ។រូបភាពពីសិក្ខាកាម។

ជាមួយគ្នានោះផងដែរ អ្នកស្រីយល់ថា ការអានពិតជាមានសារៈសំខាន់ខ្លាំង ព្រោះជួយបង្កើតទម្លាប់ក្មេងឱ្យចេះអានតាំងពីតូច។ ក្នុងនាមជាអ្នកផលិតសៀវភៅលក់ អ្នកស្រីសំណូមពរដល់អាណាព្យាបាលទាំងអស់ គួរតែចេះជ្រើសរើសសៀវភៅឱ្យកូនអាន ព្រោះសៀវភៅទាំងអស់មិនមែនសុទ្ធតែមានខ្លឹមសារល្អទេ ព្រោះអ្នកនិពន្ធមកពីប្រភពផ្សេងគ្នា កម្រិតចំណេះដឹងនិង​គោលបំណងក៏ផ្សេងគ្នាដែរ។ ដើម្បីដឹងថាសៀវភៅណាគួរអាន ឬមិនគួរអាន មាតាបិតាអាចមើលទំព័រដំបូងដែលសរសេរពីគោលបំណងនៃរឿងនោះជាមុន”។

សៀវភៅរឿងនិទានកុមារ។រូបភាពពីសិក្ខាកាម។

ចំណែកអ្នកស្រី កុល សៀប ជាម្ចាស់គ្រឹះស្ថាន KS Book បានលើកឡើងថា ៣-៤ ឆ្នាំចុងក្រោយនេះ ការផលិតសៀវភៅកុមារនៅកម្ពុជាមានច្រើន។ បើតាមការសង្កេតមើលនៅគ្រប់ការតាំងពិព័រណ៍​សៀវភៅពីមួយឆ្នាំទៅមួយឆ្នាំ អ្នកស្រីថាមានសៀវភៅកុមារតាំងពិព័រណ៍ច្រើន​ ប៉ុន្តែមិនទាន់សម្បូរបែបខ្លាំងនៅ​ឡើយទេ។ អ្នកស្រីថា មួយរយៈចុងក្រោយនេះ នៅកន្លែងរបស់អ្នកស្រីពុំសូវមាន​ការបោះពុម្ពថ្មីច្រើនទេ ព្រោះមមាញឹកនឹង​ការសម្រួលសៀវភៅចាស់ៗសម្រាប់បោះពុម្ពឡើងវិញ។ ចំពោះ​សៀវភៅដែលលក់ដាច់ជាងគេ ជាសៀវភៅ​កម្រិតទាប(ខ្នាតធំ) មានរូបភាពច្បាស់និងអក្សរតិចៗ ដែល​ជាទូទៅមានតម្លៃ១ដុល្លារ។ អ្នកស្រីក៏បានបន្ថែមថា ការបង្កើតទម្លាប់ឱ្យកុមារអានសៀវភៅពីតូច​ នឹងធ្វើឱ្យកុមារមានការយកចិត្តទុកដាក់ខ្ពស់និងចង​ចាំ​បានល្អ។

អ្នកស្រី កុល សៀប ជាម្ចាស់គ្រឹះស្ថាន KS Book។រូបភាពពីសិក្ខាកាម។

អ្នកស្រីយល់ទៀតថា កុមារដែលចូលចិត្តអាន តែងតែមាន​ដំណោះស្រាយដោយសន្តិភាពនិងក្នុងផ្លូវវិជ្ជ​មានជានិច្ច ព្រម​ទាំងមានសុខភាពផ្លូវចិត្តល្អទៀតផង។ ការអានជួយឱ្យកុមារអភិវឌ្ឍផ្នែកភាសា ចេះពាក្យច្រើន និយាយ​ច្បាស់ៗ​និងត្រឹមត្រូវ ហើយក៏អាចជួយឱ្យកុមារចូលចិត្តការសិក្សា មានទម្លាប់ល្អ សីលធម៌ល្អ ទំនាក់ទំនងល្អ និងក្លាយជាបុគ្គលជោគ​ជ័យ​នៅថ្ងៃអនាគត។ អ្នកស្រីសំណូមពរដល់មាតាបិតា សូមជួយណែនាំកូនៗឱ្យ​អានសៀវ​ភៅ ហើយស្វែងរកសៀវភៅល្អៗតាមកម្រិតរបស់កូន។ មាតាបិតា គួរតែមានទូសៀវភៅប្រៀបដូចជាកូនបណ្ណាល័យមួយនៅផ្ទះ ដើម្បីទុកឱ្យកូនអាន។ ម្យ៉ាងវិញទៀត សូមកាត់បន្ថយការឱ្យទូរសព្ទទៅកូនលេង មកជាការឱ្យកូនកាន់សៀវភៅវិញ។

ចំពោះអ្នកស្រី គឹមស៊ុន សុធារី ជាម្ចាស់គ្រឹះស្ថាន Reading Book បានបង្ហាញចំណាប់អារម្មណ៍ថា សព្វថ្ងៃ ការលក់សៀវភៅមិនសូវដាច់ទេ ព្រោះមានគេលួចយកទៅធ្វើវីដេអូតាមយូធូបច្រើន ហើយ​គ្រាន់​​តែប្រើគេឱ្យរីផត ក៏ចំណាយលុយមិនតិចដែរ។ ចំពោះអ្នកទិញអាន គឺមានតិចតួច ប៉ុន្តែបានតាម​សាលា​និងអង្គការជួយទិញ។ ចំពោះសៀវភៅកុមារ អ្នកស្រីថាទោះប្រភេទណាក៏លក់ដាច់លើប្រភេទរឿងបែបអប់រំជា​ប្រយោល ដោយលាយឡំនឹងភាពកំប្លុកកំប្លែង។ ទី២ រឿងអប់រំទាក់ទងនឹងសុខ​ភាពសម័យថ្មី។ ទី៣ រឿង​អភិនីហា ប្លែកៗ។ ទី៤ រឿងបុរាណល្អៗ។ ទី៥ រឿងនិទានរឿងខ្មោចបែបរន្ធត់ៗ ព្រោះរឿងខ្លះក្មេងមើលហើយ ថាអត់ខ្លាច ថាខ្មោចអន់​ៗ​។

អ្នកស្រី គឹមស៊ុន សុធារី ជាម្ចាស់គ្រឹះស្ថាន Reading Book។រូបភាពពីសិក្ខាកាម។

អ្នកស្រីក៏បានបង្ហាញចំណាប់អារម្មណ៍ថា អ្នកស្រីចង់ឱ្យ​ក្មេងមើល​សៀវភៅផ្ទាល់ជាងមើលតាមទូរសព្ទ ព្រោះនាំឱ្យប៉ះពាល់ភ្នែក។ អ្នកស្រីយល់ថា បើសិនជាក្មេងៗអានសៀវភៅផ្ទាល់ នោះនឹងពូកែអក្សរ​សាស្រ្តខ្មែរ ហើយជួយឱ្យ​ខួរ​​ក្បាលកាន់តែឆ្លាតវៃ។ តែបើចង់ឱ្យកុមារចង់អានសៀវភៅ លុះត្រាតែឪពុកម្តាយឆ្លៀតពេលអានឱ្យកូនស្តាប់​​បន្ទាប់ពីម្តាយចាប់ផ្តើមមានផ្ទៃពោះរហូតដល់កើត ទោះសៀវភៅបែបណាក៏ដោយឱ្យតែសៀវភៅល្អ មិន​ថាវែងឬខ្លី ក្រាស់ឬស្តើង គួរតែព្យាយាមពី១ម៉ោងទៅ២ម៉ោង។

ម្ចាស់រោងពុម្ភរូបនេះថា ការអានសៀវភៅបែបឮៗ នឹងជួយឱ្យកូននៅក្នុងផ្ទៃបានស្តាប់ជាមួយគ្នា លុះពេលកូនដឹងក្តីមក កូននឹងចូលចិត្តអានដោយខ្លួនឯង។ អ្នកស្រីជំរុញដល់ម្តាយៗដែលមានផ្ទៃពោះ គួរអានសៀវភៅបែបឮឱ្យកូនស្តាប់ ប្រសើរជាងមើលទូរសព្ទ ព្រោះថ្ងៃក្រោយនឹងមិនសូវហត់ក្នុងការបង្ខំ​កូនឱ្យអានសៀវភៅ។

ជាមួយគ្នានេះផងដែរ អ្នកស្រី ស៊ូ សុភី ជាអ្នកសម្របសម្រួលនៅអង្គការ Room to Read បានបង្ហាញចំណាប់អារម្មណ៍ថា ការបង្កើតទម្លាប់អានដល់កុមារតូច ពិតជាមានសារៈសំខាន់ខ្លាំង​ណាស់ ព្រោះ​ជាកម្លាំងជំរុញឱ្យកុមារមិនបោះបង់ការសិក្សា​។ អ្នកស្រីថា ពេលកុមារចេះអាន​ នឹងធ្វើឱ្យពួក​គេ​បន្តការសិក្សាពេញ​​មួយជីវិត។

អ្នកស្រី ស៊ូ សុភី ជាអ្នកសម្របសម្រួលនៅអង្គការ Room to Read។រូបភាពពីសិក្ខាកាម។

អ្នកស្រីអំពាវនាវទៅកាន់​មាតាបិតា​ទាំងអស់ មេត្តាបន្តជំរុញនិងយកពេលវេលាខ្លះ ដើម្បីចូលរួមអាននិង​ស្ដាប់ការអានរបស់កូនៗ ព្រមទាំងលើកទឹកចិត្តដល់ពួកគេ ទោះបីជាការចំណាយពេលត្រឹម១០ទៅ១៥នាទី​ក្នុងមួយថ្ងៃក៏ដោយ៕

អត្ថបទខ្លីសរសេរដោយ សាត ឌិច  សិក្ខាកាមគម្រោងអក្ខរកម្មប្រព័ន្ធផ្សព្វផ្សាយ(MIL)រៀបចំដោយWMC៕