ក្នុងជីវិតរស់នៅប្រចាំថ្ងៃគេសង្កេតឃើញថា ប្រជាជនកម្ពុជាបានផ្លាស់ប្តូរទម្លាប់ពីការប្រើប្រាស់ស្លឹកឈូក ឬស្លឹកចេកក្នុងការវេចខ្ចប់អាហារ ក៏ដូចជាសម្ភារៈផ្សេងៗ ហើយបែរមកប្រើថង់ប្លាស្ទិកជំនួសវិញ។ ការប្រើថង់ប្លាស្ទិកហួសកម្រិតបើតាមអ្នកជំនាញ ធ្វើឲ្យប៉ះពាល់ដល់បរិស្ថាន។
ដើម្បីចូលរួមដោះស្រាយបញ្ហាសំរាមនេះ មជ្ឈមណ្ឌលពិការមួយស្ថិតក្នុងភូមិសាស្រ្តក្រុងពោធិ៍សាត់ត្រូវបានបង្កើតឡើង ដើម្បីកែច្នៃកាកសំណល់និងសំរាមនានាធ្វើជាវត្ថុអនុស្សាវរីយ៍និងសម្ភារៈប្រើប្រាស់ផ្សេងៗ ជាផ្នែកមួយជួយកាត់បន្ថយសំរាមក្នុងបរិស្ថាន។
សកម្មភាពក្រុមយុវជនសម្អាតសម្បកដកមុនបញ្ចូលក្នុងរោងពុម្ភធ្វើជាវត្ថុផ្សេងៗ។រូបភាពពីធារ៉ូ។
លោក ប៉ែន ស៊ីណា ប្រធានមជ្ឈមណ្ឌលបណ្តុះបណ្តាលបរិយាប័ន្ននៃអង្គការសេវាកម្មអភិវឌ្ឍន៍ជនពិការបានឱ្យដឹងថា បច្ចុប្បន្នអង្គការមានសមាជិកសរុបចំនួន ១៩នាក់ដែលភាគច្រើនជាជនមានពិការភាព។ លោកប្រធានមជ្ឈមណ្ឌលប្រាប់បន្ថែមថា មូលហេតុដែលសម្រេចបង្កើតអង្គការនេះឡើង គឺដើម្បីផ្តល់ឱកាសដល់បងប្អូនមានពិការភាពឱ្យមានកាងារធ្វើ អាចរកប្រាក់កម្រៃបានមួយចំណែកជួយដល់ជីវភាពគ្រួសារ។ អ្វីដែលជាចំណុចស្នូរមួយទៀតនោះ គឺលោកមានបំណងចង់ជួយកាត់បន្ថយប្លាស្ទិកដែលប៉ះពាល់ដល់បរិស្ថាន និងកាត់បន្ថយកុំឱ្យចោលសំរាមពាសវាលពាសកាលនៅក្នុងក្រុងពោធិ៍សាត់ផងដែរ។
លោក ប៉ែន ស៊ីណា ប្រធានមជ្ឈមណ្ឌលបណ្តុះបណ្តាលបរិយាប័ន្ននៃអង្គការសេវាកម្មអភិវឌ្ឍន៍ជនពិការ។រូបភាពពីធារ៉ូ។
ការកែច្នៃសំរាមទៅជារបស់ប្រើប្រាស់ធ្វើពីប្លាស្ទិកនេះ ជាគម្រោងតូចមួយដែលទើបនឹងចាប់ផ្ដើមដោយក្នុងកន្លែងការងារមានពុម្ពចំនួន ២ និងម៉ាស៊ីនកាត់១។ បើតាមលោក ប៉ែន ស៊ីណា សកម្មភាពការងាររបស់បុគ្កលិកគឺផលិតដូចជា បន្ទាត់សម្រាប់ក្មេងរៀន ឥដ្ឋការ៉ូជ័រ រូបសត្វតូចៗធ្វើជាបន្តោងសោជាដើម។ ចំណែកតម្លៃវិញមានចន្លោះពី ៧០០រៀល រហូតដល់ ៤ ម៉ឺនរៀល ខណៈរបស់របរនិងសម្ភារៈកែច្នៃរួចនេះ ផលិតពីដបទឹកសុទ្ធ កែវជ័រ ចានជ័រ ដែលសាធារណជនបោះចោលនៅតាមទីសាធារណៈ និងប្រមូលពីភោជនីយដ្ឋានមួយចំនួន។
សកម្មភាពការងាររបស់ក្រុមបុគ្គលិកធ្វើសម្ភារៈពីសំរាម។រូបភាពពីធារ៉ូ។
ជាបុគ្គលិកម្នាក់ក្នុងមជ្ឈមណ្ឌលបណ្តុះបណ្តាលបរិយាប័ន្ននៃអង្គការសេវាកម្មអភិវឌ្ឍន៍ជនពិការជួបកញ្ញា កាក់ ស្រីមុំ ដែលកំពុងអង្គុយលើរទេះបានឱ្យដឹងថា កញ្ញាពេញចិត្តនឹងការងារនេះខ្លាំង ព្រោះបានជួយឱ្យយុវជនដែលមានពិការភាពមានលទ្ធភាពមានការងារធ្វើ ហើយអាចជួយសម្អាតបរិស្ថានក្នុងខេត្តពោធិ៍សាត់បានទៀតផង។ កញ្ញារៀបរាប់ពីសកម្មភាពការងារប្រចាំថ្ងៃយ៉ាងដូច្នេះថា ក្រុមការងារចុះទៅប្រមូលសំណល់ប្លាស្ទិកទាំងនោះនៅតាមទីសាធារណៈដូចជា នៅតាមតារាបាល់ទាត់ តាមផ្លូវដែលជាកន្លែងទីប្រជុំជន ភោជនីយដ្ឋាន ហាងសាឡន ហ្គារ៉ាសសាំងផ្សេងៗ ដើម្បីសុំការបរិច្ចាកប្លាស្ទិកពីម្ចាស់អាជីវកម្មទាំងនោះ។
យុវតីដែលមានពិការភាពជើងទាំងសងខាងនេះ ផ្តាំផ្ញើទៅដល់បងប្អូនដែលមានពិការភាពទាំងអស់ កុំអស់សង្ឃឹមក្នុងជីវិត ត្រូវមានភាពក្លាហាន ចេះជំរុញនិងលើកទឹកចិត្តខ្លួនឯង ពិសេសចូលរួមសកម្មភាពសង្គមឱ្យបានច្រើន កុំលាក់ខ្លួនក្នុងរណាំងឧបសគ្គ ធ្វើឱ្យខ្លួនមិនមានឱកាសបានចូលរួមបញ្ចេញសមត្ថភាព។
កញ្ញា កាក់ ស្រីមុំ បុគ្គលិកម្នាក់ក្នុងមជ្ឈមណ្ឌលបណ្តុះបណ្តាលបរិយាប័ន្ននៃអង្គការសេវាកម្មអភិវឌ្ឍន៍ជនពិការ។រូបភាពពីធារ៉ូ។
លោក ប៉ែន ស៊ីណា ប្រធានមជ្ឈមណ្ឌលបណ្តុះបណ្តាលបរិយាប័ន្ននៃអង្គការសេវាកម្មអភិវឌ្ឍន៍ជនពិការរូបនេះ សំណូមពរដល់ប្រជាពលរដ្ឋទាំងអស់ ចូលរួមជួយកាត់បន្ថយការប្រើប្រាស់ថង់ប្លាស្ទិក និងការចោលសំរាមពាសវាលពាសកាល នាំឱ្យមានគុណវិបត្តិច្រើនសម្រាប់បរិស្ថានក៏ដូចជាការប្រែប្រួលអាកាសធាតុ។ លោកជំរុញឱ្យអ្នកប្រើប្រាស់សំណល់ប្លាស្ទិករួចហើយគួររកកន្លែងទុកដាក់ឱ្យបានត្រឹមត្រូវ ឬស្វែងរកកន្លែងដែលអាចកែច្នៃម្តងទៀត ជៀសវាងទុកចោលគ្មានសណ្តាប់ធ្នាប់។
សកម្មភាពរបស់ក្រុមយុវជនដើរប្រមូលសំរាមនៅទីសាធារណៈមកធ្វើជាសម្ភារៈ។រូបភាពពីធារ៉ូ។
សូមបញ្ជាក់ថា នៅឆ្នាំ ២០២២ សំរាមដែលបានបង្កើតឡើងនៅក្នុងប្រទេសកម្ពុជាបានកើនឡើងជាង៤លានតោននៅក្នុង ១ ឆ្នាំៗ។ ដោយក្នុង ១ ថ្ងៃ មានសំរាមត្រូវបានបង្កើតឡើងចំនួនជាង ១ ម៉ឺនតោន ហើយកម្រិតនៃការកើនឡើងសំណល់រឹងសំរាមនៅប្រទេសកម្ពុជា គឺមានចន្លោះពី ១០ ទៅ ១៥ ភាគរយនៅក្នុង ១ ឆ្នាំ៕
