ហ្សាការតា៖ យោងតាម C N A ប្រទេសឥណ្ឌូនេស៊ីជាប្រធានអាស៊ាននៅថ្ងៃអង្គារទី១១ ខែកក្កដា បានគូសបញ្ជាក់អំពីសារៈសំខាន់នៃការរួបរួមគ្នារបស់អាស៊ាន ខណៈដែលរដ្ឋមន្ត្រីការបរទេសចាប់ផ្តើមកិច្ចពិភាក្សាគ្នា ដែលគេរំពឹងថានឹងមានរបៀបវារៈសំខាន់អំពីប្រទេសមីយ៉ាន់ម៉ា។ រាយការណ៍ដោយ
កិច្ចប្រជុំនៃសមាគមប្រជាជាតិអាស៊ីអាគ្នេយ៍នៅទីក្រុងហ្សាកាតា កើតឡើងនៅពេលដែលការសង្ស័យកើនឡើងនៃប្រសិទ្ធភាពរបស់អាស៊ាន ជាមួយនឹងការខ្វែងគំនិតគ្នាខ្លះអំពីដំណោះស្រាយជម្លោះបង្ហូរឈាមនៅក្នុងប្រទេសមីយ៉ាន់ម៉ា និងការបរាជ័យរបស់របបយោធាក្នុងការអនុវត្តផែនការសន្តិភាពអាស៊ានដែលបានព្រមព្រៀងគ្នា។
រដ្ឋមន្ត្រីការបរទេសឥណ្ឌូណេស៊ី Retno Marsudi មិនបាននិយាយចំៗអំពីមីយ៉ាន់ម៉ានៅក្នុងសុន្ទរកថាបើកកិច្ចប្រជុំពេញអង្គកាលពីថ្ងៃអង្គារទី១១ កក្កដានេះទេ ប៉ុន្តែបាននិយាយថា អាស៊ាន “អាចមានបញ្ហាបានលុះត្រាតែយើងមានភាពជឿជាក់គ្នា”។លោកស្រីបានបន្តថា៖ «ដូច្នេះយើងគ្មានជម្រើសអ្វីក្រៅពីការបង្ហាញថាអាស៊ានអាចស្វែងរកសក្ដានុពលក្នុងតំបន់ និងពិភពលោក ហើយបន្តធ្វើជាគំរូនៃកិច្ចសហប្រតិបត្តិការ»។«យើងអាចសម្រេចបានលុះត្រាតែយើងរក្សាឯកភាពអាស៊ាន និងភាពជាកណ្តាល»។
មីយ៉ាន់ម៉ាកើតមានការចលាចលចាប់តាំងពីយោធាបានដណ្តើមអំណាចនៅដើមឆ្នាំ២០២១ ដោយមានការបង្រ្កាបយ៉ាងខ្លាំងក្លាលើគូប្រជែងដែលគាំទ្រលទ្ធិប្រជាធិបតេយ្យ និងបង្កើតឱ្យមានចលនាតស៊ូប្រដាប់អាវុធ និងជម្លោះកាន់តែតានតឹង។
អាស៊ានបានរារាំងរបបយោធាមិនឱ្យចូលរួមក្នុងកិច្ចប្រជុំកម្រិតខ្ពស់ដោយសារប្រទេសនេះមិនបានគោរពការប្តេជ្ញាចិត្តរបស់ខ្លួនចំពោះ “កិច្ចព្រមព្រៀងសន្តិភាពប្រាំចំណុច”កាលពី២ឆ្នាំមុន។ឥណ្ឌូណេស៊ីបាននិងកំពុងព្យាយាមផ្តួចផ្តើមដំណើរការសន្តិភាពនៅពីក្រោយឆាកដោយការចូលរួមពីភាគីពាក់ព័ន្ធសំខាន់ៗ។
ក្រុមសិទ្ធិមនុស្ស និងអ្នកជំនាញអង្គការសហប្រជាជាតិមួយចំនួនបានចោទប្រកាន់យោធាមីយ៉ាន់ម៉ាថាបានប្រព្រឹត្តអំពើឃោរឃៅលើជនស៊ីវិល។តែក្រុមយោធានិយាយថាពួកគេកំពុងប្រយុទ្ធជាមួយ “ភេរវករ” ។ថ្មីៗនេះប្រធានសិទ្ធិមនុស្សអង្គការសហប្រជាជាតិលោក Volker Turk បានជំរុញឱ្យក្រុមប្រឹក្សាសន្តិសុខអង្គការសហប្រជាជាតិ បញ្ជូនសំណុំរឿងអំពើហឹង្សាដែលកំពុងកើនឡើងនៅភូមាទៅកាន់តុលាការឧក្រិដ្ឋកម្មអន្តរជាតិ និងឱ្យប្រទេសនានាបញ្ឈប់ការផ្គត់ផ្គង់អាវុធដល់របបយោធា។ កិច្ចប្រជុំនៅថ្ងៃអង្គារនេះ ធ្វើឡើងនៅមុនកិច្ចប្រជុំកំពូលអាស៊ីបូព៌ា និងវេទិកាតំបន់អាស៊ាន នៅចុងសប្តាហ៍នេះ ដោយមានរដ្ឋមន្ត្រីការបរទេសអាមេរិក លោក Antony Blinken និងរដ្ឋមន្ត្រីការបរទេសរុស្ស៊ី លោក Sergei Lavrov គ្រោងនឹងចូលរួមផងដែរ។ ប្រទេសចិនកាលពីថ្ងៃអង្គារទី១១ កក្កដាបានបញ្ជាក់ថារដ្ឋមន្ត្រីការបរទេសរបស់ខ្លួនគឺលោក Qin Gang នឹងមិនចូលរួមកិច្ចប្រជុំនេះទេដោយសារហេតុផលសុខភាព។ ប្រទេសចិនបាននិយាយថាអ្នកការទូតកំពូលរបស់ខ្លួនគឺលោក Wang Yi នឹងចូលរួមជំនួសវិញ៕
ប្រភព៖ The C N A ថ្ងៃទី ១១ ខែ កក្កដា ឆ្នាំ ២០២៣
