លោក ហង្ស ពុទ្ធា សមាជិក និងជាអ្នកនាំពាក្យគណៈកម្មាធិការជាតិរៀបចំការបោះឆ្នោត បានបញ្ជាក់ពីតម្រូវការខុសគ្នារវាងការបោះឆ្នោតឃុំ-សង្កាត់ ការបោះឆ្នោតក្រុមប្រឹក្សាក្រុង ស្រុក ខណ្ឌ និងការបោះឆ្នោតថ្នាក់ជាតិ ឬតំណាងរាស្ដ្រ។
លោក ឡាក់ ច័ន្ទតារា ជូននូវសេចក្ដីរាយការណ៍៖
លោក ហង្ស ពុទ្ធា សមាជិក និងជាអ្នកនាំពាក្យគណៈកម្មាធិការជាតិរៀបចំការបោះឆ្នោត បានបញ្ជាក់ពីតម្រូវការខុសគ្នារវាងការបោះឆ្នោតឃុំ-សង្កាត់ ការបោះឆ្នោតក្រុមប្រឹក្សាក្រុង ស្រុក ខណ្ឌ និងការបោះឆ្នោតថ្នាក់ជាតិ ឬតំណាងរាស្ដ្រ។លោកបានលើកឡើងក្នុងថ្ងៃចាប់លេខរៀងគណបក្សថា ការអនុញ្ញាតឱ្យគណបក្សភ្លើងទៀនចូលរួមក្នុងការបោះឆ្នោតឃុំ-សង្កាត់កាលពីឆ្នាំ២០២២ និងការបោះឆ្នោតក្រុមប្រឹក្សាស្រុកកាលពីពេលកន្លងទៅថ្មីៗនេះ ដោយសម្រេចឱ្យប្រើតែឯកសារកូពីនៃប្រកាសស្តីពីការចុះបញ្ជីគណបក្សនយោបាយនៅក្រសួងមហាផ្ទៃមិនចាំបាច់ធ្វើនីត្យានុកូលកម្ម ដោយសារនោះជាការបោះឆ្នោតថ្នាក់ក្រោមជាតិ។
ដោយឡែកសម្រាប់ការបោះឆ្នោតថ្នាក់ជាតិ ឬតំណាងរាស្ដ្រ លោក ហង្ស ពុទ្ធា បានបញ្ជាក់ថា ត្រូវការឯកសារដើម យកទៅធ្វើនីត្យានុកូលកម្ម ហើយការធ្វើនេះតាំងពីការបោះឆ្នោតតំណាងរាស្ដ្រឆ្នាំ២០១៨មកម្លេះ។ លោកថា ដោយសារកាលពីនិតិកាលមុនគណបក្សភ្លើងទៀនមិនបានចូលរួមទើបមានការឆកល្វែងបែបនេះ។
សូមជម្រាបថា ដោយសារខ្វះឯកសារដើមយកទៅចម្លងនិងធ្វើនីត្យានុកូលកម្ម គ.ជ.បបានសម្រេចឱ្យគណបក្សភ្លើងទៀន និងគណបក្សមហាសាមគ្គីជាតិខ្មែរ មិនអាចចូលរួមធ្វើការប្រកួតប្រជែងការបោះឆ្នោតថ្នាក់ជាតិនាថ្ងៃទី២៣ ខែកក្កដា ឆ្នាំ២០២៣ខាងមុខឡើយ។
គណបក្សភ្លើងទៀនបានព្យាយាមធ្វើសកម្មភាពជាច្រើនដើម្បីចូលរួមការបោះឆ្នោត តែជាលទ្ធផលចុងក្រោយ ក្រុមប្រឹក្សាធម្មនុញ្ញនៅតែមិនអនុញ្ញាតឱ្យបក្សនេះចូលរួមដដែល។ គណបក្សភ្លើងទៀនថែមទាំងរងការចោទពីប្រមុខរាជរដ្ឋាភិបាលថា មានអ្នកលួចលាក់ឯកសារដើមមិនចូលរួមដំណើរការឆ្នោត ដើម្បីឱ្យបរទេសដាក់សម្ពាធមកលើកម្ពុជា។តែទោះជាយ៉ាងណានៅថ្ងៃទី៣០ខែឧសភា ឆ្នាំ២០២៣ គណបក្សភ្លើងទៀនបានចេញមុខប្រកាសយ៉ាងដាច់អហង្ការចំពោះការចោទប្រកាន់នេះ៕
