តូក្យូ៖ កាសែត Yomiuri បានរាយការណ៍នៅថ្ងៃអង្គារទី១៨ មេសា ថាជនសង្ស័យដែលបានគប់គ្រាប់បែកផ្សែងទៅលើនាយករដ្ឋមន្ត្រីជប៉ុន លោក Fumio Kishida អះអាងថាលោកត្រូវបានរារាំងដោយអយុត្តិធម៌ក្នុងការឈរឈ្មោះការបោះឆ្នោតសភាជាន់ខ្ពស់នៃប្រទេសជប៉ុន។
សេចក្ដីរាយការណ៍បានឱ្យដឹងថាជនសង្ស័យឈ្មោះ Ryuji Kimura បានដាក់ពាក្យបណ្តឹងនៅតុលាការស្រុក Kobe កាលពីខែមិថុនាឆ្នាំមុន ដោយអះអាងថាលោកមិនអាចឈរឈ្មោះការបោះឆ្នោតកាលពីថ្ងៃទី ១០ ខែកក្កដា ដោយសារអាយុរបស់លោក និងមិនមានលទ្ធភាពក្នុងការបង់ប្រាក់កក់ចំនួន 3 លានយ៉េនគឺស្មើនឹង ២២.៣៣៩ ដុល្លារអាមេរិក(២ម៉ឺន២ពាន់៣រយសាមសិបប្រាំបួន)។
យោងតាមកំណត់ត្រារបស់ជនសង្ស័យឈ្មោះ Kimura បានអះអាងថាច្បាប់បោះឆ្នោតបានរំលោភលើរដ្ឋធម្មនុញ្ញ ដែលចែងអំពីភាពស្មើគ្នានៅចំពោះមុខច្បាប់ និងច្បាប់ទាំងឡាយត្រូវអនុលោមតាមរដ្ឋធម្មនុញ្ញ។
របាយការណ៍កាសែត Yomiuri បានសរសេរថា តុលាការបានច្រានចោលការទាមទាររបស់ជនសង្ស័យឈ្មោះ Kimura អាយុ ២៤ឆ្នាំ ដែលបានទាមទារសំណងជំងឺចិត្តចំនួន ១០ម៉ឺនយ៉េន។
ជនសង្ស័យឈ្មោះKimura បានប្តឹងឧទ្ធរណ៍ទៅតុលាការកំពូល Osaka ជំទាស់នឹងការសម្រេចនេះ ហើយសវនាការគ្រោងនឹងធ្វើនៅខែឧសភាឆ្នាំ២០២៣នេះ។ទោះយ៉ាងណារហូតមកដល់ពេលនេះជនសង្ស័យ Kimura មិនទាន់ត្រូវបានចោទប្រកាន់នៅឡើយទេ។
អាជ្ញាធរជប៉ុនបានឆែកឆេរផ្ទះរបស់លោក Kimura កាលពីថ្ងៃអាទិត្យនៅទីក្រុង Kawanishi ក្នុងសង្កាត់ Hyogo បន្ទាប់ពីលោកត្រូវបានចាប់ខ្លួននៅកន្លែងកើតហេតុ ដោយត្រូវបានចោទប្រកាន់ថាបានប៉ុនប៉ងវាយប្រហារលោកនាយករដ្ឋមន្រ្តីKishida ក្នុងអំឡុងពេលលោកថ្លែងសុន្ទរកថានៅទីក្រុង Wakayama។
សូមរំលឹកផងដែរថា កាលពីថ្ងៃសៅរ៍ ទី១៥ មេសា គ្រាប់បែកផ្សែងមួយបានគប់ទៅលើនាយករដ្ឋមន្រ្តីជប៉ុន លោក Fumio Kishida នៅក្នុងព្រឹត្តិការណ៍យុទ្ធនាការបោះឆ្នោតនៅកំពង់ផែនេសាទក្នុងទីក្រុង Wakayama ភាគខាងលិចប្រទេសជប៉ុន។