យោធាមួយក្រុមបានបាញ់គ្រាប់កាំភ្លើងពិត ទៅលើក្រុមប្រជាពលរដ្ឋ ក្នុងទំនាស់ដីធ្លីមួយកន្លែងនៅស្រុកអង្គស្នួល ខេត្តកណ្ដាល កាលពីព្រឹកថ្ងៃព្រហស្បតិ៍ ទី៣ មិថុនា ។ ហេតុការណ៍នេះ បានបណ្ដាលឱ្យពលរដ្ឋរងរបួសធ្ងន់ និងត្រូវបានគេដឹកយកទៅសង្គ្រោះបន្ទាន់។ ក្រុមសិទ្ធិមនុស្សថ្កោលទោសការបាញ់ប្រហារលើពលរដ្ឋនេះ។ ក្រោយពីព្រឹត្តិការណ៍នេះកើតឡើង រដ្ឋបាលខេត្តកណ្ដាល ចេញសេចក្ដីបំភ្លឺ។
រដ្ឋបាលខេត្តកណ្តាល បានអះអាងថា ដីក្នុងតំបន់ដែលប្រជាពលរដ្ឋតវ៉ានោះជាដីរដ្ឋ ដែលរដ្ឋាភិបាលគ្រោងរៀបចំមួយផ្នែកសម្រាប់ប្រើប្រាស់ជាប្រយោជន៍វិស័យការពារជាតិនិងមួយផ្នែកទៀតប្រើប្រាស់សម្រាប់វិស័យបរិស្ថាន គឺជាទីតាំងដាក់សំរាម ។
រដ្ឋបាលខេត្តកណ្តាលបានចេញសេចក្តីជូនដំណឹងដូចនេះកាលពីថ្ងៃព្រហស្បតិ៍ ទី៣ មិថុនាបន្ទាប់មានការប៉ះទង្គិចគ្នាមួយប្រ៉ាវរវាងយោធាមួយក្រុមនិងពលរដ្ឋ ទាមទារដីនៅតំបន់នោះដោយក្រុមយោធាបានបាញ់គ្រាប់កាំភ្លើង លើពលរដ្ឋ បណ្ដាលអោយពលរដ្ឋម្នាក់រងរបួស។
រដ្ឋបាលខេត្តកណ្តាលលើកឡើងថា ដីក្នុងតំបន់ដែលប្រជាពលរដ្ឋតវ៉ានោះជាដីរដ្ឋហើយថាពលរដ្ឋបានបិទផ្លូវជាតិលេខ៥១នៅចំណុចដែលគេហៅថា«ដីចម្ការបារាំង»។
តែបែបណា រដ្ឋបាលខេត្តកណ្តាលឲ្យដឹងទៀតថាក្រុមការងារគណៈកម្មការអន្តរក្រសួងកំពុងខិតខំសិក្សាស្រាវជ្រាវដើម្បីឈានដល់ការដោះស្រាយគោលនយោបាយជូនប្រជាពលរដ្ឋដែលបានអាស្រ័យផលពិតប្រាកដ ក្នុងរង្វង់ដីប្រមាណ២៨០ហិកតា។
មន្រ្តីសិទ្ធិមនុស្សឲ្យដឹងថាពលរដ្ឋម្នាក់បានរងរបួសខ្នង ដោយសារការបាញ់ប្រហារដោយគ្រាប់កាំភ្លើងពីកម្លាំងទាហានរាប់សិបនាក់ នៅក្នុងការប្រឈមដាក់គ្នាមួយនៃជម្លោះដីធ្លី។
អ្នកស្រី ចក់ សុភាព នាយិកានៃមជ្ឈមណ្ឌលសិទ្ធិមនុស្សកម្ពុជា បានធ្វើរបាយការណ៍អំពីហេតុការណ៍នេះថា បានកើតឡើងនៅព្រឹកថ្ងៃទី៣ ខែមិថុនា បន្ទាប់ពីក្រុមយោធាបានដាក់គ្រឿងចក្រឈូសឆាយដីស្រែដែលមានទំនាស់ជាមួយប្រជាពលរដ្ឋ នៅភូមិអង្គស្រែពោធិ៍ ឃុំទួលព្រិច ស្រុកអង្គស្នួល ខេត្តកណ្តាល ហើយពលរដ្ឋជាង ៣០០នាក់ បានលើកគ្នាទៅឃាត់គ្រឿងចក្រនោះ។
អ្នកស្រី បញ្ជាក់ថា ករណីប្រើប្រាស់អាវុធលើពលរដ្ឋនេះ មិនមែនថ្មីទេ គឺមានករណីពីមុនៗបានកើតឡើងដូចនេះដែរ ។ អ្នកស្រី ទទូចថា ការប្រើប្រាស់កម្លាំងនិងអាវុធមិនសមាមាត្រនេះ ត្រូវតែបញ្ឈប់និងមានការស៊ើបអង្កេតឱ្យបានច្បាស់លាស់ ព្រមទាំងអ្នកដែលល្មើសត្រូវប្រឈមមុខតាមនីតិវិធីច្បាប់។
ភ្លាមៗនោះអង្គការលីកាដូ បានបញ្ជូន ក្រុមការងារ ចុះទៅដល់កន្លែងកើតហេតុនិងបានរាយការណ៍ថាបុរសរងរបួសនោះមានឈ្មោ អ៊ុំ រដ្ឋា អាយុ៥៦ឆ្នាំ ជាកសិករ ដែលជាភាគីជម្លោះដីធ្លី។
ក្នុងវីដេអូមួយមានរយៈពេលជាង៤នាទីដែលត្រូវបានបង្ហោះនៅលើបណ្តាញសង្គមហ្វេសប៊ុក ប្រជាពលរដ្ឋបានស្រែកថាកម្លាំងទាហានបានបាញ់គ្រាប់ពិត។
វីដេអូនេះបង្ហាញថាអ្នកតវ៉ាម្នាក់បានរងរបួសនឹងគ្រាប់កាំភ្លើងត្រង់ឆ្អឹងជំនីរលើស្មាខាងធ្វេង ដោយមានឈាមហូរលើអាវយឺតសរបស់ជនរងគ្រោះ។
នៅពុំទាន់ឃើញ គណៈកម្មាធិការសិទិ្ធមនុស្សរាជរដ្ឋាភិបាល កម្ពុជាមានប្រតិកម្មអ្វីនៅឡើយទេចំពោះព្រឹត្តិការណ៍នាំអោយមានការប៉ះទង្គិចគ្នារវាងពួកយោធាជាមួយ ជនស៊ីវិល ដែលក្រុមអង្គការសិទិ្ធមនុស្ស ចាត់ទុកថា ជាការរំលោភសិទិ្ធមនុស្ស ថ្មីមួយទៀត ។ ប៉ុន្តែស្ថាប័នសិទ្ធិមនុស្សរបស់រដ្ឋាភិបាលមួយនេះ តែងតែ អះអាងថា កម្ពុជា ជាប្រទេសមានការគោរពសិទិ្ធមនុស្ស ល្អប្រសើរដោយស្ថិតនៅក្រោមនីតិរដ្ឋរបស់កម្ពុជា គឺដូចនឹងប្រទេសជាច្រើន នៅលើពិភពលោកដែរ៕