កំពង់ធំ ៖ ក្រុមស្ត្រីជាបេក្ខភាពឈរឈ្មោះក្រុមប្រឹក្សាឃុំ-សង្កាត់តំណាងឱ្យគណបក្សនយោបាយចំនួន ០៤ ស្ថិតនៅស្រុកសន្ទុក ខេត្តកំពង់ធំ បានលើកឡើងថា ពួកគេត្រូវការជំនាញទំនាក់ទំនង និង ការប្រើប្រាស់ប្រព័ន្ធផ្សព្វផ្សាយ ដើម្បីទទួលនិងប្រមូលព័ត៌មាននៅក្នុងមូលដ្ឋានរបស់ខ្លួនឱ្យងាយស្រួលដោះស្រាយបញ្ហាជួយសហគមន៍នៅពេលបំពេញតួនាទី។
ក្រុមស្ត្រីជាបេក្ខភាពឈរឈ្មោះក្រុមប្រឹក្សាឃុំ-សង្កាត់មកពីគណបក្សនយោបាយទាំង ៤នេះ យល់ថា ដើម្បីដោះស្រាយបញ្ហានៅក្នុងសហគមន៍របស់ខ្លួនឱ្យបានប្រសើរ ក្នុងនាមជាថ្នាក់ដឹកនាំមូលដ្ឋាន ត្រូវចេះប្រាស្រ័យទាក់ទងល្អជាមួយពលរដ្ឋ ដើម្បីប្រមូលនិងទទួលព័ត៌មាន ព្រមទាំងឆ្លើយតបទៅកាន់ប្រជាពលរដ្ឋវិញឱ្យមានប្រសិទ្ធិភាព ។
ការថ្លែងចាប់អារម្មណ៍របស់ស្ត្រីទាំងនេះ ធ្វើឡើងក្នុងវគ្គបណ្តុះបណ្តាលមួយ ស្តីពីជំនាញទំនាក់ទំនងនិងការប្រើប្រាស់ប្រព័ន្ធផ្សព្វផ្សាយ រៀបចំឡើងដោយមណ្ឌលព័ត៌មានស្រ្តីកម្ពុជា (WMC) នៅក្នុងស្រុកសន្ទុក ខេត្តកំពង់ធំ ចាប់ផ្តើមនៅថ្ងៃទី ០៣ ខែមេសានេះ។
ក្នុងចំណោមស្ត្រីទាំងនេះ អ្នកស្រី សំ ភី ជាបេក្ខនារីឈរឈ្មោះក្រុមប្រឹក្សាឃុំ មកពីគណបក្សសង្គ្រោះជាតិនៅ ឃុំគគីរជួរ ស្រុកសន្ទុក ខេត្តកំពង់ធំ បានលើកឡើងថា នៅក្នុងភូមិ-ឃុំរបស់អ្នកស្រីមានបញ្ហាជាច្រើនដែលប្រជាពលរដ្ឋកំពុងជួបប្រទះ។ អ្នកស្រីកត់សម្គាល់ថា បញ្ហាអំពើហិង្សាក្នុងគ្រួសារ សុវត្ថិភាពភូមិ-ឃុំ បញ្ហាមុខរបរនិងជីវភាពរបស់ប្រជាពលរដ្ឋ ប្រសិនបើអ្នកដឹកនាំថ្នាក់មូលដ្ឋាន មិនបានសិក្សា ឬស្វែងយល់ឱ្យបានស៊ីជម្រៅ, មិនចេះទំនាក់ទំនងជិតស្និទ្ធនឹងប្រជាពលរដ្ឋ នោះនៅក្នុងសហគមន៍នឹងជួបបញ្ហាអសកម្មមិនចេះចប់ឡើយ ។
មិនខុសពីបេក្ខជនបក្សនយោបាយខាងលើ អ្នកស្រី ជុំ ធារ៉ែន ឈរឈ្មោះជាក្រុមប្រឹក្សាឃុំតាំក្រសាំង ស្រុកសន្ទុក មកពីគណបក្សប្រជាជនកម្ពុជា បានចាប់អារម្មណ៍ថា កន្លងទៅអ្នកស្រីពុំដឹងថា ការរក្សាទំនាក់ទំនងល្អជាមួយប្រជាពលរដ្ឋសំខាន់កម្រិតណានោះទេ សម្រាប់ការអភិវឌ្ឍន៍ភូមិ ឃុំ ឬ ជីវភាពរបស់ប្រជាពលរដ្ឋ។ ប៉ុន្តែអ្នកស្រីបានជួយដោះស្រាយបញ្ហាជាច្រើនជូនប្រជាពលរដ្ឋ ។
បេក្ខជនបក្សនយោបាយរូបនេះ បានសង្កត់ធ្ងន់ថា ជំនាញទំនាក់ទំនងចាំបាច់បំផុតសម្រាប់ការចូលរួមរបស់អ្នកស្រីក្នុងវិស័យនយោបាយ ហើយប្រសិនបើក្រុមប្រឹក្សាឃុំគ្រប់រូប ទទួលបានការបណ្តុះបណ្តាលពីជំនាញទំនាក់ទំនងនេះ គឺអនាគតភូមិ-ឃុំ នឹងមានអ្នកដឹកនាំល្អ យល់ដឹងច្បាស់ពីតម្រូវការ និងសុខទុករបស់ពលរដ្ឋ ។
ចំណែកលោក រស់ គង់ អ្នកបណ្តុះបណ្តាលវគ្គស្តីពីជំនាញទំនាក់ទំនង និង ការប្រើប្រាស់ប្រព័ន្ធផ្សព្វផ្សាយ បានលើកឡើងថា ការបណ្តុះបណ្តាលដល់បេក្ខនារីគណបក្សនយោបាយក្នុងការឈរឈ្នោះបោះឆ្នោតឃុំ-សង្កាត់ គឺសំខាន់ដើម្បីដោះស្រាយបញ្ហាអ្វីមួយដែលប្រជាពលរដ្ឋក្នុងសហគមន៍ជួបប្រទះ នៅពេលបេក្ខនារីបក្សនយោបាយអាចក្លាយជាអ្នកដឹកនាំថ្នាក់មូលដ្ឋាន។
លោកបន្ថែមថា នៅពេលដែលថ្នាក់ដឹកនាំមូលដ្ឋានស្គាល់ច្បាស់ពីតម្រូវការរបស់ប្រជាពលរដ្ឋខ្លួន គឺត្រូវ បង្ខិតខ្លួនស្តាប់បញ្ហាពីប្រជាពលរដ្ឋ ទើបធ្វើឱ្យការអភិវឌ្ឍន៍ភូមិ-ឃុំកាន់តែរីកចម្រើនថែមទៀត។
សូមជម្រាបថា វគ្គបណ្ដុះបណ្ដាលដែលមណ្ឌលព័ត៌មានស្ត្រីកម្ពុជា (WMC) ដឹកនាំការបង្ហាត់បង្រៀននេះ គឺ ក្រោមការឧបត្ថម្ភថវិការពីសហភាពអឺរ៉ុប តាមរយៈអង្គការអភិវឌ្ឍន៍ប្រព័ន្ធផ្សព្វផ្សាយអាឡឺម៉ង់ (DW) ធ្វើឡើងរយៈពេល ០៣ ថ្ងៃដោយ ចាប់ពីថ្ងៃទី ០៤ ដល់ថ្ងៃទី០៧ ខែមេសា ឆ្នាំ ២០១៧ ។
វគ្គបណ្ដុះបណ្ដាលនេះ ត្រូវបង្ហាត់បង្រៀនដល់បេក្ខនារីចំនួន ២៨ រូបមកពីគណបក្សនយោបាយចំនួន ០៤ ដែលបានដាក់បេក្ខជនរបស់ខ្លួននៅក្នុងការបោះឆ្នោតក្រុមប្រឹក្សាឃុំសង្កាត់ នៅស្រុកបារាយណ៍ និង ស្រុកសន្ទុក ខេត្តកំពង់ធំ។ ការបោះឆ្នោតក្រុមប្រឹក្សាអាណត្តិទី៥ នឹងប្រព្រឹត្តទៅនៅថ្ងៃទី ០៤ ខែមិថុនា ឆ្នាំ ២០១៧ ខាងមុខនេះ៕
