ព័ត៌មានក្នុងប្រទេស

សម្តេចថា កម្ពុជាមិនយកប្រទេសណាជាគម្រូក្នុងការដឹកនាំឡើយ

ភ្នំពេញ៖សម្តេចនាយករដ្ឋមន្ត្រី ហ៊ុន សែន មានប្រសាសន៍ថា ការដឹកនាំរបស់លោករហូតមកដល់ពេលនេះ សម្ដេចមិនដែលយកប្រទេសណាធ្វើជាគម្រូ ទោះជាប្រទេសនោះជឿនលឿន ឬរីកចម្រើនយ៉ាងណាក៏ដោយ ។ អ្វីដែលសម្ដេចធ្វើគឺស្របទៅនឹងស្ថានភាពប្រទេសកម្ពុជា ។ តែអ្នកតាមដានបញ្ហាសង្គមយល់ថារាល់ការដឹកនាំ តែងមានការផ្សារភ្ជាប់ទៅនឹងទ្រឹស្តីវិទ្យានយោបាយ ឬសេដ្ឋកិច្ចពីខាងណាមួយ ។ កញ្ញា ឆេង ណាតា រាយការណ៍ព័ត៌មាននេះ៖

ស្តាប់សំឡេង៖

Hun-Sen-120516 — សម្តេចនាយករដ្ឋមន្ត្រី ហ៊ុន សែន

ថ្លែងក្នុងកម្មវិធីចែកសញ្ញាបត្រដល់និស្សិត IIC នៅវិទ្យាស្ថានជាតិអប់រំ នៅព្រឹកថ្ងៃទី១២ខែឧសភានេះ សម្តេចនាយករដ្ឋមន្ត្រី ហ៊ុន សែន មានប្រសាសន៍ថា សម្ដេច មិនយកប្រទេសណាធ្វើជាគម្រូក្នុងការដឹកនាំប្រទេសនោះទេ ។

សម្ដេចបន្តថា ប្រទេសលើពិភពលោក មានស្តង់ដារច្រើន ហើយមិនទាន់មានប្រទេសណាមួយអាចយកធ្វើជាស្តង់ដារបានទេ ។ សម្ដេចថា ប្រទេសខ្លះដើរវាយគេ ហើយប្រទេសខ្លះទៀតអាងខ្លួនជាអ្នកមានដាក់ទណ្ឌកម្មគេ ។ ដោយសារមើលឃើញដូចនេះសម្ដេច មិនអាច យកប្រទេសណាជាគ្រូទេ គឺធ្វើទៅតាមសភាពការរបស់ប្រទេស ។

សម្តេច ហ៊ុន សែន ៖ «អញ្ចឹងបានខ្ញុំកម្រប្រើពាក្យថាឱ្យដូចប្រទេសជឿនលឿននានា លើពិភពលោក ខ្ញុំកម្រប្រើណាស់ព្រោះប្រទេសជឿនលឿនវាមានច្រើនដែរ តើយើងធ្វើតាមអ្នកណា យកអ្វីធ្វើជាគម្រូ ហើយជួនកាលគេទៅមុនយើង២០០ឆ្នាំបាត់ហើយ ហើយយើងទើបតែចាប់ផ្តើមឡឹះគឹះៗ ហើយទៅធ្វើអីដូចគេមេច» ។

សម្តេចនាយករដ្ឋមន្ត្រី មានប្រសាសន៍បន្តថា បទពិសោធន៍ខ្លះ លោកនឹងរៀនសូត្រពីគេ តែយកមកច្នៃឱ្យជារបស់កម្ពុជាវិញ ។ សម្ដេចបន្ថែមថាអាចមានបទពិសោធន៍ប្រទេសខ្លះដូចកម្ពុជា ប៉ុន្តែមិនត្រូវចម្លងយកមកទាំងស្រុងនោះទេ គឺធ្វើទៅតាមសភាពជាក់ស្តែងនៃកម្ពុជា ។

សម្តេច ហ៊ុន សែន ៖«ខ្ញុំមិនអាចយកអ្នកណាមួយធ្វើជាគម្រូ ខ្ញុំធ្វើតម្រូវតាមស្ថានភាពនៃប្រទេសរបស់ខ្ញុំ ។ ឥលូវនេះវាក៏ដូចគ្នាដែរ ធ្វើតាមអ្នកណាបើធ្វើតាមនៅអឺរ៉ុប ធ្វើតាមក្រិច ក្រិចគិតតែពីខ្ចីលុយគេ គិតតែពីបន្ថយប្រាក់ចំណូល និងបន្ថែមពន្ធ បារាំងគោលនយោបាយរបស់ប្រធានាធិបតីហូឡង់ គាត់ជំរុញការចំណាយដើម្បីជំរុញកំណើន ប៉ុន្តែឥលូវវាទៅជាអត់» ។

តែសម្រាប់អ្នកវិភាគបញ្ហាសង្គម យល់ផ្សេងពី ទស្សនៈរបស់សម្ដេចនាយករដ្ឋមន្ត្រីគឺ ការដឹកនាំ ប្រព័ន្ធសេដ្ឋកិច្ច និងនយោបាយ ។

លោក មាស នី អ្នកស្រាវជ្រាវពីការអភិវឌ្ឍសង្គម បានមានប្រសាសន៍ថា ការលើកឡើងនេះគ្រាន់តែជាការយល់ឃើញរបស់សម្តេចនាយករដ្ឋមន្ត្រីតែប៉ុណ្ណោះ ប៉ុន្តែរាល់ការដឹកនាំតែងមានការផ្សារភ្ជាប់ទៅនឹងទ្រឹស្តីវិទ្យានយោបាយ ពីខាងមួយគឺ អាចតាមទម្រង់ប្រទេសខាងលិច ប្រទេសខាងកើត ឬតាមកុម្មនីសជាដើម ។ លោកពន្យល់ថា ប្រព័ន្ធដឹកនាំសេដ្ឋកិច្ចគឺកម្ពុជា ក៏ប្រហាក់ប្រហែលប្រទេសដទៃដែរ តែបើនិយាយពីប្រព័ន្ធ នយោបាយ គឺដូចប្រទេសភូមា ។

លោក មាស នី ៖ «គឺយើងឃើញថាស្ថានភាពសព្វថ្ងៃនេះវាស្រដៀងគ្នានឹងនៅប្រទេសភូមានៅមុនពេលបោះឆ្នោតកន្លងទៅថ្មី ដែលសង្កេតឃើញ ដែលមានការ ដូចជាសកម្មជន អ្នកនយោបាយអីត្រូវបានទទួលរងនូវការចាប់ចងគឺយើងឃើញដូចនៅភូមា ។ នៅភូមាយើងនៅមុនពេលបោះឆ្នោត អ្នកទោសនយោបាយប្រមាណជិតបីពាន់ត្រូវបានឃុំឃាំង» ។

ប្រទេសកម្ពុជា បានឆ្លងកាត់របបជាច្រើនមកហើយ គឺមានរបបអាណាព្យាបាលបារាំង របបសង្គមរាស្ត្រនិយម របស់សម្ដេចឪ នរោត្តមសីហនុ របបសាធារណៈរដ្ឋលន់នល់ របប កម្ពុជាប្រជាធិបតេយ្យ (ខ្មែរក្រហម) របបប្រជាមានិតកម្ពុជា (កុម្មុយនិស្ត) និងបច្ចុប្បន្ន របបរាជានិយម អាស្រ័យរដ្ឋធម្មនុញ្ញ ។

ប្រទេសកម្ពុជា ត្រូវបានមើលឃើញថាមានលំនាំសេដ្ឋកិច្ច មិនខុសពីប្រទេសដទៃនោះទេ គឺមានលំហូរទីផ្សារ លំហូរវិនិយោគទុន និងលំហូរហិរញ្ញវត្ថុក្នុងការអភិវឌ្ឍន៍ ប្រទេសប្រហាក់ប្រហែលគ្នា ។ តែកម្ពុជា ក៍ត្រូវបានរាប់ថាជាប្រទេសមានបំណុលសាធារណៈ និងបំណុលប្រទេស មានទំហំច្រើនគួរឱ្យព្រួយបារម្ភ ដែរ ។ បើតាមតួលេខ របស់បក្សប្រឆាំងថាកម្ពុជា ជំពាក់បំណុលបរទេស ជិត៦០០០លានដុល្លារ ៕

Post Views: 431