ភ្នំពេញ៖សម្តេច ស ខេង រដ្ឋមន្ត្រីក្រសួងមហាផ្ទៃបានថ្លែងនៅក្នុងពិធីបិទសន្និបាទស្តីពីលទ្ធផលការងារត្រួតពិនិត្យគ្រឿងញៀនកាលពីថ្ងៃទី៥ ខែកុម្ភៈ ឆ្នាំ ២០១៨នេះដោយបង្ហាញក្តីព្រួយបារម្ភអំពីយុទ្ធនាការបង្ក្រាបគ្រឿងញៀនដោយចាប់បានជនសង្ស័យជាង១ម៉ឺន៨ពាន់នាក់នាំឲ្យង្អៀតណែនពន្ធនាគារ ស្របពេលក្រសួងយុត្តិធម៌កំពុងដំណើរអំពីការនុវត្តទោសការងារសហគមន៍។
សម្តេច ស ខេង រដ្ឋមន្ត្រីក្រសួងមហាផ្ទៃបាន បង្ហាញក្តីព្រួយបារម្ភអំពីភាពចង្អៀតណែននៃពន្ធនាគារ ដែល ជនសង្ស័យជាង១ម៉ឺន៨ពាន់នាក់គឺ ផលវិបាក់ដល់ការងារផ្គត់ផ្គង់និងការហូបចុកដល់អ្នកជាប់ឃុំជាង២ម៉ឺន៦ពាន់នាក់កំពុងជាប់ឃុំហើយនោះ។
សម្តេច ស ខេង៖«ឥឡូវគេចាប់ច្រើនពេក ធ្វើឲ្យយើងយ៉ាប់វិញ បើយើងមិនចាប់ក៏វាពិបាក។តើមានវិធានការអ្វីដើម្បីដោះស្រាយបញ្ហានិង បើពន្ធនាគារយើងវាណែន។ បើណែនទៅក៏វាពិបាកវាមិនមែនស្រួលប៉ុន្មានហើយនូវការផ្គត់ផ្គង់ និងការហូបចុក មិនមែនរឿងសមញ្ញ។ឥឡូងអ្នកជាប់ឃុំជាង២៦០០០នាក់។»
សម្តេចក៏បានផ្តល់ជាយោបល់ឲ្យលក់ឡៃឡុងទ្រព្យសម្បត្តិដែលរឹបអូសពីជនល្មើសគ្រឿងញៀននិងយកប្រាក់ទាំងនោះដាក់នៅធនាគារដើម្បីទទួលបានការប្រាក់។
ក្នុងប្រតិបត្តិការបង្ក្រាបបទល្មើសគ្រឿងញៀនឆ្នាំ២០១៧នេះអាជ្ញាធរមានសមត្ថិកិច្ចបានរឹបអូសទ្រព្យសម្បត្តិបញ្ជូនទៅសាលាដំបូងរាជធានីភ្នំពេញនិងសាលាដំបូងខេត្តមានម៉ូតូ២២៤៦គ្រឿង រថយន្ត៨៨គ្រឿងនិងបង្កកអចលនទ្រព្យ ដី និងផ្ទះ ១៣ កន្លែង។
កាលពីឆ្នាំ២០១៧កន្លងមក ក្រសួងយុត្តិធម៌បានលើកឡើងអំពីគម្រោងអនុវត្តន៍ទោសការងារសហគមន៍សាកល្បងនៅក្នុងស្រុក មោងឬស្សី ខេត្តបាត់ដំបង។
លោក ជិន ម៉ាលីន អ្នកនាំពាក្យក្រសួងយុត្តិធម៌ បញ្ជាក់ថាក្រសួងកំពុងដំណើរពិភាក្សាលម្អិតអំពីការអនុវត្តន៍ទោសការងារសហគមន៍ដើម្បីឆាប់បានដាក់ឲ្យអនុវត្តន៍ឆាប់នេះ។ ទោះបីយ៉ាងណាលោក ជិន ម៉ាលីន បញ្ជាប់ថាមុនដាក់ឲ្យដំណើរការទោសសហគមន៍នេះក្រសួងត្រូវការពេលវេលាផ្សព្វផ្សាយឲ្យបានទូលំទូលាយដល់សាធារណៈជន។
លោក ជិន ម៉ាលីន៖«អ្វីដែលយើងធ្វើនេះយើងនឹងដាក់អនុវត្តន៍នៅពេលណាមួយ។ប៉ុន្តែដើម្បីទន្ទឹមដាក់ឲ្យអនុវត្តន៍បានទាល់តែធ្វើការងារផ្សព្វផ្សាយដើម្បីឲ្យសហគមយល់ ឲ្យគាត់ពីអត្ថប្រយោជន៍ពីការចូលរួម។»
មាត្រា១០១នៃក្រមព្រហ្មទណ្ឌ បានចែងថាទោសការងារសហគមន៍នឹងអាចប្រកាសបានលុះត្រាតែជនជាប់ចោទមានវត្តមាននៅពេលសវនាការ ហើយព្រមធ្វើការងារនេះ។តុលាការនៅមុនពេលប្រកាសសាលក្រមឬសាលដីកាត្រូវប្រាប់ជនជាប់ចោទថា សាមីខ្លួនមានសិទ្ធប្រកែកមិនព្រមធ្វើការងារនេះ។ចម្លើយរបស់ជនជាប់ចោទត្រូវតែមានចុះនៅក្នុងសាលក្រមឬសាលដីកា។
មាត្រ១០២ចែកបន្តថាតុលាការដែលប្រកាសទោសសហគមន៍ត្រូវកំណត់អំពីថិរវេលានៃការងារនិងរយៈពេលដែលត្រូវបំពេញក្នុងរយៈពេលមិនអាចលើសពី១ឆ្នាំទេ។ចំណែកមាត្រា១០៣ចែងថាបែបបទនៃការអនុវត្តន៍ទោសការងារសហគមន៍ត្រូវកំណត់ដោយព្រះរាជអាជ្ញាដោយចង្អុលប្រាប់ឈ្មោះនីតិបុគ្គលដែលត្រូវទទួលអត្ថប្រយោជន៍ពីការងារនេះ។ទោសនេះអនុវត្តនៅក្រោមការត្រួតពិនិត្យរបស់ព្រះរាជអាជ្ញា។ប៉ុន្តែមាត្រា៩៨ ចែងថាតុលាការដែលប្រកាសទោសការងារសហគមន៍មិនអាចប្រកាសទោសដាក់ពន្ធនាគារឬពិន័យជាប្រាក់បានទេ។
ក្នុងរបាយការណ៍ប្រចាំឆ្នាំ២០១៧របស់អាជ្ញាធរជាតិប្រយុទ្ធប្រឆាំងគ្រឿងញៀនបានដាក់បង្ហាញនៅក្នុងពិធីសន្និបាទត្រួតពិនិត្យការងារបង្ក្រាបគ្រឿងញៀនឆ្នាំ២០១៧និងលើកទិសដៅការងារឆ្នាំ២០១៨បញ្ជាក់ថាអាជ្ញាធរមានសមត្ថកិច្ចបង្ក្រាបបទល្មើសគ្រឿងញៀនជាង៨ពាន់ករណី កើនឡើងជិត៤ពាន់ ស្មើនឹងជាង៩២% បើធៀបទៅនឹងឆ្នាំ២០១៦ជាង៤ពាន់២រយករណី។
សមត្ថកិច្ចចាប់ឃាត់ខ្លួនជនសង្ស័យបាន១៧៧៩៥នាក់ កើនឡើង ៧៣៤៩នាក់ ស្មើនឹងជាង៨៤% និងរឹបអូសគ្រឿងញៀនចំនួនជាង១៩៦គីឡូក្រាមនិងគ្រឿងញៀនកៃច្នៃរួច១៨០គីឡូក្រាម។កញ្ឆាក្រៀម១១៦គីឡូក្រាមនិងកញ្ឆាស្រស់៣០៣ដើម៕
