ភ្នំពេញ៖ សម្ដេចនាយករដ្ឋមន្ដ្រី នៅថ្ងៃព្រហស្បត្តិ៍ ទី0៦ តុលា នេះ បានណែនាំទៅសមត្ថកិច្ចជំនាញគ្រប់ជាន់ថ្នាក់ឱ្យទប់ស្កាត់គ្រឿងញៀនដែលសម្ដេចថា កំពុងប្រព្រឹត្តនៅក្នុងប្រទេសកម្ពុជា។
ការថ្លែងរបស់នាយករដ្ឋមន្ដ្រីធ្វើឡើងនៅក្នុងពិធីចែកសញ្ញាបត្រ ដល់និស្សិតសាកលវិទ្យា ល័យភូមិន្ទនីតិសាស្ដ្រ និងវិទ្យាសាស្ដ្រសេដ្ឋកិច្ច នៅមជ្ឈមណ្ឌលពានិជ្ជកម្មកោះពេជ្រ នៅព្រឹកថ្ងៃនេះ។
សម្ដេច ហ៊ុន សែន បានបញ្ជាក់ថា ប្រទេសណាក៏មានបញ្ហារឿងគ្រឿងញៀននេះដែរ ប៉ុន្ដែ វាមានតិចមានច្រើន។ ប៉ុន្ដែនៅពេលជាមួយគ្នានេះ សម្ដេច ហាក់ដូចជាទទួលស្គាល់ថា ហី្វលីពីន មានស្ថានភាពគ្រឿងញៀនធ្ងន់ធ្ងរជាងគេ ដែលចាំបាច់ធ្វើអោយប្រធានាធិបតី មានវិធានការក្ដៅដូចនេះ។
តែយ៉ាងណាក៏ដោយ សម្ដេច ហ៊ុន សែន អះអាងថា កម្ពុជាមិនអាចប្រើប្រាស់ទោសប្រហារជីវិតលើជនឧក្រឹដ្ឋនោះទេ គឺត្រឹមតែដាក់ទោសមួយជីវិត គឺ គ្រប់គ្រាន់ហើយ។
នៅពេលជាមួយគ្នានេះ ប្រមុខរដ្ឋាភិបាលក៏បានសរសើរ ដល់អាណាព្យាបាល មាតា បិតា ពលរដ្ឋខ្មែរមួយចំនួន ដែលបានអប់រំកូនបានល្អ មិនអោយប្រព្រឹត្តការសេពគ្រឿងញៀន ជាដើម។
កម្ពុជាមិនមែនជាប្រទេសដាំអាភៀន ឬក៏ផលិតថ្នាំញៀន ដូចប្រទេសភូមា ថៃ ឡាវ នោះទេ តែកម្ពុជាជាប្រភពឆ្លងកាត់ ចែកចាយ និងប្រើប្រាស់មួយដែរ៕
