ភ្នំពេញ៖ ក្រុមអ្នកសិក្សាជាន់ខ្ពស់ផ្នែកច្បាប់កម្ពុជា បានលើកឡើងថា មេឃុំមានតួនាទីសំខាន់ក្នុងការអភិវឌ្ឍភូមិឃុំ ព្រោះមេឃុំជាបុគ្គលដែលនៅជិតស្និទ្ធនឹងប្រជាពលរដ្ឋ ស្គាល់ច្បាស់ពីជីវភាពប្រជាពលរដ្ឋ និងតម្រូវការផ្សេងៗរបស់ពលរដ្ឋ។ ការលើកឡើងរបស់បញ្ញវន្តផ្នែកច្បាប់កម្ពុជានេះ ធ្វើឡើងនៅក្នុងសិក្ខាសាលាស្តីអំពី “មេឃុំ“ នាព្រឹកថ្ងៃចន្ទ ទី១១ ខែមករា នេះ នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។
ក្រុមអ្នកសិក្សាជាន់ខ្ពស់ផ្នែកច្បាប់កម្ពុជា ដែលបានសិក្សាស្រាវជ្រាវពីប្រធានបទ មេឃុំ នៅក្នុងប្រទេសកម្ពុជា បានលើកឡើងថា មេឃុំមានតួនាទីសំខាន់ក្នុងការអភិវឌ្ឍភូមិឃុំ ព្រោះមេឃុំជាបុគ្គលដែលនៅជិតស្និទ្ធនឹងប្រជាពលរដ្ឋ ស្គាល់ច្បាស់ពីជីវភាពរស់នៅរបស់ប្រជាពលរដ្ឋ និងតម្រូវការផ្សេងៗ ដែលពលរដ្ឋចង់បាន។
នៅក្នុងសិក្ខាសាលាស្តីពី មេឃុំ មាននិស្សិតផ្នែកច្បាប់ចូលរួមជាង ១០០ នាក់ ធ្វើឡើងនៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នៅថ្ងៃនេះបានបង្ហាញថា មេឃុំបានដើរតួនាទីសំខាន់ក្នុងការអនុវត្តច្បាប់រដ្ឋបាលឃុំ-សង្កាត់ ច្បាប់គ្រួសារ ច្បាប់កិច្ចសន្យា ច្បាប់ការងារ ព្រមទាំងអនុវត្តកិច្ចការនយោបាយមួយចំនួន ដើម្បីបម្រើដល់ផលប្រយោជន៍ប្រជាពលរដ្ឋ ក្នុងឃុំ-សង្កាត់នីមួយៗ។
លោក ថង វង្សសុវិទ្យា និស្សិតថ្នាក់បណ្ឌិតផ្នែកនីតិសាធារណៈនៃសាកលវិទ្យាល័យអ៊ីច ម៉ាក់សីដ៍ ប្រទេសបារាំង ជាវាគ្មិនក្នុងសិក្ខាសាលានេះ មានប្រសាសន៍ថា មេឃុំជាបុគ្គលសំខាន់បំផុត ដែលនៅជិតនឹងប្រជាពលរដ្ឋ រង់ចាំជួយប្រជាពលរដ្ឋនៅពេលដែលពលរដ្ឋត្រូវការ។ លោកថា មេឃុំ កើតចេញពីការជ្រើសរើសដោយប្រជាពលរដ្ឋក្នុងឃុំ ហើយមានតួនាទីជាអ្នកផ្តល់តម្រូវការមូលដ្ឋានផ្សេងៗដល់ប្រជាពលរដ្ឋវិញ ដូចជាដោះស្រាយបញ្ហាដីធ្លី បញ្ហាគ្រួសារ ជាដើម។
ទន្ទឹមគ្នានេះដែរ លោក ព្រុំ រិទ្ធី បណ្ឌិតនីតិសាស្ត្រឯកជន និងជាសាស្ត្រាចារ្យសាកលវិទ្យាល័យភូមិន្ទនីតិ
សាស្ត្រ និងវិទ្យាសាស្ត្រសេដ្ឋកិច្ច បានលើកឡើងថា នៅក្នុងឃុំ-សង្កាត់ មេឃុំ ឬចៅសង្កាត់ មានសិទ្ធិនៅក្នុងការសម្រេចកិច្ចការមួយចំនួនក្នុងផ្នែកនីតិឯកជននៅក្នុងគ្រួសារ ដូចជាបំពេញតួនាទីផ្តល់ជូនលិខិតស្នាមពាក់ព័ន្ធផ្សេងៗដល់ពលរដ្ឋ មានសំបុត្រកំណើត សំបុត្រអាពាហ៍ពិពាហ៍ និងសំបុត្រមរណភាព។
ទាក់ទងនឹងតួនាទីរបស់មេឃុំក្នុងការអភិវឌ្ឍភូមិឃុំនេះដែរ លោក មាស នី អ្នកស្រាវជ្រាវបញ្ហាសង្គមបានមានប្រសាសន៍ជាមួយវិទ្យុស្ត្រី នៅថ្ងៃចន្ទ ទី១១ នេះថា មេឃុំមានតួនាទីសំខាន់ក្នុងការបំពេញកិច្ចការងារថ្នាក់មូលដ្ឋាន ជាមួយពលរដ្ឋ។ លោកថា មេឃុំ ជាអ្នកសម្របសម្រួលដល់ដំណើរការឃុំ-សង្កាត់ ដោយមាននាទីសម្របសម្រួលសមាជិក ឬក្រុមប្រឹក្សាឃុំមកពីគណបក្សនយោបាយផ្សេងៗ ធ្វើកិច្ចការរួមគ្នាដើម្បីបម្រើប្រជាពលរដ្ឋ។
ទន្ទឹមគ្នានេះ លោក មាស នី មានប្រសាសន៍បន្តថា កន្លងទៅនៅក្នុងឃុំនីមួយៗមានទិន្នន័យជាច្រើន ដែលនិយាយពាក់ព័ន្ធនឹងការអភិវឌ្ឍភូមិ-ឃុំ ប៉ុន្តែមេឃុំហាក់ពុំបានលើកយកមកសិក្សា ឬពិភាក្សា ដើម្បីរកដំណោះស្រាយជូនពលរដ្ឋឡើយ ពោលគឺទិន្នន័យផែនការអភិវឌ្ឍឃុំ-សង្កាត់ទាំងនោះ តែងត្រូវបានមេឃុំរៀបចំបញ្ជូនមកថ្នាក់លើជានិច្ច ប៉ុន្តែការអភិវឌ្ឍឃុំសង្កាត់ហាក់មិនមាននោះទេ។ លោកថា បញ្ហានេះ ទំនងជាដោយសារមេឃុំបច្ចុប្បន្នភាគច្រើន មានវ័យចំណាស់ និងមិនមានចំណេះដឹងក្នុងការដោះស្រាយបញ្ហា។
លោក មាស នី មានសង្កត់ធ្ងន់ថា ដើម្បីឱ្យឃុំដំណើរការបានល្អ មានការអភិវឌ្ឍ មេឃុំនីមួយៗ ត្រូវតែក្តាប់ព័ត៌មានពលរដ្ឋរបស់ខ្លួន បញ្ហាសង្គម និងសេដ្ឋកិច្ចប្រជាពលរដ្ឋឱ្យមាននៅក្នុងដៃ ព្រមទាំងមានចំណេះដឹង និងសមត្ថភាពក្នុងការដោះស្រាយបញ្ហា។
សូមជម្រាបថាសិក្ខាសាលាមេឃុំ នាព្រឹកម៉ិញនេះ រៀបចំឡើងដោយមជ្ឈមណ្ឌលស្រាវជ្រាវអនុវត្តច្បាប់ និងក្រុមអ្នកសិក្សាជាន់ខ្ពស់ផ្នែកច្បាប់កម្ពុជា។ បច្ចុប្បន្នកម្ពុជាមានឃុំចំនួនជាង ១៦២១ ឃុំ៕
