ភ្នំពេញ៖ គ.ជ.ប នឹងចាប់ផ្តើមចុះឈ្មោះគណបក្សនយោបាយនិងបេក្ខជនឈរឈ្មោះបោះឆ្នោតជ្រើសតាំងអ្នកតំណាងរាស្ត្រនីតិកាលទី៦ នៅចុងខែមេសា ឆ្នាំ២០១៨។
យោងតាមសេចក្តីប្រកាសព័ត៌មានចុះផ្សាយនៅថ្ងៃទី២៧ ខែមីនានេះ បញ្ជាក់ថាគណៈកម្មាធិការជាតិរៀបចំការបោះឆ្នោត គ.ជ.ប នឹង ទទួលពាក្យចុះបញ្ជីគណបក្សនយោបាយឈរឈ្មោះបោះឆ្នោតនិងបញ្ជីបេក្ខជនឈរឈ្មោះបោះឆ្នោតចាប់ពីថ្ងៃទី ៣០ ខែមេសា ឆ្នាំ ២០១៨ រហូតដល់ថ្ងៃទី ១៤ ខែឧសភា ឆ្នាំ ២០១៨។
សេចក្តីប្រកាសព័ត៌មាននេះឲ្យដឹងទៀតថា ការចុះបញ្ជីគណបក្សនយោបាយនិងបេក្ខជនឈរ ឈ្មោះបោះឆ្នោតធ្វើឡើងនៅគ.ជ.ប។គណបក្សនយោបាយអាចមកយកពាក្យចាប់ពីថ្ងៃជូនដំណឹងនេះឬទាញយកពីគេហទំព័រគ.ជ.ប www.necelect.org.kh និងដាក់ពាក្យសុំចុះបញ្ជីឈរ ឈ្មោះបោះឆ្នោតនៅទីស្តីការគ.ជ.ប។
ការបោះឆ្នោតជ្រើសតាំងអ្នកតំណាងរាស្ត្រនីតិកាលទី ៦ ប្រព្រឹត្តទៅនៅថ្ងៃទី ២៩ ខែ កក្កដា ឆ្នាំ២០១៨។រហូតមកដល់ពេលនេះគណបក្សនយោបាយប្រមាណ៤០បានចុះបញ្ជីត្រឹមត្រូវនៅក្រសួងមហាផ្ទៃ។
ជាមួយគ្នានេះគ.ជ.បប្រកាសដាក់និងទទួលពាក្យចុះឈ្មោះភ្នាក់ងារគណបក្សនយោបាយចាប់ពីថ្ងៃទី ២៩ ខែ មិថុនា និងបញ្ចប់នៅថ្ងៃទី៥ ខែកក្កដា ឆ្នាំ ២០១៨។ដោយឡែកការដាក់និង ទទួលពាក្យចុះឈ្មោះអ្នកសង្កេតការណ៍ជាតិ ចាប់ពីថ្ងៃទី ២៣ ខែមេសា និងបិទ បញ្ជប់ នៅថ្ងៃ ទី១៨ ខែកក្កដា និងការទទួលពាក្យចុះឈ្មោះអ្នកអង្កេតការណ៍អន្តរជាតិចាប់ពីថ្ងៃទី២៣ ខែ មេសា រហូតដល់ថ្ងៃទី២៥ ខែ កក្កដា ឆ្នាំ ២០១៨៕