ភ្នំពេញ ៖ សេចក្ដីជូនដំណឹងរបស់ គណៈកម្មការផ្ដល់ភាពស្របច្បាប់ដល់ពលករកម្ពុជា ដែលកំពុងស្នាក់នៅ និងធ្វើការនៅប្រទេសថៃ កាលពីថ្ងៃទី២៩ ខែមីនា ឆ្នាំ២០១៨ បានប្រាប់ពីនីតិវិធី ដើម្បីឲ្យពលរដ្ឋខ្មែរនៅថៃ អាចបំពេញសំណុំបែបបទធ្វើដំណើរមកកម្ពុជាបាន ដោយពុំមានបញ្ហា។
គណៈកម្មការនេះ បានឲ្យដឹងថា ក្នុងអំឡុងពេលបុណ្យចូលឆ្នាំប្រពៃណីជាតិខ្មែរ នាពេលខាងមុខនេះ ភាគីកម្ពុជា និងភាគីថៃ នឹងសហការគ្នាដើម្បីសម្រួលដល់ពលករ ដែលកាន់ប័ណ្ណមិនមែនសញ្ជាតិថៃ (ប័ណ្ណពណ៌ស៊ីជម្ពូ) នៅមានសុពលភាព និងពលករដែលកាន់លិខិតឆ្លងដែន ឬលិខិតធ្វើដំណើរពលករកម្ពុជាធ្វើការនៅបរទេស (TD) ដែលមានទិដ្ឋាការស្នាក់នៅ និងប័ណ្ណអនុញ្ញាតការងារនៅមានសុពលភាព ព្រមទាំងអ្នកនៅក្នុងបន្ទុក អាចធ្វើដំណើរចេញ ចូលក្នុងប្រទេសថៃ-កម្ពុជា បានចាប់ពីថ្ងៃទី០៥ រហូតដល់ថ្ងៃទី៣០ ខែមេសា ឆ្នាំ២០១៨។
បន្ថែមពីនេះ ចំពោះពលករខ្មែរ ដែលកាន់ប័ណ្ណមិនមែនសញ្ជាតិថៃ (ប័ណ្ណពណ៌ស៊ីជម្ពូ) ដែលមានបំណងធ្វើដំណើរត្រឡប់មកកម្ពុជាវិញក្នុងអំឡុងពេលនេះ ត្រូវទៅស្នើសុំលិខិតអនុញ្ញាតពីមន្ទីរការងារថៃ ក្នុងខេត្ដដែលខ្លួនកំពុងធ្វើការ។ ដោយឡែកចំពោះពលករខ្មែរ ដែលកាន់លិខិតឆ្លងដែន ឬលិខិតធ្វើដំណើរ (TD) ត្រូវទៅស្នើសុំទិដ្ឋាការចេញ-ចូល (Re-Entry Visa) នៅការិយាល័យអន្ដោប្រវេសន៍ក្នុងខេត្ដ ដែលខ្លួនកំពុងធ្វើការ ឬនៅច្រកព្រំដែនអន្ដរជាតិ ចំពោះការស្នើសុំនេះ គឺពុំមានបង់កម្រៃសេវាអ្វីឡើយ។
បន្ថែមពីនេះសេចក្ដីជូនដំណឹងបន្ដថា សម្រាប់ពលករទាំងអស់ត្រូវឆ្លងកាត់តាមច្រកព្រំដែនអន្ដរជាតិ តែមួយប៉ុណ្ណោះ គឺទាំងមក និងត្រឡប់ទៅវិញ។ ជាងនេះ ពលករកម្ពុជា ដែលកាន់ប័ណ្ណមិនមែនសញ្ជាតិថៃ (ប័ណ្ណស៊ីជម្ពូ) មិនតម្រូវឲ្យសុំលិខិតធ្វើដំណើរបណ្ដោះអាសន្ន (Laissez Passer) ដើម្បីធ្វើដំណើរត្រឡប់មកកម្ពុជាឡើយ នៅក្នុងអំឡុងពេលដែលភាគីថៃ និងកម្ពុជា បានឯភាពគ្នានេះ៕