ភ្នំពេញ៖ សហគមន៍អន្ដរជាតិមួយចំនួន រួមមាន បារាំង អង់គ្លេស សហរដ្ឋអាមេរិក និងអង្គការសហប្រជាជាតិ បានថ្លែងទទូចឱ្យរដ្ឋាភិបាលកម្ពុជា បកស្រាយពីមូលហេតុបិទផ្លូវមិនឱ្យលោក សម រង្ស៊ីចូលស្រុក បញ្ហាសិទ្ធិមនុស្ស ដែលបានកើតឡើងនៅកម្ពុជា។
លោក Alok Sharma សមាជិកសភា និងជាអនុរដ្ឋមន្ត្រី ក្រសួងការបរទេសនៃប្រទេសអង់គ្លេស ទទួលបន្ទុកកិច្ចការអាស៊ី និងប៉ាស៊ីហ្វិក បានអំពាវនាវឲ្យរដ្ឋាភិបាលកម្ពុជា ធានាឲ្យបាននូវការគោរពសិទ្ធិមនុស្ស និងសិទ្ធិសេរីភាពជាមូលដ្ឋានដ៏ទៃទៀតរបស់ពលរដ្ឋកម្ពុជា ដូចមានចែងក្នុងកិច្ចព្រមព្រៀងសន្តិភាពទីក្រុងប៉ារីស។ នេះ បើតាមការចុះផ្សាយរបស់វិទ្យុអន្តរជាតិមួយផ្សាយជាខេមរៈភាសា។
ជាមួយគ្នានេះ កាលពីថ្ងៃទី ១៣ តុលា អ្នកនាំពាក្យរងក្រសួងការបរទេសអាមេរិក លោក Mark c. Toner បានចាត់ទុកការចោទប្រកាន់របស់តុលាការ លើមេដឹកនាំបក្សប្រឆាំង លោក សម រង្ស៊ី ថាមានរូបភាពនយោបាយ គឺប្រព័ន្ធយុត្តិធម៌ស្ថិតនៅក្រោមសម្ពាធ នយោបាយ ហើយវាបង្ហាញពីរូបភាពអាក្រក់នៃការអនុវត្ត នយោបាយ ដែលប្រជាជនកម្ពុជាមិនត្រូវការ។
បើតាមអ្នកនាំពាក្យរូបនេះ សហរដ្ឋអាមេរិក កំពុងតាមដានរឿងនេះយ៉ាងយកចិត្តទុកដាក់ ហើយអាមេរិក ក៏អំពាវនាវឲ្យអាជ្ញាធរកម្ពុជា ទម្លាក់នូវការចោទប្រកាន់លើ លោក សម រង្ស៊ី។
ក្រៅពីអង់គ្លេស និងសហរដ្ឋអាមេរិក គឺអង្គការសហប្រជាជាតិ ក៏បានទាមទារឱ្យរដ្ឋាភិបាល បកស្រាយ ចំពោះការនិរទេសខ្លួនលោក សម រង្ស៊ី ផងដែរ។
លោកស្រី វ៉ាន ហៀលី តំណាងប្រចាំប្រទេសនៃការិយាល័យឧត្ដមស្នងការសហប្រជាជាតិទទួលបន្ទុកសិទ្ធិមនុស្ស បានលើកឡើងតាមរយៈសារអេឡិចត្រូនិក ជាមួយកាសែត ខេមបូឌាដេលី ដូចនេះថា សេចក្ដីសម្រេចបិទច្រកមិនឱ្យលោក សម រង្ស៊ី ចូលប្រទេសកម្ពុជាវិញ ដែលត្រូវបានប្រកាសជាសាធារណៈ គ្មានធាតុផ្សំណាមួយដែលអាចឱ្យ វាយតម្លៃបានថាវាសមហេតុផលឡើយ គឺវាបង្ហាញថា សេចក្ដីសម្រេចនេះគ្មានហេតុផល និងធ្វើឡើងតាមអំពើចិត្ត។ លោកស្រីមានប្រសាសន៍បន្ថែមទៀតថា សេចក្ដីសម្រេចនេះចាំបាច់ត្រូវមានការបកស្រាយជាបន្ទាន់។
តាមប្រភព ដដែល គឺ នៅក្នុងព្រឹត្តិការណ៍មួយនៅថ្ងៃព្រហស្បតិ៍ដើម្បីប្រារព្ធខួបលើកទី 25 នៃកិច្ចព្រមព្រៀងសន្តិភាពទីក្រុងប៉ារីសឆ្នាំ 1991 រដ្ឋមន្ត្រីក្រសួងការបរទេសបារាំងលោក Jean-Marc Ayrault បានជំរុញឱ្យប្រទេសកម្ពុជា បន្ត គោរពនីតិរដ្ឋប្រជាធិបតេយ្យសេរីពហុបក្ស និងការគោរពសិទ្ធិមនុស្ស។
ការអំពាវនាវរបស់លោក Jean-Marc Ayrault ធ្វើឡើងតាមរយៈលោក Jean-Claude Poimboeuf ឯកអគ្គរដ្ឋទូតបារាំងប្រចាំកម្ពុជាលោក Ayrault ដែលបានថ្លែងថា: កិច្ចព្រមព្រៀងឆ្នាំ 1991 បានស្ដារ កម្ពុជាក្នុងសហគមន៍អន្តរជាតិ បន្ទាប់ពីមានសង្គ្រាមជាច្រើនទសវត្ស។
តែបែបនេះក្ដី វិទ្យុស្ដ្រីមិនអាចសុំការឆ្លើយតបពី លោក សុខ ឥសាន្ដ អ្នកនាំពាក្យគណបក្សប្រជាជនកម្ពុជាបាននោះទេ នៅរសៀលថ្ងៃនេះ ដោយលោក បង្វែងសំនួរនេះ អោយទៅសួរអ្នកនាំពាក្យរដ្ឋាភិបាល។
ទន្ទឹមនឹងនេះ វិទ្យុស្ដ្រីក៏ព្យាយាម ទាក់ទងទៅ លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ដ្រី ដើម្បីសុំការឆ្លើយតប ប៉ុន្ដែលោក ផៃ ស៊ីផាន បង្វែរសំនួរនេះ ទៅអគ្គនាយកដ្ឋានអន្ដោប្រវេសន៍ក្រសួងមហាផ្ទៃ និងរដ្ឋលេខាធិការនៃទីស្ដីការគណៈរដ្ឋមន្ដ្រី ឱ្យឆ្លើយជំនួសវិញដែលមិនរកប្រភពដើម្បីទាក់ទងសុំការបំភ្លឺ។
ជុំវិញរឿងនេះដែរ សាស្ដ្រាចារ្យវិទ្យាសាស្ដ្រនយោបាយ លោក សូ ចន្ថា មានប្រសាន៍ថាប្រសិនបើកម្ពុជា មិនធ្វើការកែទម្រង់ ឬក៏មិនឆ្លើយតបទៅនឹងអ្វី ដែលជាការស្នើសុំ ពីសហគមន៍អន្ដរជាតិទេ លោកគិតថា កម្ពុជា អាចនិងជួបបញ្ហាមួយចំនួន ពាក់ព័ន្ធនឹងការដាក់សំពាធពីអន្ដរជាតិ។ លោក សូ ចន្ថា បន្តថា កម្ពុជាគួរតែមានដំណោះស្រាយណាមួយ ឆ្លើយតបទៅកាន់សហគមន៍អន្ដរជាតិទាំងនោះ ។
លោក សូ ចន្ថា ៖«សម្រាប់ខ្ញុំគិតថា កម្ពុជាយើងជាប្រទេសប្រជាធិបតេយ្យ ដែលមានចែងនៅក្នុងរដ្ឋធម្មនុញ្ញ ហើយកម្ពុជាក៏ជាប្រទេសដែលបានធ្វើសច្ចាប័នពាក់ព័ន្ធនឹងការគោរពសិទ្ធិមនុស្ស សិទ្ធិនយោបាយ ជាលក្ខណៈអន្ដរជាតិ ។ ដូច្នេះការស្នើ ឬក៏ការលើកឡើងពីសហគមន៍អន្ដរជាតិ ពីប្រទេសនានា ពាក់ព័ន្ធនឹងការជម្រុញរដ្ឋាភិបាលបកស្រាយ ហើយនិងគោរពសិទ្ធិមនុស្ស ជាពិសេសសិទ្ធិនយោបាយរបស់ពលរដ្ឋខ្មែរនោះ ខ្ញុំគិតថា រដ្ឋាភិបាល គួរតែពនិត្យមើលហើយកែទម្រង់អោយ មកធ្វើការកែតម្រូវ ឱ្យស្របទៅនឹងអ្វីដែលកម្ពុជាយើងធ្វើសច្ចាប័ន ហើយស្របទៅនឹងច្បាប់កម្ពុជាផង »។
គួរបញ្ជាក់ដែរថា សេចក្ដីថ្លែងការណ៍របស់ប្រទេស មហាអំណាចទាំងនេះ គឺ ធ្វើឡើងក្រោយពីមានលិខិតប្រកាសព័ត៌មានមួយរបស់គណៈរដ្ឋមន្ដ្រី បានប្រាប់ទៅអគ្គនាយកដ្ឋានអន្ដោប្រវេសន៍ នៃក្រសួងមហាផ្ទៃ កាលពីថ្ងៃសុក្រ ទី២១ តុលា ឱ្យពិនិត្យ និងផ្ទៀងផ្ទាត់គ្រប់មធ្យោបាយទាំងអស់ ដោយធ្វើយ៉ាងណាកុំអោយលោក សម រង្ស៊ី បានជាន់លើទឹកដីកម្ពុជា។
