ភ្នំពេញ៖ ប្រធានគណបក្សប្រឆាំងធំជាងគេនៅកម្ពុជា ដែលល្បីខាងជាប់បណ្ដឹងនៅតុលាការជាច្រើន លោក សម រង្ស៊ីបានសរសេរបង្ហោះ លើទំព័រហ្វេសប៊ុកផ្លូវការ របស់លោកកាលពីយប់ថ្ងៃទី ១៣ ខែតុលា ថា លោកនឹងវិលត្រឡប់មកប្រទេសកម្ពុជាវិញ ក្នុងពេលណាមួយដែលសមស្រប ដូចកាលពី ៣ ដងមុន ក្នុងកាលៈទេសៈដូចគ្នាអញ្ចឹងដែរ ដែលតម្រូវឲ្យមានដំណោះស្រាយនយោបាយមួយ ដោយជៀសមិនផុត។
ករណីនេះអ្នកនាំពាក្យ បក្សប្រឆាំង បញ្ជាក់ថា គណបក្សសង្គ្រោះជាតិសង្ឃឹមថា នឹងមានដំណោះស្រាយរួមមួយ ដែលអាចឲ្យប្រធានគណបក្ស វិលចូលប្រទេសវិញបាន។ ប៉ុន្ដែអ្នកនាំពាក្យគណបក្សកាន់អំណាចថា មិនអាចទៅរួចទេគឺគ្មានការចរចា លើកលែងទោសទណ្ឌិតឡើយ។
ការអះអាងរបស់ លោក សម រង្ស៊ី ប្រធានគណបក្សសង្គ្រោះជាតិ ដូចនេះ បានធ្វើឱ្យមន្ត្រីរបស់លោក មានសុទិដ្ឋិនិយម ថាប្រធានរបស់ខ្លួនពិតជាបានវិលចូលប្រទេសវិញ តាមកាលៈទេសៈពិសេសណាមួយ ដែលសមស្រប។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានផ្ដល់បទសម្ភាសន៍ខ្លីឱ្យវិទ្យុស្ដ្រីនៅថ្ងៃ សុក្រ ទី ១៤ ខែ តុលា ថា ការអះអាងរបស់លោក សម រង្ស៊ី ដូចនេះគឺ ផ្អែកទៅលើបទពិសោធ របស់លោកកន្លងមក។ អ្នកនាំពាក្យក៏បង្ហាញក្ដីសង្ឃឹមថា នឹងមានដំណោះស្រាយមួយសមស្រប សម្រាប់ ប្រធានគណបក្សសង្គ្រោះជាតិ ហើយលោកអាចនឹងវិលចូលមកប្រទេសកម្ពុជាវិញបាន។
លោក យឹម សុវណ្ណ បញ្ជាក់ថា រាល់បញ្ហារបស់អ្នកនយោបាយ គឺគ្មានដំណោះណាស្រាយល្អជាង ការជជែកគ្នានោះទេ ។ ជាងនេះលោកថា បើអ្នកនយោបាយមានឆន្ទៈ ធ្វើដើម្បីជួយជាតិ គឺគួរតែអង្គុយជជែកគ្នា។
លោក យឹម សុវណ្ណ៖«ម្ភៃឆ្នាំចុងក្រោយនេះយើងឃើញថា គ្មានដំណោះស្រាយណាក្រៅតែពីដំណោះស្រាយជជែកគ្នាជួបគ្នាដើម្បីពន្យល់គ្នាឲ្យយល់ទៅវិញទៅមក ពីឆន្ទៈរបស់ម្នាក់ៗ ហើយបើសិនជាអ្នកនយោបាយធ្វើដើម្បីជាតិ ដើម្បីប្រជាពលរដ្ឋមានន័យថាគោលបំណងរួមគ្នា គ្រាន់តែផ្លូវខុសគ្នា ហើយបើយើងអង្គុយជជែកគ្នាទៅ យើងដោះស្រាយបានហើយ បារម្ភតែទស្សនៈនយោបាយ និងគោលបំណងខុសគ្នាទេ ទើបជជែកមិនត្រូវ»។
លោក សម រង្ស៊ី បានបង្ហាញសេចក្ដីសង្ឃឹមរបស់លោក ជាថ្មីនេះ ធ្វើឡើង បន្ទាប់ពី ព្រះមហាក្សត្រ បានចេញលិខិត ផ្ញើទៅរដ្ឋសភា កាលពីថ្ងៃទី៧ តុលាថា ព្រះអង្គចង់ឃើញមានការបង្រួបបង្រួមជាតិខ្មែរ តែមួយគឺដើម្បី អភិវឌ្ឍប្រទេស ។ ជាមួយនឹងនេះ ព្រះមហាក្សត្រក៏បានផ្ញើលិខិតទៅ សម្ដេច ហ៊ុន សែន ដែល ស្នើ ឱ្យនាយករដ្ឋមន្ត្រី ពិនិត្យសំណើរបស់បក្សប្រឆាំង សុំលើកលែងទោស។ តែបែបនេះ ក្ដីសម្ដេច ហ៊ុន សែន បានទូលថ្វាយព្រះមហាក្សត្រវិញថា ទាំងលោកសម រង្ស៊ី និងលោក កឹម សុខា ក្ដី សុទ្ធតែប្រព្រឹត្តល្មើសច្បាប់។ ករណីតុលាការផ្តន្ទាទោស ពួកគាត់គឺជា ការពង្រឹង នីតិរដ្ឋ។ លិខិតរបស់សម្ដេច ហ៊ុន សែន ហាក់ដូចជាបដិសេធ ការស្នើសុំលើកលែងទោស លើមេបក្សប្រឆាំងទាំង២នេះ។
អ្នកនាំពាក្យគណបក្សប្រជាជនកម្ពុជាលោក សុខ ឥសាន្ដ មានប្រសាសន៍ថា គ្មានអ្នកណាទៅរូបរួមជាមួយអ្នកប្រព្រឹត្ដិល្មើសច្បាប់ឡើយ។ អ្នកនាំពាក្យបញ្ជាក់ថា សាររបស់លោក សម រង្ស៊ី គឺគ្រាន់តែ បំណងដើម្បីលើកទឹកចិត្ដគណបក្សប្រឆាំងរបស់ខ្លួនកុំឲ្យបាក់ ស្មារតីប៉ុណ្ណោះ ។
លោក សុខ ឥសាន្ដ សង្កត់ធ្ងន់ថា លោក សម រង្ស៊ី ជាបុគ្គលដែលនិយាយគ្មានការពិត ហើយជាពិសេសគឺខ្លាចការជាប់គុកណាស់។
លោក សុខ ឥសាន្ដ៖«កុំទៅជឿ សម រង្ស៊ី នោះគាត់មិនដាច់ចិត្ដចូលទេ គាត់ខ្លាចគុកណាស់ ចាំមកឃើញនឹងភ្នែកចាំជឿ អញ្ចឹងគាតត់និយាយយកគួរសម និងយករួចខ្លួនទេ អញ្ចឹងតាំងពីដើមមក សម រង្ស៊ី និយាយមិនដែលច្បាស់លាស់ទេ គ្មានការគិតគូរប្រាកដនិយមម្ដងណាទេ និយាយឡប់ឆ្វេងឡប់ស្ដាំ មិនដឹងទិសតំបន់អី ឥឡូវនេះគ្រាន់តែលើកទឹកចិត្ដសមាជិករបស់ខ្លួន(កុំឲ្យ) បាកទឹកចិត្ដប៉ុណ្ណោះទេ»។
ទាក់ទិន ករណីនេះ សាស្ដ្រាចារ្យវិទ្យាសាស្ដ្រនយោបាយ លោក សូ ចន្ថា បានបង្ហាញការយល់ឃើញថា លោក សម រង្ស៊ី អាចវិលចូលកម្ពុជាវិញបាន តាមរយៈការស្នើសុំទៅកាន់ព្រះមហាក្សត្រដោយផ្ទាល់ និងមួយចំណុចទៀតគឺមានការចរចានយោបាយ ដែលមានអន្ដរាគមន៍ ពីអន្ដរជាតិណាដែលមានឥទ្ធិពល។ តែលោកថា បើសិនមិនអាចរចា ឬសម្របសម្រួលបានទេគឺ លោក សម រង្ស៊ី គួរបង្ហាញភាពក្លាហានរបស់ខ្លួនដើម្បីប្រឈមមុខ នឹងបញ្ហាដោយផ្ទាល់។
បន្ថែមទៀតនេះ សាស្ដ្រាចារ្យសិក្សានយោបាយបន្ដថា ក្នុងកាលៈទេសៈនេះលោក សម រង្ស៊ី មិនគួរវិលមកកម្ពុជាទេ គួររងចាំដល់កៀក និងពេលឃោសនាបោះឆ្នោត និងបោះឆ្នោត ហើយនៅខណៈនោះបើមានការចាប់ខ្លួនលោកយល់ថា អាចនឹងធ្វើឲ្យគណបក្សសង្គ្រោះជាតិឈ្នះឆ្នោត ។
លោក សូ ចន្ថា៖«នៅក្នុងកាលៈទេសៈ នេះលោក សម រង្ស៊ី ហាក់មិនចាំបាច់ត្រឡប់មកប្រទេសកម្ពុជាវិញទេ ប៉ុន្ដែអ្វីដែលគាត់រង់ចាំ គឺជិតដល់ដំណើការនៃការបោះឆ្នោត និងឃោសនាបោះឆ្នោត នៅពេលនោះហើយបើគាត់ចូលមកដោយគ្មានអន្ដរាគមន៍ ឬក៏គ្មានការសម្របសម្រួលនយោបាយ ហើយប្រសិនជារដ្ឋាភិបាលអនុវត្ដន៍ ការចាប់ខ្លួនអីជាដើម ខ្ញុំគិតគណបក្សគាត់អាចឈ្នះឆ្នោតភ្លូកទឹកភ្លូកដី»។
សូមរម្លឹកថាលោក សម រង្ស៊ី ត្រូវបាន តុលាការ ដែលអ្នកសង្កេតការណ៍ខ្លះថា មិនមានភាពឯករាជ្យ កាលពីឆ្នាំ២០១១បានផ្តន្ទាទោស លោក ជាង២០ឆ្នាំករណីលោកទៅដក តម្រុយព្រំដែន មួយនៅស្រុកចន្ទ្រា ខេត្តស្វាយរៀង ដែលលោកថាវៀតណាម បោះចូលទឹកដីខ្មែរ។ តែយ៉ាងនេះក្ដី កាលពីមុនការបោះឆ្នោត បន្តិច គឺការបោះឆ្នោត សភាថ្ងៃទី២៨ កក្កដា ឆ្នាំ២០១៣ លោកបានវិលចូលប្រទេសវិញ ដោយមានអ្នកទៅទទួលលោក នៅអាកាសយានដ្ឋានអន្តរជាតិភ្នំពេញ ជាច្រើនសែននាក់៕
