ភ្នំពេញ៖លោក ប្រាក់ សុខុន រដ្ឋមន្ដ្រីក្រសួងការបរទេសបានប្រាប់ទៅឧបការីរដ្ឋមន្ដ្រីការបរទេសលោក ដានីញែល រ៉ូសែល ថា សម្ដេចនាយករដ្ឋមន្ដ្រី ហ៊ុន សែន នឹងជួបចរចាជាមួយថ្នាក់ដឹកនាំគណបក្សសង្គ្រោះជាតិនាពេលឆាប់ៗខាងមុខ។
ដោយសារព័ត៌មាននេះ គណបក្សសង្គ្រោះជាតិបានបង្ហាញការសាទរ ហើបញ្ជាក់ថា ខ្លួនបានត្រៀមរួចរាល់ហើយដើម្បីចរចាជាមួយគណបក្សប្រជាជនកម្ពុជា លើកិច្ចការជាច្រើនដែលមិនទាន់បានដោះស្រាយ។ ប៉ុន្ដែអ្នកនាំពា្យគណបក្សកាន់អំណាច បញ្ជាក់ថា ការចរចានេះគឺ និយាយត្រឹមតែរឿងប្រទេសជាតិ និងផលប្រយោជន៍ពលរដ្ឋប៉ុណ្ណោះ មិនមែនជាការចរចាដើម្បីដោះលែងអ្នកទោសឡើយ។ ចំណែកអ្នកវិភាគពីបញ្ហាសង្គម យល់ឃើញថា នេះជាសញ្ញាល្អរវាងអ្នកនយោបាយដែលព្រមដោះស្រាយបញ្ហារវាងខ្មែរ និងខ្មែរ។
លោក លៀ ស៊ីណា រាយការណ៍៖
ជំហររបស់បក្សកាន់អំណាចដែល រដ្ឋមន្ត្រីការបរទេសលោក ប្រាក់ សុខុន បានប្រាប់ អ្នកការទូតជាន់ខ្ពស់អាមេរិក ដែលមកបំពេញទស្សនកិច្ច នៅកម្ពុជាថា ឆាប់ៗនេះ សម្ដេចហ៊ុនសែននឹងចរចាជាមួយថ្នាក់ដឹកនាំគណបក្សសង្គ្រោះជាតិឡើងវិញនេះត្រូវបានអ្នករាយការណ៍ព័ត៌មានម្នាក់នៃវិទ្យុអាស៊ីសេរីនិយាយ ក្នុងម៉ោងផ្សាយនៅពេលព្រឹកថ្ងៃសុក្រ ទី ២៨ តុលានេះ ។
ទាក់ទិននឹងការលើកឡើងរបស់លោក ប្រាក់ សុខុន អ្នកនាំពាក្យគណបក្សប្រជាជនកម្ពុជាលោក សុខ ឥសាន្ដ បានផ្ដល់បទសម្ភាសន៍ឲ្យវិទ្យុស្ដ្រីFM102 នៅថ្ងៃទី ២៨ តុលា ថា គម្រោងជួបចារចារវាងសម្ដេច ហ៊ុន សែន ជាមួយថ្នាក់ដឹកនាំគណសង្គ្រោះជាតិ គឺគ្មានជនបរទេសណា មកគាបសង្កត់រាជរដ្ឋាភិបាលនោះឡើយ។
លោក សុខ ឥសាន្ដ បញ្ជាក់ថា ថ្វីបើមានការចរចា ប៉ុន្ដែក៏មិនអាចដោះស្រាយបញ្ហា រឿងអ្នកអ្នកប្រព្រឹត្ដល្មើសច្បាប់ឲ្យរួចទោសបានដែរ គឺចរចាតែរឿងជាតិប៉ុណ្ណោះ។
លោក សុខ ឥសាន្ដ៖«ខ្ញុំថាគ្មានការគាបសង្កត់អីទេ ហើយការចរចាក៏មិនអាចដោះស្រាយបញ្ហារឿងអ្នកជាប់គុកឲ្យរួចទោសបានដែរ បើថាជួបចរចាផ្នែកនយោបាយ ក្នុងលក្ខណដែលយើងថា ជាវប្បធម៌សន្ទនា»។
ទំនងជាការបន្ទន់ជំហររបស់គណបក្សប្រជាជនកម្ពុជា លោក យ៉ែម បុញ្ញាឬទ្ធិ អ្នកនាំពាក្យសភាសំឡេ ងភាគតិចនៃគណបក្ស សង្គ្រោះជាតិ មានប្រសាសន៍ថា គណបក្សសាទរជាខ្លាំងចំពោះសញ្ញានៃការជួបចរចាគ្នា រវាងគណបក្ស ដែលមានអាសនៈក្នុងសភា។ លោកបន្ដទៀតថា បក្សសង្គ្រោះជាតិបានត្រៀម ខ្លួនរួចហើយដើម្បីជំនួបនៃការចរចា ដែលក្នុងនោះគឺមានកិច្ចការជាច្រើន ដែលត្រូវជជែកគ្នា ដើម្បីដោះស្រាបញ្ហានៅសេសសល់ក្រោយថ្ងៃ ២២ កក្ដដា ២០១៥។
លោក យ៉ែម បុញ្ញាឬទ្ធិ មានប្រសាសន៍ដោយជំនឿចិត្ដថា ឲ្យតែមានការជួបចរចាគឺរាល់បញ្ហាដែលជាប់គាំងទាំងអស់នឹងត្រូវបានដោះស្រាយ។
លោក យ៉ែម បុញ្ញាឬទ្ធិ៖«ជាទូទៅយើងនឹងជជែកអំពីបញ្ហានៅសេសសល់ដែលមាននៅក្រោយថ្ងៃទី ២២ កក្កដា ឆ្នាំ ២០១៥ ដូច្នេះយើងនឹងមើលកិច្ចការទាំងអស់នោះដើម្បីដោះស្រាយបញ្ហា»។
បញ្ហារបស់អ្នកនយោបាយខ្មែរដែលមិនចុះសម្រុងគ្នាអស់រយៈពេលជាយូរមកហើយ តែស្របពេលនេះមាន សញ្ញានៃការជួបចរចាគ្នាជាថ្មី ត្រូវបានអ្នកវិភាគសាទរ ហើយយល់ថា នេះគឺជានយោបាយឆ្លាតមួយរបស់ថ្នាក់ដឹកនាំគណបក្សកាន់អំណាច។
លោក គឹម សុខ អ្នកឃ្លាំមើលការអភិវឌ្ឍសង្គម និងនយោបាយ មានប្រសាសន៍ថា ប្រសិនជាគណ បក្ស កាន់អំណាច បណ្ដោយ និងអូសបន្លាយបញ្ហាជម្លោះរវាងអ្នកនយោបាយយូរបន្ដទៀតនោះ រាជរដ្ឋាភិ បា លនឹងបាក់មុខកាន់តែខ្លាំងជាក់ជាពុំខាន។ ប្រការនេះលោកពន្យល់ថា សហគមន៍អន្ដរជាតិដែលតែងតែដាក់សម្ពាធមកកម្ពុជាឲ្យដោះស្រាយវិបត្ដិ មិនមែនមានតែសមាជិកសភា ឬមន្ដ្រីរបស់គេតែ ពីរ បី រូបនោះទេ ពោលគឺរដ្ឋាភិបាលគេទាំងមូលតែម្ដងដែលកំពុងសំឡឹងមកកម្ពុជា។
អ្នកឃ្លាំមើលពីការភិវឌ្ឍសង្គមរូបនេះ ជឿជាក់ថា បើកាលណាអ្នកនយោបាយត្រូវរូវគ្នានោះនឹងធ្វើឲ្យ រា ស្ដ្រខ្មែរទាំងអស់ លែងមានក្ដីព្រួយបារម្ភពីអសន្ដិសុខ។
លោក គឹម សុខ៖«ខ្ញុំថាការដែរលោកនាយករដ្ឋមន្ដ្រី ហ៊ុន សែន លូកដៃទៅជជែកចរចាបញ្ចប់ជម្លោះក្នុងរយៈពេលណាមួយដែលកាន់តែឆាប់កាន់តែល្អនេះគឺជាវិធីឆ្លាតក្នុងនយោបាយរបស់គាត់។តែ បើគាត់មិ នឆ្លាតលូតដៃឲ្យឆាប់គឺជាភាពអាមាស់មួយដែលគាត់នឹងទទួលបានពីយន្ដការរបស់អង្គការ សហប្រជា ជាតិ ដែលអាចនាំលោក សម រង្ស៊ី ចូលស្រុក តាមរយៈសម្ពាធនយោបាយដាក់លើរាជរដ្ឋាភិបាលកម្ពុជាណាមួយពេលនោះលោកនាយករដ្ឋមន្ដ្រីបាក់មុខខ្លាំងណាស់»។
បន្ថែមពីនេះលោក គឹម សុខ មានជំនឿថា សញ្ញានៃការជួបចរចារវាងថ្នាក់ដឹកនាំគណបក្សកាន់អំណាច ជាមួយគណបក្សសង្គ្រោះជាតិ គឺព្រោះតែសម្ពាធអន្ដរជាតិដាក់មកលើរាជរដ្ឋាភិបាលកម្ពុជា។
សូមជម្រាបថា សញ្ញានៃការជួបចរចាគ្នារវាងថ្នាក់ដឹកនាំគណបក្សកាន់អំណាចសម្ដេច ហ៊ុន សែន នេះគឺបន្ទាប់ពីសហគមន៍អន្ដរជាតិជាច្រើនបានចេញសេចក្ដីថ្លែងការណ៍រួម ជាច្រើនលើកច្រើនសារដោយទទូ ច ឲ្យរាជរដ្ឋាភិបាលបញ្ឈប់ការធ្វើទុក្ខបុកម្នេញលើសកម្មជន និងថ្នាក់ដឹកនាំគណបក្សប្រឆាំងហើយ ក៏ស្របពេលដែល លោក សម រង្ស៊ី ព្រមានវិលត្រឡប់ចូលកម្ពុជាវិញ បើទោះជាលោក ត្រូវបានចាប់ខ្លួន ឬ សម្លាប់ក៏ដោយ ៕