ក្រុង Perth៖ រថយន្តមួយគ្រឿងបានឆេះយ៉ាងសន្ធោសន្ធៅនៅខាងក្រៅវិហារអ៊ីស្លាមមួយកន្លែង ស្ថិតនៅទីក្រុង Perth ប្រទេសអូស្ត្រាលី នារាត្រីថ្ងៃអង្គារទី២៨ មិថុនា ខណៈដែលសាសនិកអ៊ីស្លាមរាប់រយនាក់ កំពុងតែថ្វាយបង្គំព្រះក្នុងព្រះវិហារ។
តាមបណ្ដាញផ្សាយព័ត៌មាន Channel News Asia អ្វីជាការកត់សម្គាល់មុនហេតុការណ៍នេះកើតឡើង គេសង្កេតឃើញមានរូបគំនូរប្រឆាំងរដ្ឋអ៊ីស្លាមនៅតាមជញ្ជាំងនៅខាងក្រៅវិហារ Thornlie ដែលមានទីតាំងក្បែរមហាវិទ្យាល័យអ៊ីស្លាមអូស្ត្រាលី។
ប្រព័ន្ធផ្សព្វផ្សាយអូស្ត្រាលីបានរាយការណ៍ថា មិនមាននរណាម្នាក់រងរបួសក្នុងហេតុការណ៍នេះ។
តាមសេចក្តីថ្លែងការណ៍របស់ប៉ូលិស យ៉ាងហោចណាស់មានរថយន្តចំនួនបួនគ្រឿងត្រូវបានខូចខាតក្នុងការវាយប្រហារនោះនៅម៉ោង 8 យប់។
ប្រព័ន្ធផ្សព្វផ្សាយដដែលបញ្ជាក់ថា សាក្សីម្នាក់បានឃើញមនុស្សចំនួនបីនាក់រត់ចេញពីតំបន់ដែលកើតហេតុការណ៍នោះ។
លោក Yahya Adel Ibrahim អ្នកតំណាងវិហារអ៊ីស្លាមបានបង្ហោះនៅលើទំព័រ Facebook ដោយនិយាយថា៖«នេះគឺជាទង្វើដ៏ព្រៃផ្សៃដែលគួរឱ្យស្អប់ខ្ពើម ប៉ុន្តែយើងមិនដឹងថា សកម្មភាពនេះបង្កឡើងដោយមនុស្សម្នាក់ ឬជាក្រុមនោះទេ»។
លោកបានបន្ថែមថា៖ «ទោះបីជាមានហេតុការណ៍បំផ្ទុះរថយន្តនេះក៏ដោយ ក៏អ្នករាល់គ្នានៅក្នុងព្រះវិហារនៅតែបន្តធ្វើការថ្វាយបង្គំ ដោយមិនមានការភ័យខ្លាច បើទោះបីជាមានការប៉ុនប៉ងធ្វើភេរវកម្មក៏ដោយ»៕
ប្រភព:CNA
