ភ្នំពេញ៖ ក្រោយពីបញ្ចប់សន្និសីទសារព័ត៌មានកាលពីថ្ងៃទី ២៦ ខែធ្នូ រួចមកក្រុមប្រជាពលរដ្ឋដែលភាគច្រើនសុទ្ធសឹងតែជាស្ដ្រីមកពីខេត្ដកោះកុងកំពុងស្នាក់នៅវត្តសាមគ្គីរង្សីក្នុងរាជធានីភ្នំពេញ គឺនៅតែមិនទាន់ទទួលបានចម្លើយណាមួយជាក់លាក់ពីក្រសួងរៀបចំដែនដី និងក្រសួងពាក់ព័ន្ធនោះទេនៅថ្ងៃទី ២៧ ខែធ្នូ នេះ។
ករណីនេះអ្នកសារព័ត៌មិនអាចសុំការឆ្លើយតបពីក្រសួងដែនដីបានទេ។ ប៉ុន្ដែបើតាមការបញ្ជាក់ពលរដ្ឋទាំងអស់ដែលមានទំនាស់ដីធ្លីមកពីខេត្ដកោះគឺសុខចិត្ដស្លាប់រស់នៅភ្នំពេញប្រសិនបើគ្មានដំណោះស្រាយ។ ប្រជាពលរដ្ឋដែលមានគ្នាប្រមាណជា ២០០នាក់ភាគច្រើនជាស្ត្រីរងគ្រោះដីធ្លីមកពីខេត្តកោះកុងក្រោយបញ្ចប់ការធ្វើសន្និសីទកាសែតកាលពីថ្ងៃម្សិលមិញ រហូតដល់ថ្ងៃទី ២៧ ខែធ្នូ នេះគឺមិនទាន់បានទទួលបានដំ ណោះស្រាយពីក្រសួងរៀបចំដែនដីនគរូបនីយកម្ម និងសំណង់ និងក្រសួងពាក់ព័ន្ធផ្សេងៗទៀតនោះទេ។
តំណាងពលរដ្ឋម្នាក់ដែលមានវ័យប្រមាណជាង ៦០ឆ្នាំលោក លក្ខណ៍ ខ្មៅ មានប្រសាសន៍ថា លោកក៏ដូចជាអ្នកភូមិដទៃទៀតដែលមកំពុងស្នាក់នៅវត្ដសាមគ្គីរង្សីនេះគឺមិនត្រឡប់ទៅវិញទេប្រសិនបើក្រសួងរៀបចំដែនដីគ្មានដំណោះស្រាយពិតប្រាកដសម្រាប់ពួកគាត់។ បុរសវ័យចំណាស់ដែលមានសម្បុរខ្មៅ រូបរាងស្គមស្គាំងរូបនេះសង្កត់ធ្ងន់ថា លោកសុខចិត្ដស្លាប់នៅភ្នំពេញគឺមិនត្រឡប់ទៅវិញទេ លុះត្រាតែទទួលបានដំណោះស្រាយពីបញ្ហាដីធ្លីរបស់លោកដែលត្រូវក្រុមហ៊ុនលោក ឧកញ៉ា លី យ៉ុងផាត់ និងក្រុមហ៊ុនរបស់លោក ហេង ហ៊ុយ រំលោភយក។ លោក លក្ខណ៍ ខ្មៅ៖«បាទទៅធ្វើម៉េចបើយើងទាមទារទឹកដីយើងមិនបានទៅវិញក៏ងាប់ព្រោះអត់ដីធ្វើការកសិកម្មហើយទៅធ្វើម៉េច មកនេះគឺបាត់បង់ទឹកដីបានមកមិនមែនចង់មកភ្នំពេញនេះធ្វើឲ្យខូចចរាចរណ៍គេទេ»។
លោក លក្ខណ៍ ខ្មៅ ក៏បានទទូចផងដែរដល់រដ្ឋអំណាចសូមមើលឃើញពីទុក្ខវេទនារបស់ប្រជាពលរដ្ឋក្រីក្រដែលកំពុងតែស្រែកយំព្រោះរងអំពើអយុត្ដិធម៌ផង។
ចំណែអ្នកស្រី ផាវ ញ៉ឺង តំណាងឱ្យក្រុមស្ត្រីរងគ្រោះដីធ្លី១៧១នាក់ នឹងកំពុងតែព្យូរសេរ៉ូម កូនអាយុជាង ១ខួបផងបានថ្លែងថា អ្នកស្រីមិនចង់នាំកូនតូចមកតវ៉ា នៅភ្នំពេញដូចនេះទេ ក៏ប៉ុន្ដែព្រោះតែអ្នកស្រី និងអ្នកផ្សេងទៀតអស់ជម្រើសទើបនាំគ្នាមកភ្នំពេញដើម្បីតវ៉ាទាំងគ្មានប្រាក់មួយរៀលនៅនិងខ្លួន។
អ្នកស្រី ផាវ ញ៉ឺង៖«ខ្ញុំខ្ចីលុយគេ ២០ម៉ឺនមក ពេលមើលកូន(ឈឺ)អស់លុយតេទៅឲ្យប្ដីចងការគេ២០ម៉ឺនទៀតតែឥឡូវអស់ទៀត កូនខ្ញុំមិនទាន់ជាទេតែបើខ្ញុំទៅផ្ទះក៏មានអីព្យាបាលកូនដែរអញ្ចឹងខ្ញុំនៅទីនេះដើម្បីឲ្យបងប្អូនសាធារណៈជនមើលឃើញ និងដើម្បីឲ្យសម្ដេច ហ៊ុន សែន ប្រមើលមើលឲ្យឃើញថាកូនវេទនាណាស់គួរតែពន្លឿនដោះស្រាយឲ្យយើងខ្ញុំដើម្បីឲ្យឆាប់បានវិលទៅជួបជុំគ្រួសារវិញ»។
បន្ថែមពីនេះអ្នកស្រី ផាវ ញ៉ឺង ក៏ស្នើសុំឲ្យសម្ដេច ហ៊ុន សែន ជួយដល់ក្រុមអ្នកស្រីនិងអ្នកភូមិទាំង១៧១នាក់ដែលរងគ្រោះព្រោះការរំលោភដីធ្លីនេះផង ព្រោះក្រុមអ្នកស្រីលំបាកណាស់សព្វថ្ងៃ។
ករណីប្រជា ពលរដ្ឋនៅខេត្ដកោះកុងមករាជធានីភ្នំពេញសុំអន្ដរាគមន៍ពីក្រសួងរៀបចំដែនដីនគរូបនី យកម្ម និងសំ ណង់នេះវិទ្យុស្ដ្រីអេហ្វអឹម១០២ មិនអាចសុំការឆ្លើយតបពីអ្នកនាំពាក្យក្រសួងរៀបចំដែ នដីបានទេនៅថ្ងៃទី ២៧ ខែធ្នូ នេះ។ចំណែកក្រុមហ៊ុនរបស់ លោក ឧកញ៉ា លី យ៉ុងផាត់ និងក្រុមហ៊ុនរបស់លោក ហេង ហ៊ុយ ក៏មិនមានប្រភពទាក់ទងដែរ។ បើតាមការឱ្យដឹងពីពលរដ្ឋរងគ្រោះដីធ្លីមកពីខេត្តកោះកុង បញ្ជាក់ថា ទំនាស់ដីធ្លីដែលបានកើតទ្បើងនេះគឺចាប់តាំងពីឆ្នាំ២០០៦មកម្លេះ ហើយពួកគាត់ក៏បានដាក់ញត្តិរកកិច្ចអន្តរាគមន៍ពីក្រសួងពាក់ព័ន្ធរួចហើយដែរ ក៏ប៉ុន្តែដោយសារតែគ្មានការឆ្លើយតបទើបពួកគាត់សម្រេ ចទ្បើងមកភ្នំពេញជាថ្មីទៀតដើម្បីតាមដានញាត្តិរបស់ពួកគាត់។ បច្ចុប្បន្នអ្នករងគ្រោះដីធ្លីទាំងនេះស្នាក់នៅវត្តសាមគ្គីរង្សីជាបណ្តោះអាសន្នរង់ចាំកិច្ចអន្តរាគមន៍ពីរដ្ឋាភិបាលរឿងទំនាស់ដីធ្លីរបស់ពួកគាត់៕
