ភ្នំពេញ ៖ លោក ប៉ា សុជាតិវង្ស អភិបាលរាជធានីភ្នំពេញមានប្រសាសន៍ថាភ្នំពេញ នឹងក្លាយជាទីក្រុងមួយដែលមិនមានចំណតចតសម្រាប់ម៉ូតូ និងយានយន្ដទុកនៅលើចិញ្ចើមផ្លូវទៀតទេ។
លោក ប៉ា សុជាតិវង្ស បានលើកឡើងដូចនេះនៅក្នុងកម្មវិធីបូកសរុបលទ្ធផលត្រួតពិនិត្យការអនុវត្តច្បាប់ស្ដីពី ចរាចរណ៍ផ្លូវគោកប្រចាំឆ្នាំ២០១៦ និងទិសដៅការងារឆ្នាំ២០១៧ធ្វើឡើងនៅ សណ្ឋាគារសូហ្វីតែល ភូគីត្រា រាជធានីភ្នំពេញ នៅថ្ងៃទី០២ ខែមករា នេះ។
នៅក្នុងកម្មវិធីនោះ លោក ប៉ា សុជាតិវង្ស ក៏បានលើកឡើងបន្ថែមទៀតថា ភ្នំពេញនឹងរៀបចំស្លាក កាំម៉េរា ស្តុបចំនួន៦០០កន្លែង និង ភ្លើង ចំនួន ១ម៉ឺន៣ពាន់អំពូល និងបន្ថែមថ្មី ៤ពាន់ដើមទៀត។
បើតាមលោក ប៉ាសុជាតិ វង្ស ការសម្រេចដាក់ចេញការអនុវត្តនៅឆ្នាំ ២០១៧ ដែលសំដៅ ឱ្យទីក្រុងភ្នំពេញនឹងក្លាយជាទីក្រុងគ្មានចំណតចតលើចិញ្ចើមផ្លូវនេះ ក្នុងគោលបំណងដើម្បីជួយសម្រួលដល់ការកកស្ទះចរាចរណ៍នៅទីក្រុងភ្នំពេញ។
តាម លោក ប៉ា សុជាតិវង្ស នៅរាជធានីភ្នំពេញ មានម៉ូតូចំនួន ១លាន៥សែន និង រថយន្តជាង៤០ម៉ឺនគ្រឿង៕
