ភ្នំពេញ៖ អគ្គលេខាធិការដ្ឋានរដ្ឋសភាជាតិ កោះហៅប្រធានស្តីទី គណបក្សសង្គ្រោះជាតិ លោក កឹម សុខា ទៅបំភ្លឺករណីសំឡេងខ្សែអាត់ ស្នេហាដែលសង្ស័យថា ជាសំឡេងរបស់ អតីតអនុប្រធានទី១ រដ្ឋសភារូបនេះតាមញត្តិរបស់យុវជនមួយក្រុម។
យោងតាមលិខិតរបស់រដ្ឋសភាចុះថ្ងៃទី២១ ខែ មីនា ចុះហត្ថលេខាដោយ លោក ឡេង ប៉េងឡុង អ្នកនាំពាក្យ និងជាអគ្គលេខាធិការរដ្ឋសភា បានស្នើឱ្យលោក កឹម សុខា មកបំភ្លឺនៅរដ្ឋសភាឱ្យបានឆាប់ៗនេះ ជុំវិញបញ្ហារឿងអាស្រូវស្នេហារបស់ប្រធានស្តីទីគណបក្សសង្គ្រោះជាតិរូបនេះ។
ក្នុងលិខិតផ្ញើទៅលោក កឹម សុខា បានបញ្ជាក់ថា ការកោះហៅមកបំភ្លឺនោះគឺ ដើម្បីការពារកិត្យានុភាពរដ្ឋសភា ការពារកិត្តិយស និងសេចក្តីថ្លៃថ្នូររបស់តំណាងរាស្ត្រ។ តែបែបនេះក្ដី លោក ឡេង ប៉េងឡុង អះអាងថា ចំណាត់ការនេះ ធ្វើឡើងតាមការបង្គាប់របស់លោក ងួន ញឹល ប្រធានស្ដីទីរដ្ឋសភា។
យោងតាមញត្តិរបស់តំណាងក្រុមនិស្សិត លោក ស្រី ចំរើន បានដាក់ទៅរដ្ឋសភាកាលពីថ្ងៃទី១៤ មីនា បានស្នើឱ្យរដ្ឋសភាកោះហៅលោក កឹម សុខា ឱ្យបំភ្លឺរឿងខ្សែអាត់សំឡេងស្នេហារបស់លោក។
លោកនាយករដ្ឋមន្ត្រី ហ៊ុន សែន លើកឡើងថា លោកមានភស្តុតាងគ្រប់គ្រាន់រឿងអាស្រូវស្នេហាលួចលាក់នេះ តែលោកមិនបានបញ្ជាក់ចំឈ្មោះ លោក កឹម សុខា ឡើយ។
ចំពោះគណបក្សសង្គ្រោះជាតិវិញ បានបង្ហាញជំហរថា មិនឆ្លើយ មិនឆ្លង និងមិនឈ្លោះ ជុំវិញបញ្ហានេះឡើយ។ ជុំវិញបញ្ហានេះ អង្គការសង្គមស៊ីវិល និងអ្នកតាមដានស្ថានការណ៍សង្គមបានចាត់ទុកថាជារឿងឥតប្រយោជន៍ ដែលគណបក្សនយោបាយមិនគួរឈ្លោះប្រកែកគ្នា៕
