ភ្នំពេញ៖ សមាជិកសភាមកពីតំបន់អាស៊ីអាគ្នេយ៍បានទាមទារឲ្យដោះលែងជាបន្ទាន់និងឥតលក្ខណ អ្នកការពារសិទ្ធិមនុស្សនៅកម្ពុជាចំនួនប្រាំរូបដែលកំពុងឃុំខ្លួននិងចោទប្រកាន់ ខណៈការឃុំខ្លួនពួកគាត់មានរយៈ១០០ថ្ងៃហើយ ។
នៅក្នុងសេចក្ដីថ្លែងការណ៍ដែលបានផ្សព្វផ្សាយកាលពីថ្ងៃទី ០៨ សីហា ដែលធ្វើឡើងនៅទីក្រុង ចាកាតា ប្រទេស ឥណ្ឌូនេស៊ីប្រធានអង្គការសមាជិកសភាអាស៊ានដើម្បីសិទ្ធិមនុស្ស លោក ឆាលី ហ្សង់ទីយ៉ាហ្គោ ដែលជាសមាជិកសភាមកពីប្រទេសម៉ាឡេស៊ី បានបញ្ជាក់ក្នុងសេចក្ដីថ្លែងការណ៍ថា ការឃុំខ្លួនមន្ដ្រីអង្គការសិទ្ធិមនុស្សអាដហុក ៤ រូប និង អគ្គលេខាធិការរង នៃគណកម្មាធិការជាតិរៀបចំការបោះឆ្នោតមួយរូបបានប្រព្រឹត្ដិទៅរយៈពេល ១០០ ថ្ងៃមក ។ ក្នុងន័យនេះ សមាជិកសភាមកពីតំបន់អាស៊ីអាគ្នេយ៍សូម ទាមទារ អោយបញ្ឈប់ការយាយីតាមផ្លូវតុលាការ ចំពោះអ្នកទាំងប្រាំរូប និងអំពាវនាវដល់សហគមអន្ដរជាតិជួយជំរុញឲ្យដោះលែងអ្នកទាំងប្រាំរូបនេះជាបន្ទាន់ និង គ្មានលក្ខណ ។
លោក ឆាលី ហ្សង់ទីយ៉ាងហ្គោ បានបញ្ជាក់ក្នុងសេចក្ដីថ្លែងការណ៍របស់លោកដូចនេះថា៖«យើងមានភាពច្បាស់លាស់ ដោយមិនមានមន្ទិលសង្ស័យអ្វីឡើយក្នុងការគាំទ្រ ឲ្យមានការដោះលែងអ្នកការពារសិទ្ធិមនុស្សទាំង ៥រូបនេះ ។ គ្មានអ្នកណាម្នាក់អាចត្រូវបានចាប់ខ្លួន ឬឃុំខ្លួនដោយរំលោភបំពាននិងតាមអំពើចិត្ដនោះឡើយ ហើយសមាជិកអង្គការសង្គមស៊ីវិល មិនត្រូវស្ថិតក្នុងស្ថានភាពគ្រោះថ្នាកក្នុងការបំពេញការងាររបស់ពួកគេនោះទេ។បទចោទប្រកាន់លើករណីនេះ ត្រូវបានមើលឃើញយ៉ាងច្បាស់ថា ធ្វើឡើងដោយហេតុផលនយោបាយ និង បានធ្វើឲ្យនិតិរដ្ឋនៅកម្ពុជា ដែលមានភាពទនខ្សោយរួចទៅហើយនោះកាន់តែចុះខ្សោយថែមទៀត ។ ដែលករណីនេះអាជ្ញាធរកម្ពុជាចាំបាច់ត្រូវដោះលែងអ្នកការពារសិទ្ធិមនុស្សទាំងប្រាំនាក់ បើសិនជាចង់បានឱទទួលបានការទុកចិត្ដពីអន្ដរជាតិឡើងវិញ»។
លោក នី សុខា លោក ណៃ វង់ដា លោក យី សុខសាន្ដ លោកស្រី លឹម មុនី ដែលពួកគាត់ជាមន្ដ្រីជាន់ខ្ពស់នៃសមាគមការពារសិទ្ធិមនុស្សអាដហុក ត្រូវបានឃុំខ្លួន ចោទប្រកាន់ ពីបទសូកប៉ាន់សក្សី នាង ខុម ចាន់តារ៉ាទី ហៅ ស្រី មុំ និង លោក នី ចរិយា អគ្គលេខាធិការរង គ ជ ប ត្រូវបានឃុំខ្លួនករណី សមគំនិតសូកប៉ាន់សក្សី ក្នុងសំណុំរឿងស្ដ្រីរូបនេះផងដែរ ។
ប្រធានអង្គការ សមាជិកសភាដើម្បីសិទ្ធិមនុស្សលោក ឆាលី ហ្សង់ទីយ៉ាហ្គោ បញ្ជាក់ទៀតថា៖«អាជ្ញាធរកម្ពុជា កំពុងតែចំអកចំពោះប្រព័ន្ធតុលាការយុត្ដិធម៍នៅកម្ពុជា ដោយសារតែចំណាត់ការបន្ដលើអ្នកទាំងប្រាំរូបនេះ ការនាំខ្លួនមន្ដ្រីអង្គការទាំងនេះមកកាត់ទោសតាមផ្លូវតុលាការ ដែលពួកគេជាអ្នកជំនួយផ្នែកច្បាប់សម្រាប់ពលរដ្ឋនោះគឺជារឿងអយុត្ដិធម៍ដ៏ធ្ងន់ធ្ងរដែរស្ថានភាពដ៏អាក្រក់នេះ ត្រូវបានបញ្ជាក់យ៉ាងច្បាស់ថា តុលាការត្រូវបានប្រើប្រាស់ដោយរដ្ឋាភិបាល ដើម្បីបំរើរបៀវារៈនយោបាយ »។
ក្រៅពីទាមទារដូច្នេះប្រធានសមាជិកសភាអាស៊ាន ក៏បានទាមទារឲ្យរដ្ឋាភិបាលកម្ពុជាបញ្ឈប់ ការធ្វើទុក្ខបុកម្នេញ ទៅលើក្រុមអ្នករិះគន់រដ្ឋាភិបាលផងដែរ ។ ជុំវិញ សេចក្ដីថ្លែងការណ៍របស់ប្រធានអង្គការសមាជិកសភាអាស៊ានដើម្បីសិទ្ធិមនុស្ស លោក ឆាលី ហ្សង់ទីយ៉ាហ្គោ នេះអ្នកនាំពាក្យគណបក្សប្រជាជនកម្ពុជា លោក សួស យ៉ារ៉ា បានផ្ដល់បទសម្ភាសន៍ដល់វិទ្យុស្ដ្រីនៅថ្ងៃ ពុធ ទី ១០ សីហា ថា អ្វីដែល ប្រធានអង្គការសមាជិកសភាអាស៊ានដើម្បីសិទ្ធិមនុស្ស លើកឡើងគឺគ្រាន់តែជាសំបកក្រៅនៃជ្រុងមួយដែលមិនបានឆ្លុះបញ្ចាំងពីការពិតនៅកម្ពុជាឡើយ ។
លោកបង្ហាញជំនឿថា មូលហេតុនៃការលើកឡើងដូច្នេះគឺព្រោះតែ ការទទួលព័ត៌មានមិនពិត ការស្ដាប់តែក្រុមម្ខាង និង ស្ដាប់ការញុសញុងបំភ្លៃការពិតរបស់ក្រុមមួយចំនួន ទើបបានជាអន្ដរជាតិមើលមកកម្ពុជាក្នុងស្ថានភាពមិនល្អ ។
លោក សួស យ៉ារ៉ា បញ្ជាក់បន្ថែមថា ការអំពាវនាវរបស់ប្រធានអង្គការសមាជិកសភាអាស៊ានដើម្បីសិទ្ធិមនុស្សលោក ឆាលី ហ្សង់ទីយ៉ាហ្គោ គឺជារឿងដែលមិនត្រឹមត្រូវ ព្រោះតែនៅកម្ពុជា អំណាចត្រូវបានបែងចែកដាក់ពីគ្នា លោកពន្យល់ថា ចំពោះអ្នកដែលត្រូវឃុំខ្លួនទាំងប្រាំនាក់នោះ គឺមិនមែនអាជ្ញាធរបំពានស្ថាប័នសិទ្ធិមនុស្សឡើយ ការឃាត់ខ្លួននេះព្រោះតែបុគ្គលទាំងនោះធ្វើល្មើសទៅនឹងច្បាប់ ប៉ុណ្ណោះ ។
លោក សួស យ៉ារ៉ា៖ «ខ្ញុំយល់ឃើញថា អ្វីដែលគេនិយាយហ្នឹង គឺនិយាយទៅលើអ្វីដែលគេមើលតែពីសំបកក្រៅ ព្រោះការចាប់កន្លងមកហ្នឹងមិនមែនចាប់អ្នកសិទ្ធិមនុស្សទេ គឺចាប់បុគ្គលដែលប្រព្រឹត្ដិកំហុស អញ្ចឹមិនពាក់ព័ន្ទទៅលើស្ថាប័នសិទ្ធិមនុស្សទេ អញ្ចឹងអ្វីដែលគេលើកសេចក្ដីថ្លែងការណ៍ ហ្នឹងគេមិនបានយល់ស៊ីជម្រៅនៃខ្លឹមសារច្បាប់នៃព្រះរាជាណាចក្រកម្ពុជា»។
អ្នកនាំពាក្យគណបក្សប្រជាជនកម្ពុជាក៏បានឲ្យដឹងដែរថា រាល់សំណើររបស់អន្ដរជាតិមកលើកម្ពុជា រាជរដ្ឋាភិបាល មិនដែលបដិសេធចោល នោះទេ ជារឿយៗគឺតែងតែយកមកពិនិត្យ មើលថាតើសំណើទាំងនោះសមស្របទៅនឹងគោលការណ៍ច្បាប់ដែរឬទេ មុនពេលដែល¬¬¬¬ធ្វើការឆ្លើយតប ៕
