ភ្នំពេញ ៖ នាយិកាប្រតិបត្ដិ អង្គការ ដែលធ្វើការងារលើកិច្ចការ ការពារសិទ្ធិស្ដ្រី សុំឲ្យសាធារណជនមួយចំនួនបញ្ឈប់ការដាក់បន្ទុកលើស្ដ្រីក្រោយមានការណីរំលោភសេពសន្ថវៈ។ ប្រការនេះ អង្គការសង្គមស៊ីវិលនៅតែមើលឃើញថា ស្ដ្រីរងគ្រោះជាច្រើន មិនទាន់ទទួលបានការយកចិត្ដទុកគ្រប់គ្រាន់ពីមជ្ឈដ្ឋានជុំខ្លួននៅឡើយ ខណៈពួកគេត្រូវបានជនខិលខូចមួយចំនួនបង្ខំរំលោភបំពានផ្លូវភេទ តែបែរជាត្រូវរងការរិះគន់ថា មកពីស្ដ្រីខ្លួនឯងជាអ្នកបើកដៃឲ្យជនល្មើសទៅវិញ។ លោក លៀ ស៊ីណា រាយការណ៍៖
នាយិកាប្រតិបត្ដិអង្គការចំនួនពីរ បង្ហាញអារម្មណ៍សោកស្ដាយ ខណៈមានពាក្យដៀលត្មេះលើស្ដ្រី លាន់ឮ ស្ទើរគ្រប់ពេលក្រោយពេល មានករណីបង្ខំរំលោភសេពសន្ថវៈបានកើតឡើង។ ចំណាប់អារម្មណ៍របស់នាយិកាប្រតិបត្ដិអង្គការទាំងពីរនេះ ធ្វើឡើងស្របពេលដែលលើពិភពលោកកំពុងតែប្រារព្ធទិវាអន្ដរជាតិស្ដីពីការលុបបំបាត់អំពើហិង្សាលើស្ដ្រី រយៈពេល ១៦ថ្ងៃ ដោយរាប់ពីថ្ងៃទី២៥ វិច្ឆិកា ដល់ថ្ងៃទី ១០ ធ្នូ ឆ្នាំ២០១៧។
លោកស្រី រស់ សុភាព នាយិកាប្រតិបត្ដិអង្គការយេនឌ័រ និងអភិវឌ្ឍន៍ដើម្បីកម្ពុជា ហៅកាត់ថា GADC បានឲ្យដឹងថា មានការចូលរួមច្រើនដែរ ជុំវិញការបញ្ឈប់ហិង្សាលើស្ដ្រី ក៏ប៉ុន្ដែពាក្យរិះគន់ ដែលក្លាយជាការដាក់បន្ទុកលើស្ដ្រីរងគ្រោះ នៅតែមាន ហើយកើតស្ទើគ្រប់ពេលផងដែរ។ លោកស្រី បានបន្ដថា ចំណុចនេះ គឺជាក្ដីបារម្ភមួយ ដែលវាបានក្លាយជាថ្មបាក់សង្កត់ទៅលើស្ដ្រី នាំឲ្យពួកគេក្លាយជាជនរងគ្រោះពីការរំលោភផង និងក្លាយជាជនរងគ្រោះពីការដាក់កំហុសរបស់មនុស្សមួយចំនួនក្នុងសង្គមផង។ លោកស្រី រស់ សុភាព៖«អញ្ចឹងយើងចង់ឲ្យផ្លាស់ប្ដូរឥរិយាបថ ឲ្យមើលឃើញថា បញ្ហាដែលស្ដ្រីធ្វើជាការសម្រេចចិត្ដរបស់គាត់ ហើយវាមិនពាក់ព័ន្ធរឿងដែលធ្វើឲ្យបុរសហ្នឹងរំលោភគេទេ»។
បន្ថែមពីនេះ លោកស្រី រស់ សុភាព បន្ដថា បើហិង្សាលើស្ដ្រីនៅតែបន្ដកើត ជាពិសេសករណីរំលោភនេះ នឹងនាំឲ្យសង្គមជាតិមានផលលំបាកជាច្រើន ដូចជាផ្នែកសេដ្ឋកិច្ច ដែលរាជរដ្ឋាភិបាលត្រូវចំណាយថវិកា ដើម្បីជួយព្យាលស្ដ្រី ប្រសិនបើពួកគេមានជំងឺណាមួយដោយការចាប់រំលោភ។
ត្រង់ចំណុចនេះនាយិកាប្រតិបត្ដិអង្គការសីលការលោកស្រី ធីតា ឃឹះ គាំទ្រ សង្កត់ធ្ងន់ថា ទង្វើបង្ខំរំលោភលើស្ដ្រីគឺកើតចេញពីបុរស ដែលតែងតែចាត់ទុក ឥរិយាបថប្រមាថលើស្ដ្រីដូចនេះ ថា ជាការលេងសើច ហើយមិនតែប៉ុណ្ណោះសង្គមបែរជាមកដាក់បន្ទុកលើស្ដ្រីថែមទៀត។ លោកស្រី ធីតា ឃឹះ ៖«ដូច្នេះរឿងនេះសុំឲ្យ ប្រជាពលរដ្ឋទាំងអស់ទាំងស្រីទាំងប្រុស ទទួលស្គាល់ថា មិនមែនជាកំហុសរបស់អ្នករងគ្រោះទេ ព្រោះអ្នកដែលប្រព្រឹត្ដអំពើមកលើស្ដ្រីហ្នឹងឯងជាអ្នកទទួលកំហុស»។
ស្ដ្រី នឹងមានវិបត្ដិជាច្រើន ប្រសិននាងត្រូវបានគេចាប់បង្ខំរំលោភសេពសន្ថវៈ ដែលមានទាំងការប៉ះពាល់សតិអារម្មណ៍ សុខមាភាពនៃការរស់នៅប្រចាំថ្ងៃ ហើយជាពិសេស គឺប៉ះពាល់ទៅដល់កិត្ដិយស់ ភាពថ្លៃថ្នូរ ក្នុងមួយជីវិតរបស់នាង។
ជុំវិញរឿងនេះ លោកស្រី ធីតា សុំឲ្យរាជរដ្ឋាភិបាល ធ្វើយ៉ាងណាបង្កើនការផ្សព្វផ្សាយរបស់ខ្លួនឲ្យបានទូលំទូលាយ ដើម្បីឲ្យសាធារណជនបញ្ឈប់ ការដាក់កំហុស និង រើសអើងលើស្ដ្រីជាបន្ដទៀត ខណៈនាងត្រូវបានជនខិលខូចចាប់រំលោភ។
វិទ្យុស្ត្រីមិនអាចសុំការឆ្លើយតបពី ក្រសួងកិច្ចការនារីបានទេ។
គិតត្រឹមរយៈពេលជាង ១០ខែ ឆ្នាំ២០១៧នេះ ស្ដ្រីរងគ្រោះដោយសារអំពើហិង្សាមានការកើនឡើងច្រើនជាងឆ្នាំ២០១៦។ នេះបើតាមរបាយការណ៍ប្រចាំខែរបស់អង្គការកម្ពុជាដើម្បីជួយស្ដ្រីមានវិបត្តិ។ រយៈពេលចុងក្រោយនេះ សង្គមស៊ីវិលដែលធ្វើការងារ ផ្នែកការពារសិទ្ធិមនុស្សមើលឃើញថា ហិង្សាលើស្ដ្រីមិនបានថមថយនោះទេ ផ្ទុយទៅវិញវាបានកើតឡើងជាញឹកញាប់ ហើយមានរូបភាពកាន់តែសាហាវថែមទៀត។ ក្រៅពីការហូរចូលហាក់មានភាពទូលាយនូវរឿងអាសអាភាសហើយ ប្រ័ពន្ធផ្សព្វផ្សាយមួយចំនួនដែលមានជាអាទិ៍ ទូរទស្សន៍ជាដើម តែងតែបង្ហាញនូវសកម្មភាពហិង្សាលើស្ដ្រីជាញឹកញាប់តាមរយៈកម្មវិធីរបស់ពួកគេ។
បើផ្អែកតាមរបាយការណ៍របស់អង្គការមូលនិធិអាស៊ីដែលដាក់បង្ហាញ កាលពីចុងឆ្នាំ២០១៦ បានបញ្ជាក់ថា អំពើហិង្សាលើស្ដ្រីដែលមិនបានថយចុះ ពីព្រោះតែកម្មវិធីមួយចំនួនរបស់ស្ថានីយ៍ទូរទស្សន៍ល្បីៗ នៅកម្ពុជា សុទ្ធតែផ្ទុកនូវខ្លឹមសារអំពើហិង្សា គ្រប់ទម្រង់ទៅលើស្ត្រី។ បន្ថែមពីនេះអង្គការនេះ បានរកឃើញទៀតថា អំពើហិង្សាលើស្ដ្រីនិងកុមារ ភាគច្រើនទាំងអ្នករងគ្រោះនិងអ្នកប្រព្រឹត្ដ គឺពួកគេមានការចេះដឹងតិចតួច ហើយជាងនេះពួកគេជាក្រុម មនុស្សមានអាយុចន្លោះពី ២៦ ដល់ ៤៩ឆ្នាំ ហើយជាពលរដ្ឋរស់នៅតាមតំបន់ដាច់ស្រយាល៕
