ភ្នំពេញ៖លោក ម៉ម ប៊ុនហេង រដ្ឋមន្ត្រីក្រសួងសុខាភិបាលយល់ព្រមចូលបំភ្លឺនៅរដ្ឋសភាដើម្បីស្រាយចម្ងល់របស់ក្រុមតំណាងរាស្ត្រគណបក្សប្រឆាំងពាក់ព័ន្ធនឹងការអនុវត្តការងារនៅក្នុងវិស័យសុខាភិបាលខណៈរដ្ឋមន្ត្រីក្រសួងរ៉ែនិងថាមពលក៏យល់ព្រមចូលបំភ្លឺផងដែរនៅថ្ងៃទី១៥ ធ្នូ។
នេះបើតាមការបញ្ជាក់របស់ លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភា ដែលបានផ្ដល់បទសម្ភាសន៍ឲ្យគេហទំព័រក្នុងស្រុកមួយ។ លោក ឡេង ប៉េងឡុង បានពន្យល់ថា តាមលិខិតរាជរដ្ឋាភិបាលលោក ម៉ម ប៊ុនហេង រដ្ឋមន្ត្រីក្រសួងសុខាភិបាល ត្រូវចូលបំភ្លឺ នៅថ្ងៃព្រហស្បត្តិ៍ ណាមួយ នៅអំឡុងសម័យប្រជុំរដ្ឋសភា។ តែសម្រាប់រដ្ឋមន្ត្រីក្រសួងរ៉ែនិងថាមពលនឹងចូលបំភ្លឺនៅថ្ងៃទី១៥ ធ្នូ ។ការចូលខ្លួនមកបំភ្លឺរបស់រដ្ឋមន្ត្រីក្រសួងសុខាភិបាលធ្វើឡើងបន្ទាប់ពីក្រុមតំណាងរាស្ត្រគណបក្សសង្គ្រោះជាតិបានដាក់លិខិតកាលថ្ងៃទី ១ ធ្នូ ។
ភាពមិនប្រក្រតីដែលតំណាងរាស្ត្រគណបក្សប្រឆាំងបានលើកឡើងជុំវិញក្រសួងសុខាភិបាលរួមមាន ការផ្តល់សេវាមិនត្រឹមត្រូវនៅតាមមន្ទីរពេទ្យរដ្ឋ និងឯកជន វិធានការក្រសួងក្នុងការពង្រឹងគុណភាពជំនាញពេទ្យ និងការអនុវត្តក្រមសីលធម៌ ការចែកចាយ និងការគ្រប់គ្រងសម្ភារៈពេទ្យ និងថ្នាំពេទ្យ រួមជាមួយការគ្រប់គ្រងប្រាក់ជំនួយ។ តែសម្រាប់ករណីរបស់ក្រសួងរ៉ែនិងថាមពល ក្រុមតំណាងរាស្ត្រគណបក្សសង្គ្រោះជាតិនឹងចោទសួរពីការបូមខ្សាច់និង ប្រាក់ចំណូលពីការបូបខ្សាច់ដែលសង្គមស៊ីវិលចោទថា មានភាពមិនប្រក្រតី និងករណីធ្វើឱ្យខូចបរិស្ថាន៕